SALMOS 136 - El Nuevo Testamento y Salmos

Ɨ Dios tɨ jusén jɨmeꞌ huaꞌxɨeꞌveꞌ aꞌɨ́ɨjma ɨ maj Israel jitze ajtyámaꞌcan

¹ Setyuꞌtatyójtziꞌreꞌ ɨ Tavástaraꞌ, jiꞌnye aꞌɨ́ɨ pu tyámuaꞌ een, jiꞌnye capu aꞌnáj antyipuaꞌrij ɨ tɨ jɨn taxɨeꞌveꞌ.

² Setyuꞌtatyójtziꞌreꞌ ɨ Dios tɨ néijmiꞌcaa tyíꞌijtyeꞌ ɨ dioosij, jiꞌnye capu aꞌnáj antyipuaꞌrij ɨ tɨ jɨn taxɨeꞌveꞌ.

³ Setyuꞌtatyójtziꞌreꞌ ɨ huaꞌ Vástaraꞌ ɨ maj tyiꞌtɨ́j jɨn tyityetyuꞌuj, jiꞌnye capu aꞌnáj antyipuaꞌrij ɨ tɨ jɨn taxɨeꞌveꞌ.

⁴ Aꞌɨ́jcɨ ɨ tɨ aꞌɨ́ɨ naꞌaj vaꞌcán jɨmeꞌ tyámuaꞌ tyíꞌuurej, jiꞌnye capu aꞌnáj antyipuaꞌrij ɨ tɨ jɨn taxɨeꞌveꞌ.

⁵ Aꞌɨ́jna ɨ tɨ jaatyátaahuacaꞌ ɨ tajapuá tɨ séejreꞌ aꞌɨ́jcɨ jɨmeꞌ ɨ tɨ jéehua tyuꞌyíꞌtɨn, jiꞌnye capu aꞌnáj antyipuaꞌrij ɨ tɨ jɨn taxɨeꞌveꞌ.

⁶ Aꞌɨ́jcɨ ɨ tɨ tyámuaꞌ jáaruuj ɨ chuéj ɨ jájtyij japua, jiꞌnye capu aꞌnáj antyipuaꞌrij ɨ tɨ jɨn taxɨeꞌveꞌ.

⁷ Aꞌɨ́jcɨ ɨ tɨ jaatyátaahuacaꞌ ɨ xɨcáj ajta ɨ máxcɨrɨeꞌ, jiꞌnye capu aꞌnáj antyipuaꞌrij ɨ tɨ jɨn taxɨeꞌveꞌ:

⁸ ɨ xɨcáj, tɨꞌij tújca jɨn huányeeriꞌcɨj, jiꞌnye capu aꞌnáj antyipuaꞌrij ɨ tɨ jɨn taxɨeꞌveꞌ,

⁹ ɨ máxcɨrɨeꞌ ajta ɨ xúꞌraꞌvetyee, mej mij tɨ́caꞌ jɨn huányeeriꞌcɨj, jiꞌnye capu aꞌnáj antyipuaꞌrij ɨ tɨ jɨn taxɨeꞌveꞌ.

¹⁰ Aꞌɨ́jna ɨ tɨ tyaapuéj ɨ huaꞌyoj tɨ anaquéej huanɨeꞌhuacaꞌ aꞌáa maj jáꞌchajcaꞌaj a Egipto, jiꞌnye capu aꞌnáj antyipuaꞌrij ɨ tɨ jɨn taxɨeꞌveꞌ.

¹¹ Aꞌɨ́jna ɨ tɨ huiꞌrájtoj aꞌɨ́ɨjma ɨ maj Israel jitze ajtyámaꞌcan aꞌájna a Egipto, jiꞌnye capu aꞌnáj antyipuaꞌrij ɨ tɨ jɨn taxɨeꞌveꞌ;

¹² aꞌɨ́jcɨ jɨmeꞌ tɨ huataméjcaꞌtacaꞌ ɨ jumuácaꞌ jɨmeꞌ tɨ néijmiꞌi jɨn putyíꞌuurej, jiꞌnye capu aꞌnáj antyipuaꞌrij ɨ tɨ jɨn taxɨeꞌveꞌ.

¹³ Aꞌɨ́jna ɨ tɨ huaꞌpuaquéj jájsɨɨ ɨ jájrij tɨ poꞌvij, jiꞌnye capu aꞌnáj antyipuaꞌrij ɨ tɨ jɨn taxɨeꞌveꞌ.

¹⁴ Aꞌɨ́jna ɨ tɨ huoꞌtaꞌ maj antácɨɨnyej ɨ jájritzeꞌ aꞌɨ́ɨmaj ɨ maj Israel jitze ajtyámaꞌcan, jiꞌnye capu aꞌnáj antyipuaꞌrij ɨ tɨ jɨn taxɨeꞌveꞌ.

¹⁵ Aꞌɨ́jna ɨ tɨ jaꞌváꞌnaj a jájritzeꞌ tɨ poꞌvij aꞌɨ́jcɨ ɨ tɨ vaꞌcán jɨn tyíꞌijta aꞌájna a Egipto ajta ɨ xantáaruꞌustyamuaꞌmuaꞌ, jiꞌnye capu aꞌnáj antyipuaꞌrij ɨ tɨ jɨn taxɨeꞌveꞌ.

¹⁶ Aꞌɨ́jna ɨ tɨ jutyéɨtyeristyamuaꞌ joꞌvíꞌtɨj aꞌájna joꞌtɨj quee jáꞌtyiꞌtɨj, jiꞌnye capu aꞌnáj antyipuaꞌrij ɨ tɨ jɨn taxɨeꞌveꞌ.

¹⁷ Aꞌɨ́jna ɨ tɨ muiꞌcaa antyipuaꞌrityej ɨ maj vaꞌcán jɨn tyityetyúꞌuucaꞌaj rey jɨmeꞌ, jiꞌnye capu aꞌnáj antyipuaꞌrij ɨ tɨ jɨn taxɨeꞌveꞌ.

¹⁸ Aꞌɨ́jna ɨ tɨ huoꞌcuij ɨ maj rey jɨn tyityetyúꞌuucaꞌaj majta jéehua uhuácacaꞌnyeꞌej, jiꞌnye capu aꞌnáj antyipuaꞌrij ɨ tɨ jɨn taxɨeꞌveꞌ.

¹⁹ Aꞌɨ́jcɨ ɨ Sihón, rey tɨ jɨn tyiꞌtyávaacaꞌaj aꞌɨ́ɨjma jimi ɨ amorreo, jiꞌnye capu aꞌnáj antyipuaꞌrij ɨ tɨ jɨn taxɨeꞌveꞌ,

²⁰ aꞌɨ́jcɨ ɨ Og, rey tɨ jɨn tyiꞌtyávaacaꞌaj aꞌájna a Basán, jiꞌnye capu aꞌnáj antyipuaꞌrij ɨ tɨ jɨn taxɨeꞌveꞌ.

²¹ Aꞌɨ́jna ɨ chuéj tɨ huoꞌriáaꞌ ɨ rey maj tyiꞌtachuéjcaꞌaj, jiꞌnye capu aꞌnáj antyipuaꞌrij ɨ tɨ jɨn taxɨeꞌveꞌ,

²² ajta jeꞌen aꞌɨ́ɨjma tyuꞌtáꞌ mej mij aꞌɨ́ɨmaj tyaꞌancuriáan ɨ Israel maj jitze ajtyámaꞌcan, jiꞌnye capu aꞌnáj antyipuaꞌrij ɨ tɨ jɨn taxɨeꞌveꞌ.

²³ Aꞌɨ́jna ɨ tɨ taꞌtamuáꞌreꞌrii tyatɨꞌɨjtá áꞌviicueꞌriaꞌaj, jiꞌnye capu aꞌnáj antyipuaꞌrij ɨ tɨ jɨn taxɨeꞌveꞌ.

²⁴ Aꞌɨ́jna ɨ tɨ tajapuá huatányuusij aꞌɨ́ɨjma jimi ɨ maj tájchaꞌɨɨreꞌ, jiꞌnye capu aꞌnáj antyipuaꞌrij ɨ tɨ jɨn taxɨeꞌveꞌ.

²⁵ Aꞌɨ́jna ɨ tɨ tyihuáꞌcueꞌtyej ɨ tyeɨ́tyee ajta aꞌɨ́ɨjma ɨ tyiꞌtyán maj tyityaacɨ́ꞌɨj, jiꞌnye capu aꞌnáj antyipuaꞌrij ɨ tɨ jɨn taxɨeꞌveꞌ.

²⁶ ¡Setyuꞌtatyójtziꞌreꞌ ɨ Dios tajapuá tɨ jáꞌsejreꞌ, jiꞌnye capu aꞌnáj antyipuaꞌrij ɨ tɨ jɨn taxɨeꞌveꞌ!