SALMOS 75 - El Nuevo Testamento y Salmos

Dios, ɨ tɨ Juées jɨn tyiꞌtyéjvee

Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj. Capáj tyiꞌtɨ́j antyíuꞌnaꞌan. Chuíicarij maj jɨn tyaatatyójtziꞌreꞌen maj jɨn jaatyáanajche Asaf tɨ jaꞌaꞌrij

¹ Muéetzij tu tyíꞌmuatyojtziꞌreꞌ, taj Dios, muéetzij tu tyíꞌmuatyojtziꞌreꞌ, aꞌyaa tu jéehua tyáꞌhuoo aꞌ jitze maꞌcan tyajta aꞌɨ́j tyíꞌchuiicaj ɨ tɨ naa tyuꞌséꞌrin muáaj paj tyúꞌtaahuacaꞌ.

² Tavástaraꞌ pu aꞌyan tyíꞌxaj tɨjɨn: “Aꞌájna aꞌnáj nyej nyáaj aꞌyan tyaataxájta, nyáaj nu néijmiꞌcaa tyámuaꞌ tyáꞌxɨjtyeꞌen.

³ Tɨꞌɨjta huatóocaꞌtzɨj ɨ chuéj, majta néijmiꞌi ɨ maj japuan huacháatɨmee, nyáaj nu aꞌɨ́ɨn puéꞌeen ɨ tɨ tyámuaꞌ tyéꞌchaꞌɨj ɨ tɨ japuan róocaꞌnyej.”

⁴ Ajta aꞌɨ́ɨjma ɨ maj óotzaahuatyeꞌ ajta ɨ maj jeꞌej puaꞌaj rɨcɨj aꞌyaa nu tyihuáꞌixaatyeꞌ tɨjɨn: “Caxu junyoꞌsiꞌtyeꞌej caxu siajta óotzaahuatyeꞌej;

⁵ caxu aꞌɨ́j jitze tyíꞌcaꞌnyej tyiꞌtɨ́j siaj huayíꞌtɨn caxu huápuɨꞌɨj óotzaahuatyeꞌej tɨpuaꞌaj tyiꞌtɨ́j setyáxajtasimeꞌen.”

⁶ Jiꞌnye capu ɨ puéjtzij aꞌáa jeꞌréꞌnyesij aꞌájna joꞌtɨj ɨ xɨcáj jéꞌejnyinyiij nusu joꞌtɨj jaꞌancáruꞌpij, capu ajta aꞌájna joꞌtɨj quee jáꞌtyiꞌtɨj nusu a jɨríj tzajtaꞌ,

⁷ sulu aꞌɨ́ɨ pu ɨ Dios Juées tɨ jɨn tyiꞌtyéjvee: aꞌɨ́ɨ pu séecan huatyáxaahuataj ajta séecan tyámuaꞌ tyuꞌtyátoosij.

⁸ Tavástaraꞌ pu jiꞌtyáaja ɨ jumuácaꞌ jitze ɨ tɨ jitzán uhuáaꞌ ɨ tɨ jɨn nyúꞌcamuɨꞌ, nahuáj pu áꞌnaxcaj ajta arí újmueꞌriacaꞌ. Tɨꞌɨj jajxɨ́reꞌen aꞌɨ́jcɨ ɨ nahuáj, néijmiꞌi ɨ maj jeꞌej puaꞌaj rɨcɨj ɨ cháanacaj japua aꞌɨ́ɨ mu néijmiꞌi juquéiꞌsij.

⁹ Nyáaj nu aꞌnáj tɨnaꞌaj jaxáataj naꞌmej ɨ Dios raꞌ aꞌɨ́jcɨ ɨ Jacob nyajta jimi tyuꞌtáchuiicaj;

¹⁰ jiꞌnye aꞌɨ́ɨ pu jaꞌantyipuáꞌrityeꞌsij ɨ maj jɨn óotzaahuatyeꞌ aꞌɨ́ɨmaj ɨ maj jeꞌej puaꞌaj rɨcɨj; ajta jéetzeꞌ pu tyámuaꞌ tyeetyátoosij aꞌɨ́jcɨ ɨ tyáataj tɨ tyámuaꞌ tyíꞌtyevij.