SALMOS 120 - El Nuevo Testamento y Salmos

Jeꞌej tyaj tyityeetyényuunyij aꞌɨ́jcɨ jɨmeꞌ tɨ jéehua jeꞌej puaꞌaj tyíꞌrɨcɨj

Cuíinarij ɨ maj jɨn huatyáajuꞌun

¹ Nyatɨꞌɨjta jeꞌej tyéꞌnyamuaꞌajcaj, Tavástaraꞌ jimi nu huatyényuusij, aꞌɨ́ɨ puꞌij naatájeevij.

² Tavástaraꞌ, nyajapuáj paj huatányuunyij aꞌɨ́ɨjma jimi ɨ maj tyíꞌhueꞌtacaa pajta aꞌɨ́jcɨ jimi ɨ nyanúrij tɨ hueꞌtzij jɨn tyíꞌxaj.

³ ¿Tyiꞌtanyí pajtáhuaꞌaj ancuriáaꞌsij, nyanúrij paj tyíꞌhueꞌtacaa?

⁴ ¡Ɨꞌrɨ́j tɨ huápuɨꞌɨj tyeꞌentyipityíijmee ɨ maj jɨn nyoꞌsii! ¡Ajta ɨ tɨꞌɨxcuáa tɨ huápuɨꞌɨj aꞌtáatɨmee!

⁵ ¡Cheꞌ jeꞌej tyíꞌnyahuɨɨreꞌej, nyaj aꞌyan aꞌyaa tyicheꞌ iiyeꞌej Mésec tɨꞌɨj ɨ tɨ séej chuéj japua jáꞌmaꞌcan nyajta aꞌáa jaꞌhuányechejtyej joꞌmaj aꞌɨ́ɨmaj tyojoꞌtyáꞌɨnaamuaa ɨ Quedar maj jitze ajtyámaꞌcan!

⁶ Nuꞌríj áꞌtyeej nyaj aꞌáa jaꞌchej aꞌɨ́ɨjma tzajtaꞌ ɨ maj quee jaxɨeꞌveꞌ maj juxáahuaj huacháatɨmeꞌnyij;

⁷ ¡nyatɨꞌɨjta nyáaj aꞌɨ́jna xajtaj tyaj taxáahuaj huacháatɨmeꞌnyij, aꞌɨ́ɨ mu aꞌɨ́j huataxájta jeꞌej maj tyityeetyényoꞌseꞌen!