SALMOS 145 - El Nuevo Testamento y Salmos

Micheꞌ néijmiꞌi ɨ tyeɨ́tyee tyaatatyójtziꞌreꞌen ɨ Tavástaraꞌ

Jeꞌej tɨ tyuꞌtáchuiicacaꞌ aꞌɨ́jna ɨ David

¹ Aꞌɨ́j nu huataxájta jeꞌej paj vaꞌcán jɨn tyíꞌijta, nyaj Dios pajta nyaj rey; aꞌnáj tɨnaꞌaj nu tyámuaꞌ tyeetyátoosij ɨ paj jɨn ántyapuaj.

² Tɨꞌɨj púnaꞌaj nu tyiꞌmuatyóotziꞌreꞌej naꞌmej, nyajta muéetzij jitze maꞌcan aꞌnáj tɨnaꞌaj tyiꞌchuíicaj naꞌmej.

³ Vaꞌcán pu jɨn tyiꞌtyéjvee ɨ Tavástaraꞌ ajta jimi aꞌyan tyiꞌtyéevijtɨj tyaj tyuꞌtáchuiicaj, jéetzeꞌ pu vaꞌcán jɨn antyúumuaꞌreej quee ɨ tyaj jɨn tyojóꞌitej.

⁴ Ɨ huaꞌ huásimuaꞌ majta ɨ tɨꞌríij aꞌɨ́ɨ mu tyámuaꞌ tyuꞌtyátoosij muáaj paj tyúꞌtaahuacaꞌ, aꞌɨ́j mu xáataj muáꞌjuꞌun jeꞌej paj muáaj tyiꞌtɨ́j vaꞌcan tyúꞌtaahuacaꞌ.

⁵ Aꞌɨ́j mu xáataj muáꞌjuꞌun ɨ tɨ naa huaséꞌrin muáaj paj jɨn ajtyíamuaꞌreej, nyajta nyáaj aꞌɨ́j nu jitze tyíꞌnyamuaꞌtziityeꞌen ɨ tɨ naa tyuꞌséꞌrin muáaj paj tyúꞌtaahuacaꞌ.

⁶ Aꞌɨ́j mu tyiꞌxáataj muáꞌjuꞌun muáaj paj tyúꞌtaahuacaꞌ ɨ paj néijmiꞌ jɨn putyiꞌuurej tɨ huápuɨꞌɨj tyéꞌtyesiꞌreꞌ, nyajta nyáaj aꞌɨ́j nu huataxájta ɨ paj vaꞌcán jɨn tyiꞌtyéjvee.

⁷ Aꞌɨ́j mu xáataj muáꞌjuꞌun paj huápuɨꞌɨj naa tyíꞌtyevij, majta jutyámuaꞌveꞌej mejíihuaj aꞌyan metyiꞌxáataj muáꞌjuꞌun paj jɨꞌréenyeꞌej séejreꞌ.

⁸ Tavástaraꞌ pu naa tyihuojóꞌmuaꞌraj ajta tyihuaꞌcuꞌvej, capu jiyeꞌtzín tyoꞌcájaaxɨejveꞌ ajta jéehua taxɨeꞌveꞌ.

⁹ Tavástaraꞌ pu jɨꞌréenyaꞌaj séejreꞌ néijmiꞌcaa jimi, ajta tyámuaꞌ naa tyíꞌchaꞌɨj ɨ tɨ tyúꞌtaahuacaꞌ.

¹⁰ ¡Micheꞌ tyimuaatatyójtziꞌreꞌen, Tavástaraꞌ, tyiꞌtɨ́j paj muáaj tyúꞌtaahuacaꞌ! ¡Micheꞌ aꞌɨ́ɨmaj tyimuaatatyójtziꞌreꞌen ɨ maj aꞌ jimi tyámuaꞌ een!

¹¹ ¡Micheꞌ aꞌɨ́j huataxáj ɨ tɨ huápuɨꞌɨj naa huaséꞌrin aꞌɨ́jna ɨ paj jɨn tyíꞌijta! ¡Micheꞌ aꞌɨ́j huataxáj ɨ tɨ quee aꞌtɨ́j aꞌyan tyeeyíꞌtɨn tɨ aꞌyan tyuꞌmuárɨeꞌen!

¹² ¡Micheꞌ ɨ tyeɨ́tyee jáamuaꞌreej paj muáaj néijmiꞌi putyíꞌuurej ajta ɨ tɨ vaꞌtɨ́j séejreꞌ aꞌɨ́jna ɨ paj jɨn tyíꞌijta!

¹³ Aꞌɨ́jna ɨ paj jɨn tyíꞌijta aꞌɨ́j paj jɨn jusén tyuꞌtaꞌíjtaj, ajta ɨ paj jɨn antyíaꞌmuaꞌreej jusén jɨmeꞌ pu séeriaꞌaj jaꞌmej.

¹⁴ Tavástaraꞌ pu huoꞌtyácajtyeꞌsij aꞌɨ́ɨjma ɨ maj eetávitzej ajta huaꞌaj jaꞌpuanaj aꞌɨ́ɨjma ɨ maj quee uhuácacaꞌnyeꞌ.

¹⁵ Néijmiꞌi mu muéetzij jitze rányejnyeꞌ majta aꞌ jimi tyiꞌijchóꞌveꞌ paj muáaj tyihuoꞌtáꞌan ɨ tɨ tyíꞌcueꞌriꞌ aꞌnáj tɨ aꞌyan tyíꞌxaꞌpuɨꞌɨn.

¹⁶ Muáaj paj huataméjcaꞌtaj, pajta aꞌɨ́jcɨ jɨmeꞌ axɨeꞌviꞌraꞌ jɨn tyámuaꞌ tyihuoꞌtyátoosij aꞌɨ́ɨjma ɨ maj júurij.

¹⁷ Tavástaraꞌ pu tyámuaꞌ een ɨ ju juyéj jitze, ajta jéehua tyámuaꞌ tyíꞌuurej jeꞌej tɨ aꞌɨ́ɨn tyíꞌtaxɨeꞌveꞌ.

¹⁸ Tavástaraꞌ pu véjriꞌ séejreꞌ aꞌɨ́ɨjma jimi ɨ maj jimi jahuoo, aꞌɨ́ɨjma jimi ɨ maj tzáahuatyiꞌraꞌaj jɨn jahuoo.

¹⁹ Aꞌɨ́ɨ pu aꞌyan rɨnyij jeꞌej maj tyáꞌxɨeꞌveꞌ ɨ maj tzáahuatyiꞌraꞌaj jimi tyíchaꞌɨj; matɨꞌɨjta jahuaviiraj tɨ huoꞌtáhuɨɨreꞌen, aꞌɨ́ɨ pu huáꞌnamuaj ajta huaꞌ japua huatányuusij.

²⁰ Tavástaraꞌ pu huáꞌchaꞌɨj aꞌɨ́ɨjma ɨ maj jaxɨeꞌveꞌ, ajta huaꞌantyipuaꞌrityeꞌsij aꞌɨ́ɨjma ɨ maj jeꞌej puaꞌaj tyityetyúuchaꞌɨj.

²¹ ¡Cheꞌ ɨ nye tyenyij tyaatatyójtziꞌreꞌen ɨ Tavástaraꞌ! ¡Micheꞌ néijmiꞌi tyámuaꞌ tyeetyátoonyij jeꞌej tɨ aꞌɨ́ɨn ántyapuaj, ijíij majta jusén jɨmeꞌ!