Philip 2 - Bunongឞ្រាសក្រីស ញជុរអេងឆាក់ ជេសរីឆ៝ៈទើននាវច្រេកលើប 1 លាសខាន់អៃមៃលែៈឆ៝ៈទើនជេសនាវនហាវនូយ្សនហ៝ម់តាៈឞើសនាវគុនទ្រែលឞ្រាសក្រីស លាសលែៈគែសជេសនាវរ៝ង់ឞ្រាសក្រីស ឞ៝ញលែងខាន់អៃមៃ លាសឞ្រាសហ្វេងអ្វែសលែៈគុនទ្រែលខាន់អៃមៃ លាសឞ្រាសក្រីស លែៈយោៈនអាចខាន់អៃមៃ 2 លាសនទ្រីដាៈខាន់អៃមៃគែសនាវមឹនទូនតោរនាវ គែសនាវតឹមរ៝ង់ឞាល់ គែសនូយ្សនហ៝ម់ទូនតោរនាវ នទ្រែលមាគែសនាវមឹនង្វាយទើម។ លាសខាន់អៃមៃលែៈគែសទឹងលែៈនាវអីនៃ គ៝ប់រាម់មអាកងាន់។ 3 លើយអោសជាននទើមាជេងក្វ៝ង់ទើម លើយអោសជាននទើគៃមានហីអេងឆាក់នើម។ យើនមាអ៝ន់ញជុរអេងឆាក់នើម ជេសរីកើបឞូអេងក្វ៝ង់រាលាវមាឆាក់នើម។ 4 លើយអោសទូហ្វេទូហ្វេឆាក់មឹនមាឆាក់ពាង់នើមទើម អ៝ន់មឹនមាឞូនុយ្សអាអេងដ៝ង់។ 5 អ៝ន់មាខាន់អៃមៃគែសនូយ្សនហ៝ម់តឹមឞានមាឞ្រាសក្រីសយេឆូ ហ៝ៈ។ 6 ឞ៝លលាសឞ្រាសក្រីសយេឆូ តឹមឞានមាកោរាញឞ្រាសនើមងាន់កាដោយ ពាង់ក៝ៈមោអោសឆ៝ៈព្រាប់មាឆាក់ពាង់នើម នាវអីពាង់តឹមឞានមាកោរាញឞ្រាសអីនៃ។ 7 យើនមាពាង់មអារ់លើយនាវអីនៃ ជេសរីជេងតឹមឞានមាទឹកឞូ ពាង់ទែសជេងឞូនុយ្ស។ លែៈជេងឞូនុយ្សងាន់ 8 ពាង់ញជុរអេងឆាក់ពាង់នើម អ្យាត់ជានតឹងនាវកោរាញឞ្រាសដាៈ នហ៝មាត៝ត់ខឹតឆាក់។ រាលាវឞើសនៃជឹតនហ៝មាពាង់ទើននាវខឹតតាឆីតឹមរាកាង់អីដីតព្រេងតឹមឞានមាឞូនុយ្សទោយ្ស។ 9 កើតនទ្រីទឹងកោរាញឞ្រាសនហាវពាង់ទុតព្រេសកាលើ នអ៝ប់មាជានអ៝ន់ពាង់ក្វ៝ង់ រាលាវមាទឹងលែៈនទើជឹត 10 គៃមានោកតាង់រាញាឞ្រាសយេឆូ តៃ ទឹងលែៈនទើតាកាលើត្រោកនតុកកោរាញឞ្រាសនើម នអ៝ប់មាតានែសនតូ នអ៝ប់មាតាន៝ម់នែសនតូដ៝ង់ អ៝ន់លែវឞាល់ច៝នកោម៝ក់មឞាសពាង់ទាទេ។ 11 កោរាញឞ្រាសនហាវពាង់គៃមាអ៝ន់ទឹងលែៈឞ៝រ់មឞូងមឞើសលាស៖ ឞ្រាសយេឆូក្រីស ពាង់កោរាញ។ កើតនទ្រីរានេកោរាញឞ្រាសអីឞឹអ៝ន់នាវច្រេកលើបមាពាង់។ ផូងញឆីងមា ឞ្រាសក្រីស ជេងនាវអាងមានែសនតូ 12 អើផូងអីគ៝ប់រ៝ង់ ខាន់អៃមៃលែៈវៃអ្យាត់បាបើនាវគ៝ប់ដាៈ។ កើតនទ្រីអ៝ន់ខាន់អៃមៃអ្យាត់នាវគ៝ប់ដាៈតៃជឹតទោ មោអោសទើនមានោកគ៝ប់ហោមគុនទ្រែលទើម យើនមានោកគ៝ប់គុងាយកាដោយ។ អ៝ន់ខាន់អៃមៃហោមញឆ្រោយ្សគុរេសតឹមទីមានាវកោរាញឞ្រាសអុច នអ៝ប់មាក្លាចយើកពាង់។ នាវអីនៃជេងទីមាខាន់អៃមៃអីលែៈឆ៝ៈទើននាវរាក្លាយ្ស 13 យ៝រលាសកោរាញឞ្រាសនើមជានអ៝ន់មាខាន់អៃមៃគែសនូយ្សនហ៝ម់អុចជានតឹងនាវពាង់អុច នអ៝ប់មាអ៝ន់ខាន់អៃមៃទើយជានតឹងនាវពាង់អុចដ៝ង់។ 14 ទឹងលែៈនទើខាន់អៃមៃជាន លើយអោសអ៝ក់ឞ៝រ់ញជ៝រ់ឆេក មោលាសគែសនាវរាលាច់ 15 គៃមាអ៝ន់ខាន់អៃមៃជេងលែៈអ្វែសទីកែស មោគែសនាវមានទុយ្ស លែៈជេងក្ល៝ស ជេងក៝នកោរាញឞ្រាសនើមងាន់ ឞ៝លលាសខាន់អៃមៃគុនទ្រែលឞូនុយ្សតីស ឞូនុយ្សអ្យើសតារានោកអ្យា។ ខាន់អៃមៃលែៈជេងតឹមឞានមានាវអាងតាផូងខាន់ពាង់ តឹមឞានមានទើអាងតានែសនតូអ្យា។ 16 អ៝ន់ខាន់អៃមៃញអោតន៝ប់នាវនតីមានាវរេសនហ៝រ៝។ លាសខាន់អៃមៃជានកើតនៃ គ៝ប់ឞ្លាវនហីអេងឆាក់តានារឞ្រាសក្រីស វាច់តៃ យ៝រមាឆៃនាវគ៝ប់ញឆ្រោយ្សជានការរាអាសរាគាញ់នតីខាន់អៃមៃនើសមោអោសជេងទើមទាម។ 17 នទើអីខាន់អៃមៃជានយ៝រមាខាន់អៃមៃញឆីងមាឞ្រាសក្រីស ជេងតឹមឞានមានទើខាន់អៃមៃញហើរមាកោរាញឞ្រាស។ លាសឞូងខឹតគ៝ប់ នាវអីនៃតឹមឞានមានទើញហើរមាកោរាញឞ្រាសអីគែសនត៝បនទើខាន់អៃមៃញហើរមាពាង់ដ៝ង់ ជេសរីគ៝ប់រាម់មអាក។ ជេសរីគ៝ប់អុចខាន់អៃមៃគែសនូយ្សនហ៝ម់រាម់មអាកនទ្រែលគ៝ប់។ 18 កើតនៃដ៝ង់ អ៝ន់ខាន់អៃមៃរាម់មអាក អើ អ៝ន់ខាន់អៃមៃរាម់មអាកនទ្រែលគ៝ប់។ តីមោថេ នទ្រែលមា អេពាព្រោដីត ហាន់ញឆ៝ង 19 លាសកោរាញយេឆូ កើល គ៝ប់អុចអ៝ន់តីមោថេ ហាន់អាខាន់អៃមៃគើញរ៝ គៃមាញអោតនាវឞើសខាន់អៃមៃអ៝ន់នហាវនូយ្សនហ៝ម់គ៝ប់។ 20 តាអ្យាគ៝ប់មោហោមអោសគែសឞូនុយ្សអាអេងជឹតអីគែសនាវមឹនតឹមឞានមាពាង់ ពាង់ហោងាន់មឹនរាវៃខាន់អៃមៃ។ 21 យ៝រលាសទឹងលែៈឞូនុយ្សអាអេងអុចមឹនមាឆាក់ខាន់ពាង់នើមទើម ខាន់ពាង់មោអោសមឹនមានទើឞ្រាសក្រីស អុច។ 22 ខាន់អៃមៃលែៈគឹតឆៃនូយ្សនហ៝ម់អ្វែសតីមោថេ ពាង់ជានការនទ្រែលគ៝ប់តានាវមឞើសងក៝ចនាវមហែមហានអ្វែស តឹមឞានមាក៝នជានការអ៝ន់មាឞឹ។ 23 លាសនទ្រីគ៝ប់ហោមគុក៝ប់ឞូមឞើសម៝សនទើអីឞូជានមាគ៝ប់ ជេសគ៝ប់គឹតនហេលនានេៈនទើអីនៃ គ៝ប់អុចអ៝ន់ពាង់ហាន់គើញរ៝អាខាន់អៃមៃ។ 24 គ៝ប់ញឆីងមាកោរាញឞ្រាសឞូមរាពើកគ៝ប់គើញឞើសនទ្រូង ជេសរីគ៝ប់មរាហាន់អាខាន់អៃមៃគើញដ៝ង់។ 25 យើនមាគ៝ប់មឹនលាស ហោមអ្វែសមាអ៝ន់នោអេពាព្រោដីត ព្លឹឆឹតអាខាន់អៃមៃអាបៃអ្យា។ ពាង់ជេងអ៝សនោគ៝ប់តានាវញឆីង ជេងឞូនុយ្សជានការនទ្រែលគ៝ប់ ជេសរីពាង់ជេងឞូនុយ្សញឆ្រោយ្សនទ្រែលឞ៝ន់ ឞ៝លលាសគែសអ៝ក់ឞូនុយ្សតឹមរាទ៝ង់។ ខាន់អៃមៃលែៈអ៝ន់ពាង់ហាន់អាគ៝ប់ គៃមាមឞើសនាវឞើសខាន់អៃមៃ នអ៝ប់មាកើលម៝សនទើអីគ៝ប់អុច។ 26 ពាង់ក្ល៝ង់ខាន់អៃមៃទុតហោងាន់ ពាង់គែសនាវរាង៝តងាន់យ៝រមាពាង់លែៈគឹតខាន់អៃមៃលែៈតាង់លឺពាង់គែសនាវជីនើស។ 27 ពាង់គែសនាវជីទុតហោឞើយមាខឹតងាន់ដ៝ង់ យើនមាកោរាញឞ្រាសយោៈនអាចពាង់អ៝ន់ពាង់ឞាសជី។ កោរាញឞ្រាសមោអោសទើនយោៈនអាចទូហ្វេពាង់ទើម យោៈនអាចគ៝ប់ដ៝ង់ គៃមាលើយអ៝ន់គ៝ប់គែសនាវរាង៝តលើមាហោជឹត។ 28 កើតនទ្រីគ៝ប់អុចអ៝ន់ពាង់ព្លឹឆឹតអាខាន់អៃមៃគើញរ៝ គៃមាខាន់អៃមៃរាម់មអាកត៝ត់ឆៃពាង់។ ជេសរីគ៝ប់មោហោមដ៝ង់រាវៃនាវអីខាន់អៃមៃលែៈរាវៃពាង់នើស។ 29 លាសនទ្រីអ៝ន់ខាន់អៃមៃរ៝មពាង់មានាវរាម់មអាកអ៝ន់ទុតហោ យ៝រមាពាង់ជេងអ៝សនោឞ៝ន់តានាវញឆីងមាកោរាញយេឆូ ។ ជេសរីយើកមាឞូនុយ្សអីកើតពាង់នៃទោ 30 យ៝រមាពាង់ឞើយខឹតឆាក់នៃនើសជានការមាឞ្រាសក្រីស ។ ពាង់លែៈនទ្រាប់ជាវជេសឆាក់ពាង់នើមមាខឹតគៃមាឆើមកើលខាន់អៃមៃអីខាន់អៃមៃមោអោសទើយហាន់កើលគ៝ប់។ |
© (Active) Wycliffe Bible Translators, Inc. All rights reserved.
Wycliffe Bible Translators, Inc.