SALMOS 142 - El Nuevo Testamento y Salmos

Muáaj paj aꞌɨ́ɨn puéꞌeen ɨ nyaj jitzán huatyényahuɨɨreꞌej

Jeꞌej tɨ tyihuoꞌmuáꞌtyej ajta jeꞌej tɨ tyuꞌtyéenyuj aꞌɨ́jna ɨ David, tɨꞌɨj tyástaꞌnaj jitze jeꞌrácatyii

¹ Caꞌnyíin nu jɨn jahuoo ɨ Tavástaraꞌ jimi, caꞌnyíin nu jɨn jahuaviij tɨꞌij aꞌɨ́ɨn náꞌancuꞌvaxɨꞌ.

² Aꞌɨ́j nu jimi jaataséjrataj tyiꞌtɨ́j nyaj jɨn nyenyuusteꞌ, aꞌɨ́j nu jimi jaataséjrataj tyiꞌtɨ́j nyaj jɨn jeꞌej tyéꞌnyamuaꞌtzej

³ nyatɨꞌɨjta huápuɨꞌɨj quee jeꞌej tyéejtyooveꞌen. Tavástaraꞌ, muáaj paj jamuaꞌtyej ɨ nyaj juyéj, aꞌɨ́jcɨ ɨ juyéj nyaj jitzán huaméj, aꞌáa mu tyiꞌtɨ́j tyámuaꞌ jóꞌruuj mej mij naatyéeviꞌ.

⁴ Nyajta aꞌáa jóonyeerij aꞌ nyamuácaꞌtaꞌ pujmuaꞌ ajta quee aꞌtɨ́j ajaꞌveꞌmej tɨꞌij naatáhuɨɨreꞌen. ¡Capu maꞌ aꞌtɨ́j tɨꞌij nyajapuáj huatányuunyij! ¡Capu maꞌ aꞌtɨ́j nyej nyáaj jitzán juxɨéꞌvaꞌaj!

⁵ Muéetzij jimi nu huatyényuusij, Tavástaraꞌ, Aꞌyaa nu nyij tyíꞌmuaꞌixaatyeꞌ tɨjɨn: “Muáaj paj aꞌɨ́ɨn puéꞌeen ɨ nyaj jitzán huatyényahuɨɨreꞌej; muáaj papuꞌuj aꞌɨ́ɨn puéꞌeen ɨ tɨ nye jimi séejreꞌ ijíij nyej nyooj júurij.”

⁶ Huánamuajriꞌ jeꞌej nyaj aꞌjimi tyáꞌhuoo, jiꞌnye canu cheꞌ nyacaꞌnyej yényesejreꞌ, Nyajapuáj paj huatányuunyij aꞌɨ́ɨjma jimi ɨ maj nyamuarityeꞌ, jiꞌnye jéetzeꞌ mu aꞌɨ́ɨmaj uhuácacaꞌnyeꞌ nyequee nyáaj.

⁷ Pataꞌaj nɨiꞌrátoonyij aꞌyújna jóꞌnyaj jeꞌtyánamiꞌ nyataꞌaj nyij nyáaj tyimuaatatyójtziꞌreꞌen. Aꞌɨ́ɨ mu mij nyej jimi atahuíistɨraꞌaj ɨ tyeɨ́tyee maj quee tyiꞌtɨ́j jɨn áꞌɨtzeereꞌ tɨpuaꞌaj períj muáaj tyámuaꞌ tyinaatyátoonyij.