SALMOS 146 - El Nuevo Testamento y Salmos

Jeꞌej tyaj tyuꞌtáchuiicaj ɨ Dios tɨ tyúꞌtaahuacaꞌ

¹ ¡Alelúuyaj! Néijmiꞌi nu ɨ nyaj júuricamej jɨn tyaatatyójtziꞌreꞌej ɨ Tavástaraꞌ.

² Nyáaj nu tyeꞌtyóotziꞌreꞌej naꞌmej ɨ Tavástaraꞌ nyatɨꞌɨj nyooj júurij; nyetyiꞌchuíicaj nu naꞌmej ɨ Dios jimi nyatɨꞌɨj nyooj séjreꞌej.

³ Caxu aꞌɨ́ɨjma jitze tyíꞌcaꞌnyej ɨ tyétyacaa maj jéehua juxɨeꞌveꞌ, aꞌɨ́ɨjma jimi ɨ tyeɨ́tyee maj quee pújoorej maj séej japua huatányuunyij,

⁴ jiꞌnye tɨpuaꞌaj meríj huácuiꞌnyij chuéj mu majtáhuaꞌaj huatyóotaahuaj, aꞌɨ́j puꞌuj tánaꞌaj xɨcáaraꞌ jitze tyeꞌentyipuáꞌrij ɨ maj jɨn tyíꞌmuarɨeꞌcaꞌaj.

⁵ Cheꞌ jutyamuaꞌveꞌej ɨ tɨ jaꞌancuriáaꞌvej tɨ ɨ Dios raꞌ ɨ Jacob jaatáhuɨɨreꞌen, aꞌɨ́jna ɨ tɨ tyiꞌijchóꞌveꞌej ɨ Tavástaraꞌ jimi tɨ Dios raꞌ pueꞌéen.

⁶ Aꞌɨ́ɨ pu jaatyátaahuacaꞌ ɨ tajapuá tɨ séejreꞌ, ɨ cháanacaj ajta ɨ jájrij, ajta néijmiꞌi aꞌɨ́j tɨ jitze tyíꞌsejreꞌ. Aꞌɨ́ɨ pu aꞌnáj tɨnaꞌaj jaꞌráꞌastee ɨ junyúucaa

⁷ Tyámuaꞌ pu tyíꞌuurej aꞌɨ́ɨjma jimi ɨ maj quee jeꞌej jájtyoovej ajta tyihuoꞌtáꞌsij ɨ cueꞌráj aꞌɨ́ɨjma ɨ maj tajcuj. Tavástaraꞌ pu huiꞌrátoosij aꞌɨ́ɨjma ɨ maj námiꞌ,

⁸ Tavástaraꞌ pu huaꞌtanyéjnyeꞌrityee aꞌɨ́ɨjma ɨ maj aracúcuꞌnyijmee; Tavástaraꞌ pu huaꞌaj jaꞌpuanaj ɨ maj meríj eetavátzɨj, Tavástaraꞌ pu huaꞌxɨeꞌveꞌ ɨ tyeɨ́tyee maj tyámuaꞌ tyíꞌtyesejreꞌ,

⁹ Tavástaraꞌ pu huáꞌchaꞌɨj aꞌɨ́ɨjma ɨ maj séej chuéj japua jáꞌmaꞌcan ajta huáꞌchaꞌɨj aꞌɨ́ɨjma ɨ xáꞌrɨcaanyij ajta ɨ úucaa maj antyúujɨɨmuaꞌastariacaꞌ, ajta huojoꞌhuaꞌnaj ɨ juyéj jitze aꞌɨ́ɨjma ɨ maj jeꞌej puaꞌaj tyityetyúuchaꞌɨj.

¹⁰ Muaꞌaj mu siaj Sión jaꞌchej, Tavástaraꞌ pu jusén jɨmeꞌ tyiꞌíitaj jaꞌmej, ajta ɨ jaꞌmua Dios pu ajta jusén jɨmeꞌ séeriaꞌaj jaꞌmej. ¡Alelúuyaj!