II Têsalônik 1 - Bunongនាវអោបអ្វែសលាង់ 1 ឆ៝ម់បុតគ៝ប់ពោល ញចីស។ គ៝ប់ ឆីលាស នទ្រែលមាតីមោថេ ពែនុយ្សហេនញជ្វាល់អ៝ន់មាផូងញឆីងមាកោរាញយេឆូក្រីស តាប៝នតេឆាលោនិក អីគុនទ្រែលកោរាញឞ្រាសឞឹឞ៝ន់នើម អីគុនទ្រែលកោរាញយេឆូក្រីស ។ 2 ទាន់កោរាញឞ្រាសឞឹឞ៝ន់នើម នទ្រែលមាកោរាញយេឆូក្រីស អ៝ន់នាវអ្វែស អ៝ន់នាវដាប់មពាន់មាខាន់អៃមៃ។ 3 អើអ៝សនោតានាវញឆីង អ្យាត់មាហេនលាសអ្វែសកោរាញឞ្រាសបាបើងាន់យ៝រមាខាន់អៃមៃ។ ហេនលាសអ្វែសកើតនអាជេងទីងាន់ យ៝រលាសនាវញឆីងខាន់អៃមៃលើមាហោងាន់ ជេសរីនាវរ៝ង់ទឹងលែៈនទ្រាង់ខាន់អៃមៃនើមលើមាហោដ៝ង់។ 4 កើតនទ្រីទឹងហេនមឞើសងក៝ចមាផូងញឆីងមាកោរាញឞ្រាសតាប៝នអេងៗ អ៝ន់ឞូលឺខាន់អៃមៃហោមញឆីង ហោមញឆ្រោយ្សអ៝ត់នូយ្ស នោកឞូជានជេរជ៝ត់អាប់នតីលមាខាន់អៃមៃ នទ្រែលមាគែសនាវជេរអេងៗជឹតកាដោយ។ 5 លាសនទ្រីតានាវខាន់អៃមៃគុន៝ប់តានាវញឆីងមាកោរាញឞ្រាស ឞ៝ន់ឆៃនហេលនានេៈងាន់នាវកោរាញឞ្រាសផាតទោយ្សឆ៝ង់ងាន់។ ពាង់កើបខាន់អៃមៃទីមាលាប់តានាវពាង់នើមម៝ត់អ្វាញ់ ជេសរីខាន់អៃមៃគែសនាវជេរជ៝ត់យ៝រមាខាន់អៃមៃជេងប៝នលានពាង់នើម។ 6 កោរាញឞ្រាសជាននទើឆ៝ង់ងាន់ ពាង់មរាព្លើងអ៝ន់នាវជេរមាឞូម៝សអីជានជេរមាខាន់អៃមៃនើស។ 7 ជេសរីពាង់មរាអ៝ន់ខាន់អៃមៃអីគែសនាវជេរជ៝ត់នៃគុរាលូនទ្រែលហេនតានោកឞ្រាសយេឆូ ញហើឆាក់តាៈឞើសកាលើត្រោក។ ពាង់វាច់តៃនទ្រែលផូងតោងពារ់កោរាញឞ្រាស។ ផូងតោងពារ់អីនៃគែសនាវទើយងាន់។ 8 ពាង់ហាន់មាអុញអីទុតហីត តេៈទោយ្សទឹងលែៈផូងអីមោគឹតនាល់មោអ្យាត់កោរាញឞ្រាស នទ្រែលមាទឹងលែៈផូងអីមោអ្យាត់អោសនាវមហែមហានអ្វែសឞ្រាសយេឆូ អីកោរាញឞ៝ន់។ 9 ខាន់ពាង់អីនៃមរាឆ៝ៈទើននាវរ៝សលេកនហ៝រ៝ គុងខាសងាយឞើសមាត់កោរាញយេឆូ នអ៝ប់មាគុងខាសងាយឞើសនាវទើយពាង់អីគែសនាវច្រេកលើប។ 10 តានារអីនៃពាង់វាច់ គៃមាផូងក្ល៝សអ្វែសពាង់រានេនាវច្រេកលើបពាង់នើម ជេសរីទឹងលែៈឞូនុយ្សអីញឆីងមាពាង់រានេពាង់លែៈនាវងាន់។ ល៝ង់ខាន់អៃមៃ ខាន់អៃមៃគុតាមពោលអីនៃដ៝ង់ យ៝រមាខាន់អៃមៃលែៈញឆីងជេសមានាវហេនមឞើសងក៝ច។ 11 កើតនទ្រីទឹងហេនមឞើសឆើមអ៝ន់មាខាន់អៃមៃបាបើ។ កោរាញឞ្រាសលែៈក្វាល់ខាន់អៃមៃមាគែសនាវរេសនហ៝រ៝។ ហេនទាន់កោរាញឞ្រាសអីឞ្រាសឞ៝ន់យើកមឞាសអ៝ន់ខាន់អៃមៃគុរេសអ៝ន់តឹមទីមានាវក្វាល់អីនៃ។ ហេនមឞើសឆើមទាន់ពាង់អ៝ន់នាវទើយពាង់នើមមាខាន់អៃមៃ គៃមាជានជេសទឹងលែៈនទើអ្វែសអីខាន់អៃមៃអុចជាន នទ្រែលមាជានជេសទឹងលែៈនទើអីខាន់អៃមៃជានយ៝រមានាវញឆីងខាន់អៃមៃ។ 12 នទ្រីទឹងខាន់អៃមៃអ៝ន់គែសនាវច្រេកលើបមារាញាឞ្រាសយេឆូ អីកោរាញឞ៝ន់នើម ជេសរីពាង់អ៝ន់នាវច្រេកលើបមាខាន់អៃមៃដ៝ង់យ៝រមានាវអ្វែសកោរាញឞ្រាសអីឞ្រាសឞ៝ន់យើកមឞាស នអ៝ប់មានាវអ្វែសកោរាញយេឆូក្រីស ដ៝ង់។ |
© (Active) Wycliffe Bible Translators, Inc. All rights reserved.
Wycliffe Bible Translators, Inc.