SALMOS 137 - El Nuevo Testamento y Salmos

Véjriꞌ aꞌájna ɨ játyaꞌnaj jitze tɨ aꞌyan ántyapuaj tɨjɨn Babilonia

¹ Aꞌáa tu véjriꞌ jaꞌajtyequeetɨmaꞌaj ɨ játyaꞌnaj jitze aꞌáa tyejeꞌejtyámaꞌcan a tɨ aꞌyan tyajaꞌrájtyapuaj tɨjɨn Babilonia tyátayiinyacaꞌaj tyatɨꞌɨjtá aꞌɨ́j ootámuaꞌreej ɨ Sión.

² Tyajta aꞌɨ́jcɨ jitze ɨ tɨ huáꞌuuj álamo tɨ huatóomuaꞌaj aꞌáa tɨ jaꞌreꞌvej aꞌchájtaꞌ aꞌɨ́j tu jitze antyajaꞌcávihuaaj ɨ tyíꞌtacanaaj.

³ Aꞌájna, aꞌɨ́ɨmaj ɨ maj aꞌáa tojoꞌjájpua mataavíviꞌraj, aꞌɨ́ɨmaj ɨ maj néijmiꞌi tyituꞌhuáariꞌriꞌ, aꞌɨ́ɨ mu tahuaviiracaꞌaj tyej tyij tatyámuaꞌveꞌej tyetyuꞌtáchuiicaj, ¡tyej tyij aꞌɨ́j tyuꞌtáchuiicaj ɨ chuíicarij aꞌáa tɨ tyajáꞌmaꞌcan a Sión!

⁴ ¿Nyi ityáj tyetyuꞌtáchuiicaj ɨ Tavástaraꞌ tyiꞌchuiicarij aꞌɨ́jcɨ japua ɨ chuéj joꞌmaj jeꞌej puaꞌaj jáꞌrɨcɨj?

⁵ ¡Tɨpuaꞌaj muéetzij nyamojoꞌhuaꞌxɨn, Jerusalén, cheꞌ ɨ nyamuácaꞌ huatyáahuaj ɨ nyamuácaꞌtaꞌ tɨ pujmuaꞌ!

⁶ ¡Cheꞌ ɨ nyenyanúu aráviꞌtaxɨꞌɨn yujtyí pujmuaꞌ tɨpuaꞌaj nye quee muéetzij moꞌtámuaꞌree, tɨpuaꞌaj pequee muáaj Jerusalén aꞌɨ́ɨn puéꞌeenyeꞌ ɨ nyaj jɨn jéehua nyetyamuaꞌveꞌ!

⁷ Tavástaraꞌ, huoꞌtámuaꞌree aꞌɨ́ɨjma ɨ maj aꞌyan huaꞌtamuáꞌmuaj tɨjɨn edomitas, aꞌájna matɨꞌɨj huatyéenyoꞌsej ɨ Jerusalén maj jaꞌchej, aꞌɨ́ɨ mu aꞌyan tyíꞌxajtacaꞌaj tɨjɨn: “¡Xaatyúꞌuunaj, siajta xu néijmiꞌi huatyúꞌuunaj ɨ tɨ atátaavijhuaj ɨ chájtaꞌnaj jitze!”

⁸ ¡Muáaj, Babilonia, muáaj paj huatyúꞌuunyiꞌhuaj! ¡Cheꞌ huatóotyamuaꞌveꞌen aꞌɨ́jna ɨ tɨ muaꞌantyipuáꞌrityeꞌsij jiꞌnye muáaj paj tyojoꞌrɨej!

⁹ ¡Cheꞌ huatóotyamuaꞌveꞌen aꞌɨ́jna ɨ tɨ huaꞌviviꞌran ɨ aꞌtɨꞌríiramuaꞌ ajta jeꞌen huoꞌtyátzaanaxɨꞌɨn ɨ tyetyéj japua!