SALMOS 140 - El Nuevo Testamento y Salmos

Jeꞌej tyaj tyityeetyényuunyij tɨꞌij ɨ Dios taatyáhuɨɨreꞌen

Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj. Chuíicarij David tɨ jaꞌaꞌrij

¹ Tavástaraꞌ, pataꞌaj nyajapuáj huatányuunyij aꞌɨ́ɨjma jimi ɨ maj jeꞌej puaꞌaj tyityetyúuchaꞌɨj; pajta naatyéchaꞌɨɨn aꞌɨ́ɨjma jimi ɨ maj ucóonyoꞌseꞌveꞌ,

² aꞌɨ́ɨjma jimi ɨ maj tyámuaꞌ juꞌuurej mej mij tyiꞌtɨ́j jeꞌej puaꞌaj huáꞌuurej majta aꞌnáj tɨnaꞌaj junyoꞌsiꞌtyeꞌej.

³ Huaꞌ nyanúu pu antyipityíijmee, aꞌyájna tɨꞌɨj ɨ cúꞌcuꞌuj tyíꞌnyanuu, ajta ɨ maj jɨn tyíꞌxaj aꞌyaa pu een tɨꞌɨj ɨ cúꞌcuꞌuj tyiꞌhuaꞌveꞌrij.

⁴ Tavástaraꞌ, náachaꞌɨj aꞌɨ́ɨjma jimi ɨ maj jeꞌej puaꞌaj rɨcɨj, náachaꞌɨj aꞌɨ́ɨjma jimi ɨ maj junyoꞌsiꞌtyeꞌej, ɨ maj tyiꞌtɨ́j jeꞌej tyíꞌxaꞌpuɨꞌɨntareꞌ nyej nyij nyáaj eeriáꞌɨtzen.

⁵ Aꞌɨ́ɨmaj ɨ maj óotzaahuatyeꞌ aꞌɨ́ɨ mu tyiꞌtɨ́j jɨn nyacuanamuaj, majta meríj tyámuaꞌ tyúꞌruuj ɨ maj jɨn naatyéeviꞌ majta jeꞌen naatyájɨꞌqueꞌen, aꞌáa mu meríj tyámuaꞌ jaꞌhuooruj jóꞌnyaj joꞌréꞌnyinyiij.

⁶ Aꞌyaa nu nyeríj tyaatéꞌexaa ɨ Tavástaraꞌ tɨjɨn: “Muáaj paj nyaj Dios puéꞌeen, ¡náanamuajriꞌ, jeꞌej nyej nyáaj aꞌ jimi jéehua tyáꞌhuoo!

⁷ Tavástaraꞌ, Tavástaraꞌ, nyaj japua paj huatányuunyij mu paj néijmiꞌi jɨn antyíaꞌmuaꞌreej, muáaj paj jachaꞌɨj ɨ nyaj muꞌuj aꞌájna joꞌmaj jáꞌnyoꞌseꞌ.”

^8-9 Tavástaraꞌ, capáj tyiꞌtáꞌcareꞌen tɨꞌij aꞌyan tyáꞌraꞌnyij jeꞌej tɨ aꞌɨ́ɨn tyáꞌxɨeꞌveꞌ ɨ tɨ jeꞌej puaꞌaj rɨcɨj; capáj tyiꞌtáꞌcareꞌen tɨ aꞌyan atyojoꞌréꞌnyinyiicaꞌan jeꞌej tɨ arí aꞌɨ́ɨn tyaaxáꞌpuɨꞌɨntarej. Aꞌɨ́ɨmaj ɨ maj nyájnaamuaj aꞌɨ́ɨ mu nye jimi eecámuꞌvajra, cheꞌ aꞌɨ́ɨjma japua rájvetyij ɨ maj jɨn jaxɨeꞌveꞌ mej mij nyéetzij jeꞌej puaꞌaj náaꞌuurej.

¹⁰ Cheꞌ aꞌɨ́ɨjma japua rávatzɨj ɨ tɨꞌɨxcuáa tɨ aꞌtáatɨmee, micheꞌ aꞌáa huajaꞌtyáhuaꞌxɨj joꞌtɨj jaꞌtyácucuꞌun, joꞌmaj quee cheꞌ aꞌnáj jeꞌtácɨɨnyij.

¹¹ Cheꞌ quee aꞌyan séjreꞌej ɨ cháanacaj japua aꞌɨ́jna ɨ tɨ tyíꞌhueꞌtacaa, cheꞌ ɨ tɨ jeꞌej puaꞌaj een jaatamuárityeꞌen aꞌɨ́jcɨ ɨ tɨ ucóonyoꞌseꞌveꞌ ajta jeꞌen joꞌpuáꞌrityeꞌen.

¹² Nyáaj nu jamuaꞌreej tɨ ɨ Tavástaraꞌ jáꞌxaꞌpuɨꞌɨntariꞌtzeꞌen aꞌɨ́jcɨ ɨ tɨquee jeꞌej tyéejviicueꞌ ajta japuan huatányuusij aꞌɨ́jcɨ ɨ tɨ quee jeꞌej jájtyoovej.

¹³ Aꞌɨ́ɨmaj mu ɨ tyétyacaa maj tyámuaꞌ tyityetyúuchaꞌɨj tyimuaatatyójtziꞌreꞌej; ¡majta a jimi júurij muáꞌjuꞌun ɨ tyeɨ́tyee maj tyámuaꞌ tyityaajúꞌ!