SALMOS 138 - El Nuevo Testamento y Salmos

Jeꞌej tyaj tyityeetyényuunyij ɨ Tavástaraꞌ jimi tyej tyij tyaatatyójtziꞌreꞌen

David tɨ jaꞌaꞌrij

¹ Nyetyimuatatyójtziꞌreꞌej, Tavástaraꞌ, néijmiꞌi ɨ nyaxɨéjnyuꞌcaa jɨmeꞌ; nyajta muéetzij jimi tyuꞌtáchuiicaj aꞌɨ́ɨmaj metyiꞌséeracaj ɨ maj muéetzij muahuɨɨreꞌ.

² Aꞌáa nu pujmuaꞌ jaꞌajtunutaj joꞌtɨj joꞌtyéjvee aꞌ tyeyúuj nyej nyij tyimuaatatyójtziꞌreꞌen aꞌɨ́jcɨ jɨmeꞌ paj nyaxɨeꞌveꞌ ajta ɨ tɨ muéetzij jimi jɨꞌréꞌcan jɨmeꞌ, jiꞌnye muáaj paj jaataséjratacaꞌ ɨ paj jɨn ántyapuaj pajta aꞌnyúucaa néijmiꞌqueꞌ tɨꞌɨj naꞌaj puaꞌmáj tyíꞌsejreꞌ.

³ Nyatɨꞌɨj muéetzij jimi huatyéenyuj, muáaj paj náanamuajriꞌ, pajta jéetzeꞌ caꞌnyíjraꞌaj naatáꞌ.

⁴ Néijmiꞌi mu tyimuaatatyójtziꞌreꞌej aꞌɨ́ɨmaj ɨ maj tyíꞌijta ɨ cháanacaj japua matɨꞌɨj jáanamuaj tyiꞌtɨ́j paj jɨn tyaꞌtáꞌratziiriꞌ.

⁵ Aꞌɨ́ɨ mu tyaatatyójtziꞌreꞌej ɨ Tavástaraꞌ aꞌɨ́jcɨ jɨmeꞌ jeꞌej tɨ aꞌɨ́ɨn tyuꞌtaꞌíjtacaꞌ, jiꞌnye vaꞌtɨ́j pu séejreꞌ ɨ Tavástaraꞌ tɨ jɨn naa huaséꞌrin.

⁶ Tyij ajta ɨ Tavástaraꞌ jútyeꞌ ɨmuáj jáꞌsejreꞌ, aꞌɨ́j pu jitze rányeej ɨ tyévij tɨ quee óotzaahuatyeꞌ, ajta aꞌɨmuáj jáꞌsejreꞌ aꞌɨ́ɨjma jimi ɨ maj óotzaahuatyeꞌ.

⁷ Tɨꞌɨjta jeꞌej puaꞌaj nye jimi tyíꞌrɨjcaj, muáaj paj nyechaꞌɨɨj puáꞌmej nyej nyij nyooj júurij; muáaj paj uyoꞌtaꞌítyij ɨ paj jɨn néijmiꞌi putyíꞌuurej pajta nyajapuáj huatányuusij aꞌɨ́jcɨ jimi ɨ maj jɨn nyajaaxɨejviꞌ aꞌɨ́ɨmaj ɨ maj nyéjchaꞌɨɨreꞌ.

⁸ ¡Tavástaraꞌ pu néijmiꞌi jɨn tyámuaꞌ tyíꞌuurej tyiꞌtɨ́j tɨ arí nye jimi aꞌyan tyuꞌtaxájtacaꞌ! Tavástaraꞌ, jusén jɨmeꞌ pu séejreꞌ ɨ paj jɨn taxɨeꞌveꞌ; ¡capáj jataxáꞌhuataꞌan tyiꞌtɨ́j paj períj jɨn uhuatyéꞌchej!