I Pêtrôs 5 - Bunongឞូនុយ្សអីម៝ត់អ្វាញ់ផូងញឆីង 1 ល៝ង់ផូងអីកោរាញតាផូងញឆីង គ៝ប់អ្យាជេងកោរាញមាផូងញឆីងដ៝ង់ ជេងឞូនុយ្សអីលែៈឆៃមាមាត់នាវជេរជ៝ត់ឞ្រាសក្រីស នទ្រែលមាជេងឞូនុយ្សអីមរាឆ៝ៈទើននទ្រែលនាវច្រេកលើបនោកពាង់ញហើឆាក់ គ៝ប់ទាន់លាសមាផូងអីកោរាញតាផូងញឆីង 2 អ៝ន់ម៝ត់ញជ្រាង់ផូងញឆីងអីតឹមឞានមាឞែឞ្យាប់ផូងកោរាញឞ្រាសអ៝ន់អ្វែសមាលែៈនូយ្សនហ៝ម់ មោអោសទីតឹមឞានមាឞូញច៝ប់ ក៝ៈមោទីដ៝ង់មាកើញគែសព្រាក់ យើនមាអ៝ន់គែសនូយ្សនហ៝ម់នអើរមាជាន នទ្រីមើទីតានាប់មាត់កោរាញឞ្រាស។ 3 ផូងឞូនុយ្សអីកោរាញឞ្រាសទែជាវអ៝ន់ម៝ត់ញជ្រាង់នៃ លើយអោសទ៝ង់នាវទើយមាតុនជ៝តខាន់ពាង់ យើនមាអ៝ន់លែវនាវអ្វែសមាខាន់ពាង់អីតឹមឞានមាឞែឞ្យាប់ផូង។ 4 ជេសរីតានោកកោរាញច្យាប់ឞែឞ្យាប់ត៝ត់តាអ្យា ពាង់មរាអ៝ន់នទើងខោមអីហោមនឹងអីគែសនាវច្រេកលើប។ ឞូនុយ្សអីញឆីងមាកោរាញឞ្រាស 5 អើផូងទ្រោសនទាម់អ៝ន់តឹមឞានកើតនៃដ៝ង់ អ៝ន់អ្យាត់នាវមពោលកោរាញ។ អ៝ន់ទឹងលែៈខាន់អៃមៃញជុរអេងឆាក់ខាន់អៃមៃនើម យ៝រលាស «កោរាញឞ្រាសតឹមរាទ៝ង់ដាសឞូនុយ្សអីនហីអេងឆាក់ យើនមាពាង់យោៈនអាចមាឞូនុយ្សអីញជុរអេងឆាក់អុចអ្យាត់នាវពាង់»។ 6 លាសនទ្រីអ៝ន់ខាន់អៃមៃញជុរអេងឆាក់តាន៝ម់កោរាញឞ្រាសនើមអីគែសនាវទើយទោ គៃមាពាង់នហាវខាន់អៃមៃ ត៝ត់ទីម៝ងពាង់តៃ។ 7 ជេសរីញជុយ្សទឹងលែៈនាវងក្ល៝ន់រាវៃខាន់អៃមៃតាពាង់ យ៝រលាសពាង់ហោងាន់មឹនមាខាន់អៃមៃ។ 8 អ៝ន់គុរាងែស ជេសរីញជ្រាង់ឆាក់អ៝ន់គុទីកែស យ៝រលាសឆាតាង់អីនើមរាលាង់ដាសខាន់អៃមៃតឹមឞានមាយៅមុរងរោង នទាច់ជុមឞូនុយ្ស អុចមាឆាហេក។ 9 លើយអោសអ្យាត់ជានតឹងនាវពាង់ អ៝ន់ខាន់អៃមៃគុន៝ប់រាក៝ក់ អ៝ន់គែសនាវញឆីងន៝ប់ យ៝រលាសខាន់អៃមៃលែៈគឹតជេស ផូងអ៝សនោខាន់អៃមៃតានាវញឆីងលាមនែសនតូអ្យា ខាន់ពាង់គែសនាវជេរជ៝ត់កើតខាន់អៃមៃដ៝ង់។ 10 កោរាញឞ្រាសទុតគែសនាវអ្វែសអាប់នតីលងាន់ ពាង់លែៈក្វាល់ជេសខាន់អៃមៃនៃ គៃមាអ៝ន់ខាន់អៃមៃឆ៝ៈទើននាវច្រេកលើបអីហោមបាបើនហ៝រ៝យ៝រមានទើឞ្រាសក្រីស លែៈជាននើស។ ជេសខាន់អៃមៃលែៈទើននាវជេរជ៝ត់អីទូប្ល៝ត់នៃ ពាង់មរារាទ៝ក់ញជេងខាន់អៃមៃ អ៝ន់នហ៝ម់ឆ្វានមាខាន់អៃមៃ អ៝ន់ខាន់អៃមៃទាង់កាតាង នទ្រែលមាអ៝ន់ខាន់អៃមៃគុន៝ប់រាក៝ក់។ 11 អ៝ន់នាវទើយពាង់ហោមបាបើនហ៝រ៝! អើអ៝ន់គែសកើតនៃងាន់រ៝។ នាវនតិញងគ្លែៈទុត 12 នោឆីលាស អីគ៝ប់កើបជេងអ៝សនោតានាវញឆីងរាប់ជាប់ងាន់ ពាង់កើលគ៝ប់ញចីសឆ៝ម់បុតគ្លែសអីអ្យា នទ្រែលមាញជ្វាល់។ គ៝ប់ញចីសឆ៝ម់បុតអ្យាគៃមានហាវនូយ្សនហ៝ម់ខាន់អៃមៃ នទ្រែលមាអ៝ន់ខាន់អៃមៃគឹតនហេលនាវអ្វែសងាន់ងេនកោរាញឞ្រាស។ អ៝ន់ខាន់អៃមៃគុន៝ប់តានាវអ្វែសអីនៃ។ 13 ផូងញឆីងមាកោរាញឞ្រាសអីគុតាប៝នអីឞូក្វាល់បាបីលោន ដ៝ង់ អីលែៈកោរាញឞ្រាសទែកើយ្សកើតខាន់អៃមៃនៃ ខាន់ពាង់អោបនាវអ្វែសលាង់ខាន់អៃមៃ ជេសរីនោមារកោស អីគ៝ប់កើបតឹមឞានមាក៝នគ៝ប់នើម ទាន់អោបនាវអ្វែសលាង់ខាន់អៃមៃដ៝ង់។ 14 អ៝ន់ខាន់អៃមៃតឹមអោបនាវអ្វែសលាង់នទ្រាង់នើមមានាវអ្វែសរាសរើច។ ទាន់កោរាញឞ្រាសអ៝ន់នាវដាប់មពាន់ទឹងលែៈខាន់អៃមៃអីគុនទ្រែលឞ្រាសក្រីស ៕៚ |
© (Active) Wycliffe Bible Translators, Inc. All rights reserved.
Wycliffe Bible Translators, Inc.