Luka 7 - Bunongឞ្រាសយេឆូ ជានឞាសជីអ៝ន់មាទឹកកោរាញតាហែន រោម ( មថ ៨:៥-១៣ ) 1 ជេសឞ្រាសយេឆូ ងើយនាវអីនៃអ៝ន់មាផូងប៝នលាន ជេសរីពាង់ហាន់លាប់តាប៝នកាពើនិម ឞ្រីកាលីលេ នទ្រែលមាមពោលអ៝សម៝នពាង់។ 2 តាប៝ននៃគែសទូហ្វេឞូនុយ្សជីហោងាន់ឞើយមាខឹត ឞូនុយ្សអីនៃជេងទឹកទូហ្វេកោរាញតាហែនរោម កោរាញរ៝ង់ងាន់មាពាង់។ 3 ត៝ត់កោរាញតាហែនអីនៃតាង់លឺឞូងក៝ចឞ្រាសយេឆូ ជេសរីពាង់ដាៈមពោលកោរាញអីឆ្រាអែល អាបាៈហាន់ជាៈឞ្រាសយេឆូ គៃមាហាន់ជានឞាសទឹកអីនៃ។ 4 ជេសរីមពោលកោរាញអីនៃហាន់ម៝ប់ឞ្រាសយេឆូ ត៝ត់តាឞ្រាសយេឆូ រីខាន់ពាង់ឞ៝ញពាង់ហាន់នទ្រែលខាន់ពាង់៖ “អើយកោរាញ មៃយោៈមាកោរាញតាហែនរោម អីនៃទីមេៈ 5 យ៝រលាសពាង់រ៝ង់មាប៝នលានឞ៝ន់ ជេសរីពាង់ឆើមអ៝ន់ព្រាក់មាជានទូមល៝ម់ញីសរាបុនជឹតអ៝ន់ឞ៝ន់”។ 6 ជេសរីឞ្រាសយេឆូ ហាន់នទ្រែលមពោលកោរាញអីនៃ។ ត៝ត់ឞើយត្រុយ្សអាជៃរី កោរាញតាហែនអីនៃដាៈមឹតជាង់ពាង់ហាន់ច្វាៈមឞើសឞ្រាសយេឆូ អាត្រ៝ងរី៖ “អើកោរាញ! មោខាច់អោសជាៈលែវមៃលាប់តាជៃគ៝ប់ យ៝រលាសគ៝ប់មោទីផូងអីឆ្រាអែល នទ្រីទឹងមោលាង់ទីលាសគ៝ប់ជាៈមៃលាប់តាជៃគ៝ប់។ 7 នទ្រីទឹងគ៝ប់នើមមោឞាញ់ហាន់ម៝ប់មៃដ៝ង់។ ទាន់មៃលាសទូត៝ងឞើសនៃ ទឹកគ៝ប់ឞាសជីរ៝។ 8 គ៝ប់គុតាន៝ម់ឞូ យើនលាសគែសក៝នតាហែនអ៝ក់គុតាន៝ម់គ៝ប់ដ៝ង់។ លាសគ៝ប់ដាៈទូហ្វេហាន់ ពាង់ហាន់រ៝ លាសដាៈឞូនុយ្សអាអេងវាច់ ពាង់វាច់រ៝។ លាសគ៝ប់ដាៈទឹកគ៝ប់ជានទូនតីលនទើ ពាង់ជានរ៝។ លាសនទ្រី គ៝ប់គឹតលាសមៃងើយគែសនាវទើយកើតនៃដ៝ង់”។ 9 ត៝ត់ឞ្រាសយេឆូ តាង់នាវកោរាញតាហែនអីនៃ តានូយ្សនហ៝ម់ពាង់នទ្រ៝ត់ញហីសងាន់។ ជេសរីពាង់រាលែជឹតឞូនុយ្សអីឞ្រោៈនទ្រែលពាង់ ងក្រែមាលាស៖ “គ៝ប់មឞើសមាខាន់អៃមៃ ឞ៝លលាសតាផូងអីឆ្រាអែល អីកើបអេងឆាក់ខាន់ពាង់នើមលាសលែៈគឹតនាល់កោរាញឞ្រាស អេហ៝ៈគែសនាវញឆីងកើតពាង់អីនៃដ៝ង់”។ 10 ជេសរីមឹតជាង់អីកោរាញតាហែនដាៈហាន់នៃនើស ខាន់ពាង់ព្លឹឆឹតជឹតកើយ ត៝ត់អាជៃឆៃទឹកពាង់អីនៃលែៈឞាសជី។ ឞ្រាសយេឆូ ជានទ៝ក់រេសទូហ្វេក៝នឞូក្លោ 11 ជេសរីឞ្រាសយេឆូ ហាន់ជឹតតាទូប៝ន រាញាប៝នអីនៃនាអីន ។ គែសអ៝ក់ឞូនុយ្សហាន់នទ្រែលពាង់ មពោលអ៝សម៝នពាង់នើម នទ្រែលមាឞូនុយ្សអាបាៈអេងអ៝ក់ដ៝ង់។ 12 នោកខាន់ពាង់ឞើយមាត៝ត់តាមែងមពោងមពេរប៝នអីនៃ ឆៃគែសឞូនុយ្សឞ្រោៈនហ៝ចត៝ប់ខឹត។ ឞូនុយ្សអីខឹតនៃក៝នឞូក្លោ ទើនគែសទូហ្វេក៝នឞូក្លោអីនៃទើម អីមេៈរីនទ្រោខឹតឆាយជឹត។ ជេសរីគែសអ៝ក់ឞូនុយ្សតាប៝នអីនៃឞ្រោៈនទ្រែលពាង់។ 13 ត៝ត់ឞ្រាសយេឆូ ឆៃឞូអូរនទ្រោខឹតឆាយអីនៃ ពាង់យោៈនអាចហោងាន់។ ឞ្រាសយេឆូ លាសមាពាង់៖ “លើយហោមញុម”។ 14 ជេសរីឞ្រាសយេឆូ ហាន់ទាច់ពាសតាម៝ង់រានូងនៃ មពោលអីតូងរីញឆ្រុងដ៝ង់ ពាង់លាសមាឞូនុយ្សអីខឹតនៃ៖ “ហើយអ៝ស គ៝ប់មឞើសមាមៃទ៝ក់ហ៝ម់!” 15 ជេសរីឞូនុយ្សខឹតអីនៃទ៝ក់ដើបគុតារីរ៝ ឞ្លាវមឞើសងើយប្ហ៝ៈ។ ជេសរីឞ្រាសយេឆូ ញជុនឞូក្លោនទាម់អីនៃអាមេៈពាង់នើម។ 16 លែៈឞូនុយ្សអីគុតានៃក្លាចទាទេងាន់ ខាន់ពាង់រានេមាកោរាញឞ្រាស៖ “លែៈគែសឞូនុយ្សនតើយ្សនាវងើយកោរាញឞ្រាសទុតក្វ៝ង់លែៈវាច់គុនទ្រែលឞ៝ន់ ពាង់វាច់តឹមឞានមាកោរាញឞ្រាសវាច់កើលផូងប៝នលានពាង់នើម”។ 17 ខាន់ពាង់មឞើសងក៝ចឞ្រាសយេឆូ នៃលាមឞ្រីយូដា នទ្រែលមាលាមឞ្រីច្យៅមែងដ៝ង់។ អ៝សម៝ន យោហាន-បាប់តែម ហាន់ម៝ប់ ឞ្រាសយេឆូ ( មថ ១១:២-១៩ ) 18 មពោលអ៝សម៝នយោហាន-បាប់តែម ឆៃទឹងលែៈនៃ ជេសរីហាន់មឞើសទឹងលែៈនាវអីនៃអ៝ន់យោហាន-បាប់តែម គឹត។ 19 ជេសរីយោហាន-បាប់តែម ដាៈឞារហៃមពោលអ៝សម៝នពាង់ហាន់ម៝ប់ឞ្រាសយេឆូ អោបពាង់កើតនអា៖ “នោកកាល់អែនើសកោរាញឞ្រាសលែៈត៝នមាឞូនុយ្សនតើយ្សនាវងើយកោរាញឞ្រាសលាស គែសឞ្រាសក្រីស អីនើមរាក្លាយ្សលែៈកោរាញឞ្រាសទែកើយ្សជុរវាច់តាៈឞើសកាលើត្រោកនតុកកោរាញឞ្រាសនើម។ មៃអ្យាឞ្រាសក្រីស អីនៃឞើស មោលាសអ៝ន់ហេនហោមក៝ប់ទូហ្វេអេងជឹត?” 20 ជេសរីឞារហៃខាន់ពាង់អីនៃហាន់ត៝ត់តាឞ្រាសយេឆូ អោបពាង់៖ “ហើយកោរាញ ហេនអ្យាយោហាន-បាប់តែម ដាៈហាន់អោបមៃ គឹតមៃអ្យាងាន់ឞ្រាសក្រីស អីកោរាញឞ្រាសលែៈត៝នជុរវាច់ មោលាសអ៝ន់ហេនហោមក៝ប់ទូហ្វេអេងជឹត?” 21 នោកនៃអ៝ក់ឞូនុយ្សឞ្រាសយេឆូ លែៈជានអ៝ន់ឞាសជី ឞូនុយ្សគែសនាវជីអេងៗ ឞូនុយ្សឞ្រាសអ្យើសលើស ជេសរីអ៝ក់ឞូនុយ្សចែសមាត់ពាង់ជានអ៝ន់ឆៃអាងដ៝ង់។ 22 ឞ្រាសយេឆូ លាសមាមពោលអ៝សម៝នយោហាន-បាប់តែម អីនៃ៖ “ខាន់មៃមឞើសងក៝ចមាពាង់រី ទឹងលែៈនទើខាន់មៃលែៈតាង់ លែៈឆៃគ៝ប់ជាន។ ឞូនុយ្សចែសមាត់អ្វាញ់ឆៃ ឞូនុយ្សតឹកតោរអ្យាត់តាង់ ឞូនុយ្សក្វែតរាវែនឞ្លាវឞ្រោៈ ឞូនុយ្សផុងឆាឞាសក្ល៝ស ឞូនុយ្សខឹតទ៝ក់រេស ជេសរីឞូនុយ្សអ៝អាចតាង់នាវមហែមហានអ្វែស។ 23 អ្វែសមអាកងាន់មាឞូនុយ្សមោមអារ់នាវពាង់ញឆីងមាគ៝ប់ យ៝រមានទើគ៝ប់ជានតីសដាសនាវមឹនពាង់អុច!” 24 នទុតខាន់ពាង់ព្លឹឆឹត ឞ្រាសយេឆូ នតើមងើយមាយោហាន-បាប់តែម អ៝ន់មាផូងប៝នលាន៖ “ម៝សឞូនុយ្សអ្វាញ់ខាន់អៃមៃហាន់តាឞ្រីរាទាស? ហាន់អ្វាញ់ឞូនុយ្សអីងើយទាសមាឞូនុយ្សអេងៗអុច តឹមឞានមាជាមពាត់រាងោញទាសឆ្យាលមាខោមឞើស? ពាង់មោទីអោស។ 25 ម៝សឞូនុយ្សខាន់អៃមៃហាន់អ្វាញ់? អ្វាញ់ឞូនុយ្សញឆ៝សឞ៝កអ្វែសអាវអ្វែសឞើស? មោអោស។ ឞូនុយ្សញឆ៝សឞ៝កអ្វែសអាវអ្វែស ឆោងឆាព្យាង់កាសត្រាវកាស មពោលនៃគុនតុកកាដាច់គុ មោអោសគុតាឞ្រីរាទាស។ 26 លាសនទ្រីឞូម៝សឞូនុយ្សខាន់អៃមៃហាន់អ្វាញ់? អ្វាញ់ឞូនុយ្សនតើយ្សនាវងើយកោរាញឞ្រាសឞើស? ទីងាន់។ យើនមាពាង់អីនៃរាលាវមាឞូនុយ្សនតើយ្សនាវងើយកោរាញឞ្រាសជឹត 27 យ៝រលាសតានាវកោរាញឞ្រាសងើយលែៈគែសញចីសលាសមាពាង់៖ «ល៝ង់គ៝ប់ញជ្វាល់ឞូនុយ្សហាន់ល៝រមៃ គៃមានទ្រាប់នូយ្សនហ៝ម់ឞូនុយ្សតឹមឞានមាក្វាយ្សត្រ៝ងអ៝ន់មាមៃ»។ យោហាន-បាប់តែម អីនៃអីឞូនុយ្សហាន់ល៝រតានាវអីនៃ។ 28 ខាន់អៃមៃអ្យាត់នាវគ៝ប់ ទឹងលែៈឞូនុយ្សអីទែសតាៈឞើសឞូអូរតានែសនតូអ្យា មោគែសអោសទូហ្វេក្វ៝ង់រាលាវយោហាន-បាប់តែម យើនលាសតាមពោលឞូនុយ្សអីកោរាញឞ្រាសម៝ត់អ្វាញ់ ឞូនុយ្សអីជេៈតាន៝ម់ឞូ ឞូនុយ្សអីនៃជេងក្វ៝ង់រាលាវពាង់ងាន់”។ 29 ផូងប៝នលាន នទ្រែលមាឞូនុយ្សឆ៝ៈព្រាក់ប៝នលានគៃមាអ៝ន់កោរាញម៝ត់អ្វាញ់ ជេសខាន់ពាង់អ្យាត់នាវយោហាន-បាប់តែម ជេសរីខាន់ពាង់អ៝ន់ពាង់បាប់តែមខាន់ពាង់យុកមាទាក នទ្រីខាន់ពាង់ញហើខាន់ពាង់គឹតកោរាញឞ្រាសជេងទីងាន់។ 30 តីសមាផូងផារីឆី នទ្រែលមាផូងនើមនតីនាវវៃផូងអីឆ្រាអែល ខាន់ពាង់មោអោសអ៝ន់ពាង់បាប់តែមយុកខាន់ពាង់មាទាក នទ្រីខាន់ពាង់ទូនលើយលែៈនាវកោរាញឞ្រាសអុចអ៝ន់មាខាន់ពាង់។ 31 ជេសរីឞ្រាសយេឆូ លាស៖ “លាសនទ្រីមើមគ៝ប់តឹមរាដឹលមាឞូនុយ្សអាបៃអ្យា? ពាង់មើមជេង? 32 ពាង់ជេងតឹមឞានមាក៝នឆែគុព៝ល់តាជ៝ង់គូងប៝ន គែសអាបាៈតឹមនតែរនទ្រាង់ពាង់៖ «ហេនលែៈអោសនហោមគ៝សគ៝រ់ តីសមាខាន់អៃមៃមោព៝ល់រាម់មអាក ជេសរីហេនលែៈនអ៝រនត៝ង់ទ៝ង់ខឹត តីសមាខាន់អៃមៃមោអុចញុមព៝ល់ដ៝ង់»។ 33 លាសនទ្រីយោហាន-បាប់តែម នទ្រែលមាគ៝ប់ជេងតឹមឞានមាផូងក៝នឆែអីនៃ យោហាន-បាប់តែម អ៝ត់ឆោង មោអោសញេតនទ្រាញ់ តីសមាខាន់អៃមៃលាសពាង់ឞូនុយ្សឞ្រាសអ្យើសលាប់”។ 34 “ល៝ង់គ៝ប់អ្យាអីក៝នឞូនុយ្សតាៈឞើសកោរាញឞ្រាសគែសញេតគែសឆោង មោអ៝ត់ឆោងឆា ខាន់អៃមៃលាសគ៝ប់៖ «ឞូនុយ្សហៃញេតហៃឆោង ជានមឹតជាង់នទ្រែលឞូនុយ្សឆ៝ៈព្រាក់ប៝នលាន ជេសរីគុនទ្រែលឞូនុយ្សតីសអាអេងជឹត»។ 35 យើនលាសឞូនុយ្សអីតឹងនាវកោរាញឞ្រាស ញហើនាវកោរាញឞ្រាសអីនៃជេងទីអ្វែសងាន់តានាវរេសពាង់”។ ឞ្រាសយេឆូ យោៈមាឞូអូរវាង់តឹរ 36 គែសទូនារគែសទូហ្វេឞូនុយ្សតាផូងផារីឆី រាញាពាង់ឆីមោន ជាៈឞ្រាសយេឆូ ហាន់ឆោងឆាតាជៃពាង់នើម ជេសរីឞ្រាសយេឆូ ហាន់គុឆោងឆានទ្រែលតាជៃពាង់នៃ។ នោកនៃតឹងមានាវវៃផូងនទ្រ៝ង់ខាន់ពាង់ឆោងឆាគុឞិចងកេងជឹតច្យៅ អីជ៝ង់រ៝កជឹតកើយ។ 37 តាប៝ននៃដ៝ង់គែសទូហ្វេឞូអូរវាង់តឹរ។ ត៝ត់ពាង់តាង់គែសឞ្រាសយេឆូ គុឆោងឆាតាជៃផារីឆី អីនៃ ពាង់ឆ៝ៈដ៝បជេៈឞូជានមាលុ តាដ៝បរីគែសទាកងីបោកាសខ្លៃដ៝ង់។ 38 ជេសរីពាង់ហាន់តាជៃឆីមោន គុឞើសកើយឞ្រាសយេឆូ រី ពាង់ញុមហ៝រទាកមាត់តាជ៝ង់ឞ្រាសយេឆូ យ៝រមាពាង់រាង៝តមានាវតីសពាង់នើម ជេសរីឆ៝ៈឆ៝ក់ពាង់នើមរីជូតជ៝ង់ឞ្រាសយេឆូ ជេសរីចុមតាជ៝ង់រី ជេសចុមរីពាង់ឆ៝ៈទាកងីបោកាសត៝ៈតាជ៝ង់ឞ្រាសយេឆូ រីជឹត។ 39 ឞូនុយ្សអីតើមជាៈឞ្រាសយេឆូ ឆោងរីនើស ពាង់ឆៃកើតនៃ ជេសរីមឹនអេងតាឆាក់រី៖ “លាសពាង់ជេងឞូនុយ្សនតើយ្សនាវងើយកោរាញឞ្រាសងាន់ ពាង់គឹតរ៝ឞូអូរអីពាសពាង់នៃជេងឞូអូរតីស”។ 40 ជេសរីឞ្រាសយេឆូ លាសមាឆីមោន ៖ “ហើយនោ គ៝ប់អុចងក៝ចឞ្រីមាមៃ”។ ពាង់អើស៖ “អើមោច្រាវកោរាញ នែសមៃងក៝ចហ៝ម់”។ 41 ឞ្រាសយេឆូ លាសទូនាវងើយនតឹត៖ “គែសឞារហៃឞូនុយ្សមាញព្រាក់ឞូ ទូហ្វេមាញ ៥០០ ព្រាក់កាក់ ទូហ្វេមាញ ៥០ ព្រាក់កាក់។ 42 យ៝រមាឞារហៃខាន់ពាង់អីនៃមោគែសព្រាក់ត៝ម់ នទ្រីទឹងឞូនុយ្សអីតើមអ៝ន់មាញព្រាក់នៃមោហោមដាៈត៝ម់។ លាសនទ្រីលែៈឞារហៃអីនៃ ឞូម៝សរ៝ង់ហោរាលាវមាតើមអ៝ន់មាញព្រាក់នៃ?” 43 ពាង់អើស៖ “គ៝ប់គឹតលាសឞូនុយ្សអីមាញអ៝ក់”។ ឞ្រាសយេឆូ លាស៖ “ទីងាន់”។ 44 ជេសរីឞ្រាសយេឆូ អ្វាញ់ជឹតឞូអូរអីនៃ លាសមាឆីមោន ៖ “មៃឆៃឞូអូរអ្យាជានបាស? គ៝ប់លាប់តាជៃមៃ តឹងមានាវវៃឞ៝ន់ទីមាមៃឆ៝ៈទាកគ៝ប់ឞែមារាវជ៝ង់ តីសមាមៃមោអោសឆ៝ៈ ល៝ង់ពាង់ ពាង់ញុមហ៝រទាកមាត់តាជ៝ង់គ៝ប់ឞែៈលែៈផ្យៅ ជេសរីឆ៝ៈឆ៝ក់ពាង់នើមជូតជឹត។ 45 តឹងមានាវវៃឞ៝ន់មៃចុមតាតឹមឞ៝មគ៝ប់ តីសមាមៃមោអោសចុម ល៝ង់ពាង់ ចុមជ៝ង់គ៝ប់មោរាលូ នតើមឞើសគ៝ប់ត្រុយ្សតាអ្យានើសងាន់។ 46 តឹងមានាវវៃឞ៝ន់ទីមាមៃត៝ៈទាកងីតាឞោកគ៝ប់ តីសមាមៃមោអោសត៝ៈ ល៝ង់ពាង់ ត៝ៈទាកងីបោកាសជូតតាជ៝ង់គ៝ប់។ 47 កើតនទ្រីគ៝ប់មឞើសមាមៃ ឞូអូរអ្យាអ៝ក់ងាន់នាវតីសពាង់ គ៝ប់លែៈយោៈនអាចជេសទឹងលែៈនាវតីសពាង់ មោហោមអោសកើបនាវតីសពាង់ នទ្រីទឹងពាង់គែសនាវរ៝ង់ហោងាន់។ តីសមាឞូម៝សអីគែសយោៈនអាចដេៈ នាវរ៝ង់ពាង់គែសដេៈដ៝ង់”។ 48 ជេសរីឞ្រាសយេឆូ លាសជឹតឞូអូររី៖ “នាវតីសអៃលែៈគ៝ប់យោៈជេស គ៝ប់មោហោមអោសកើបនាវតីស”។ 49 លែៈឞូនុយ្សអីគុនទ្រែលតានៃមឹនអេងតាឆាក់រី៖ “ឞូម៝សពាង់អីនៃហ្យាស ទឹងឞាញ់លាសយោៈនអាចនាវតីសដ៝ង់? គែសកោរាញឞ្រាសទើមទើយយោៈនាវតីស”។ 50 ជេសរីឞ្រាសយេឆូ លាសមាឞូអូរអីនៃ៖ “ហើយអ៝ស យ៝រនាវអៃញឆីងមាគ៝ប់ អៃលែៈក្លាយ្សជេសឞើសនាវកោរាញឞ្រាសតេៈទោយ្ស ឆឹតអ៝ន់អ្វែសលាង់ដាប់មពាន់”។ |
© (Active) Wycliffe Bible Translators, Inc. All rights reserved.
Wycliffe Bible Translators, Inc.