SALMOS 149 - El Nuevo Testamento y Salmos

Dios, ɨ tɨ néijmiꞌi tyúꞌtaahuacaꞌ ajta Rey jɨn tyiꞌtyéjvee

¹ ¡Alelúuyaj! Jájcuacan xu tyuꞌtáchuiicaj ɨ Tavástaraꞌ jimi, aꞌáa xu tyaatatyójtziꞌreꞌen joꞌmaj jóosɨɨreꞌ ɨ maj jimi tyámuaꞌ tyityetyúuchaꞌɨj.

² Xatóotyamuaꞌveꞌ mu siaj Israel jitze ajtyámaꞌcan, siajta Sión siaj joꞌcháatɨmee, jiꞌnye Dios pu néijmiꞌi jaꞌmua jimi tyúꞌtaahuacaꞌ ajta Rey jɨn tyiꞌtyéjvee.

³ Setyuꞌtatyójtziꞌreꞌ ɨ tɨ jɨn ántyapuaj siajta jimi tyuꞌtyéenyeꞌen, jimi xu tyuꞌtáchuiicaj ɨ canárij jitze siajta ɨ quéetzaj jitze.

⁴ Jiꞌnye ɨ Tavástaraꞌ pu jutyamuaꞌveꞌ aꞌɨ́ɨjma jimi ɨ jutyéɨtyeristyamuaꞌ, aꞌɨ́ɨjma pu huataꞌsij maj tyuꞌmuéꞌtɨn ɨ maj quee óotzaahuatyeꞌ.

⁵ Siataꞌaj huatóotyamuaꞌveꞌen mu siaj quee tyiꞌtɨ́j jɨn áꞌɨtzeereꞌ aꞌɨ́jcɨ jɨmeꞌ siaj tyuꞌtyámueꞌtɨj, tyij siajta siooj tyácuꞌtzisimeꞌen xuutyámuaꞌveꞌej xu tyíꞌchuiicaj.

⁶ Cheꞌ ɨ chuíicarij jaꞌmuatyényij jitze séjreꞌej ɨ Dios siaj jɨn tyuꞌtatyójtziꞌreꞌen, ajta ɨ jaꞌmua muácaꞌ jitze ɨ chúun tɨ juxaꞌaj tyaꞌantámuamuaa

⁷ siaj sij aꞌɨ́jna jɨn tyoꞌrióorɨeeraj aꞌɨ́ɨjma jimi ɨ maj quee tyáꞌtzaahuatyeꞌ, siajta puéjtzij huoꞌtáꞌan ɨ maj séej chuéj japua jáꞌmaꞌcan,

⁸ siataꞌaj huoꞌtyájɨꞌqueꞌen ɨ maj rey jɨn tyíꞌijta siajta ɨ tyeɨ́tyee maj jéehua uhuácacaꞌnyeꞌ aꞌɨ́jcɨ jɨmeꞌ xu huoꞌtyájɨꞌqueꞌen ɨ cadéenaj tyapúustiꞌ tɨ puéꞌeen tɨ tyíjetyej,

⁹ taꞌaj ij aꞌɨ́ɨjma jimi aꞌyan tyaꞌróoꞌastej jeꞌej tɨ arí tyoꞌyúꞌsiꞌhuacaꞌ. ¡Aꞌíi pu aꞌɨ́ɨn pueꞌéenyeꞌej jaꞌmej ɨ maj jɨn jaatyátzaahuatyeꞌen ɨ maj jimi tyámuaꞌ een! ¡Alelúuyaj!