SALMOS 141 - El Nuevo Testamento y Salmos

Nyáaj nu muéetzij jitze rányeej

Chuíicarij David tɨ jaꞌaꞌrij

¹ Muéetzij jimi nu huatyényuusij, Tavástaraꞌ, ¡jiyeꞌtzín paj mujoꞌvéꞌmeꞌen!, ¡huánamuajriꞌ ɨ nyenyúucaa nyatɨꞌɨjta muéetzij jimi huatyényuunyij!

² Cheꞌ aꞌyan eenyeꞌ ɨ nyaj jɨn huatyényuusij a jimi tɨꞌɨj ɨ ɨ́ɨjcua, ajta ɨ nyaj aꞌ jimi ajméjcaꞌtaxɨꞌɨn, aꞌyájna tɨꞌɨj chúmuaꞌ maj aꞌjimi tyuꞌtámuꞌvejritaj.

³ Tavástaraꞌ, muáaj paj tyámuaꞌ tyéechaꞌɨɨn jeꞌej nyaj tyuꞌtaxájtaj; tyámuaꞌ paj tyináachaꞌɨɨn nyatɨꞌɨjta tyíꞌxajtaj.

⁴ Capáj tyiꞌtáꞌcareꞌen nyej nyij aꞌɨ́j jitze tyiꞌriáꞌmuaꞌsimeꞌen ɨ tɨ quee xáꞌpuɨꞌ, capáj tyiꞌtáꞌcareꞌen nyej nyij jeꞌej puaꞌaj tyiꞌtyínyechaꞌɨɨj nusu nyej nyij aꞌɨ́ɨjma jamuán tyíꞌcuaꞌajcaj ɨ maj jeꞌej puaꞌaj tyityetyúuchaꞌɨj.

⁵ Aꞌyaa pu tyíꞌxaꞌpuɨꞌ tɨ puéjtzij naataꞌan aꞌɨ́jna ɨ tyévij tɨ tyámuaꞌ tyiꞌtyúuchaꞌɨj, cheꞌ ajta ɨ tɨ naa curiáꞌrɨeꞌ nyejtyaꞌxɨꞌɨn. Néijmiꞌi nu aꞌɨ́j tyaꞌancuriáaꞌsij, tyij ajta nye jimi jeꞌej puaꞌaj tyíꞌrɨjcaa, muéetzij jimi nu huatyényuusij.

⁶ Aꞌɨ́ɨmaj ɨ maj tyihuáꞌijtyeꞌ ɨ maj jeꞌej puaꞌaj rɨcɨj aꞌɨ́ɨjma mu puéjtzij huoꞌtáꞌsij, majta jeꞌen jaséjran nyej nyáaj tyámuaꞌ eenyeꞌ tyíꞌxajtacaꞌaj.

⁷ Tyihuáꞌcarij pu aꞌáa tyojoꞌjeꞌestɨ́maꞌaj jaꞌmej joꞌmaj tyityajáꞌavaꞌtacaa, aꞌyájna tɨꞌɨj chóotaꞌ maj metyoꞌíichaꞌajraꞌnyij.

⁸ Tavástaraꞌ, Tavástaraꞌ, nyáaj nu muéetzij jitze rányeej. Muéetzij jimi nu jahuoo paj naatyáhuɨɨreꞌen: capáj manúujɨpuan.

⁹ Pajta nyajapuáj huatányuunyij tyiꞌtɨ́j maj jɨn jaxɨeꞌveꞌ maj náacuanamuaj; pajta nyajapuáj huatányuunyij aꞌɨ́ɨjma jimi ɨ maj jeꞌej puaꞌaj tyityetyúuchaꞌɨj.

¹⁰ Micheꞌ aꞌɨ́ɨmaj aꞌɨ́jna jɨn huavíviꞌriꞌhuaj ɨ maj tyámuaꞌ jáaruuj, ajta nyáaj nyicheꞌ nyooj huameꞌen.