SALMOS 122 - El Nuevo Testamento y Salmos

Jeꞌej maj tyaatáchuiicaj ɨ Jerusalén

Cuíinarij ɨ maj jɨn huatyáajuꞌun, David tɨ jaꞌaꞌrij

¹ ¡Jéehua nu huatányetyamuaꞌveꞌsij matɨꞌɨjta aꞌyan tyinaatéꞌexaatyeꞌen tɨjɨn: “Cheꞌréj aꞌájna joꞌtɨj joꞌtyéjvee ɨ tyeyúujraꞌ ɨ Tavástaraꞌ”!

² Jerusalén, ¡tuꞌríj utyájrupij aꞌájna joꞌtɨj jaꞌpueertaj!

³ Jerusalén, chájtaꞌnaj tɨ huatyátaavijhuacaꞌ mej mij néijmiꞌi aꞌáa jóosɨꞌrihuaꞌan aꞌáa maj joꞌcháatɨmee.

⁴ Aꞌáa mu jaꞌráꞌiixaj aꞌɨ́ɨmaj ɨ maj Tavástaraꞌ jitze ajtyámaꞌcan mej mij tyaatatyójtziꞌreꞌen ɨ tɨ jɨn ántyapuaj, aꞌyájna matɨꞌɨj tyihuoꞌtaꞌíj aꞌɨ́ɨjma ɨ maj Israel jitze ajtyámaꞌcan.

⁵ Aꞌáa pu jáꞌsejreꞌ joꞌmaj jeꞌráatyij ɨ maj tyámuaꞌ naa tyáꞌxaꞌpuɨꞌɨntareꞌ, joꞌmaj jeꞌráatyij ɨ maj tyáꞌxaꞌpuɨꞌɨntareꞌ aꞌájna joꞌtɨj ɨ David jaꞌchej.

⁶ Aꞌyaa xu muaꞌaj tyuꞌtaxáj néijmiꞌi ɨ juxɨéjnyuꞌcaa jɨmeꞌ tɨjɨn: “Cheꞌ tyámuaꞌ tyíꞌeenyeꞌ muéetzij jimi, Jerusalén; micheꞌ juxáahuaj huacháatɨmeꞌnyij aꞌɨ́ɨmaj ɨ maj muaxɨeꞌveꞌ.

⁷ Cheꞌ tyámuaꞌ tyíꞌeenyeꞌ aꞌɨ́jcɨ jitze ɨ paj jɨn curiáꞌnamiꞌ, majta tyámuaꞌ tyíꞌchaꞌɨɨj aꞌújna joꞌmaj jeꞌráatyij ɨ maj tyíꞌijta.”

⁸ Ajta ijíij, aꞌɨ́ɨjma jitze maꞌcan ɨ nyeꞌihuáamuaꞌ majta ɨ maj nyamuaꞌtyej aꞌyaa nu tyuꞌtaxájtaj tɨjɨn: “Cheꞌ néijmiꞌi tyámuaꞌ tyíꞌeenyeꞌ muéetzij jimi.

⁹ Aꞌɨ́jcɨ jitze maꞌcan ɨ tyeyúujraꞌ ɨ Tavástaraꞌ taj Dios aꞌɨj nu huoonyij ɨ tɨ tyámuaꞌ een muéetzij jimi.”