Yuđas 1 - Nau Brah Ndu Ngơi 2023

Nau mbah jô̆ khâl

¹ Y-Yut, oh mon Brah Yêsu Krist jêh ri oh Y-Yakơ, njuăl samƀŭt ma phung geh nau kuăl jêh, geh Brah Ndu jêng Mbơ̆, rŏng, jêh ri geh Brah Yêsu Krist mât mray.

² Mbơh sơm dăn nau yô̆ nđach, nau đăp mpăn jêh ri nau rŏng lơ hô âk râk ma khân may.

Phung kôranh nti nklă

³ Hơi phung gâp rŏng ơi, gâp ŭch ngăn nchih ma khân may ma nau tâm rklaih he geh ndrel; gâp mĭn ŭch nchih gay n'hao nuih n'hâm khân may tâm lơh yor nau chroh, jêng nau chroh ntăm jêh ma phung kloh ueh du tơ̆ rĭng jêh.

⁴ Yorlah geh ƀaƀă phung bunuyh mŭt ntŭng tâm nklang khân may, jêng phung kăl e hŏ tâm nal ma nau phat dôih, jêng phung mâu klach yơk, phung rgâl nau yô̆ Brah Ndu he jêng nau dơi ƀư tih, dun ma Nơm Chiă Uănh knŏng nguay jêh ri Kôranh Brah he jêng Brah Yêsu Krist.

⁵ Nđâp tơlah khân may gĭt jêh lĕ rngôch nau nây, gâp ŭch nkah ma khân may pô aơ: Kôranh Brah tâm rklaih jêh phung ƀon lan Păng luh bơh n'gor Êjipt, ƀiălah jêh ma nây Păng ƀư rai phung mâu chroh.

⁶ Bi phung tông mpăr mâu djôt prăp tâm ntŭk khân păng, chalơi ntŭk khân păng nơm, Brah Ndu dŏng rse rvăk gay kăt khân păng n'ho ro tâm ntŭk ngo klĕng gay kâp nau phat dôih ta nar toyh.

⁷ Nâm bu ƀon Sôdôm, ƀon Gômôrơ jêh ri ƀon văr jŭm ƀư đŏng tâm ban ma khân păng, mƀơk khân păng nơm lăp tâm lĕ nau văng tĭr jêh ri nchuăt tĭng nau nglay săk ŭch mâu tâm di, khân păng dơn nau tâm rmal ma ŭnh sa n'ho ro gay nti ma he.

⁸ Nđâp lah kơt nĕ, tâm ban kơt nây đŏng, tâm nau mbơi, phung aơ ƀư ƀơ̆ ƀơch nglay săk khân păng nơm, dun nau dơi, jêh ri ngơi sưr rlau ma lĕ nơm chrêk rmah.

⁹ Nđâp dôl kôranh tông mpăr Mikel tâm rlăch đah brah mhĭk yor săk jăn Y-Môis, păng mâu janh sŏk nau ngơi sưr rlau gay phat dôih, ƀiălah knŏng lah: “Dăn Kôranh Brah nduyh may.”

¹⁰ Ƀiălah phung aơ ngơi djơh tât ma lĕ nau khân păng mâu gĭt rbăng, bi lĕ nau khân păng gĭt ma nau nglay săk ŭch nâm bu mpô mpa bri mâu geh nau gĭt rbăng, pôri khân păng dŏng gay ƀư rai roh khân păng nơm.

¹¹ Rêh ni ngăn ma khân păng! Yorlah tĭng trong Y-Kain; yor drăp ndơ dĭng tŭp tâm nau tih Y-Balam; jêh ri geh nau roh rai yorlah nau tâm rdâng nâm bu Y-Kôrê.

¹² Phung bunuyh nây jêng ndơ ƀơ̆ tâm nau nhêt sa rŏng khân may; khân păng ăt janh nhêt sa blă blơ nhŭl ndrănh ndrăng khân păng, jêh ri knŏng gĭt rvê ma khân may nơm. Khân păng jêng ndâr tŭk mâu geh dak, sial khôm rdu; khân păng jêng lĕ tơm si mâu geh play lôch yan, bar tơ̆ khĭt, đôk tŏk lŏk reh.

¹³ Khân păng tâm ban rbuh dak mƀŭt ma nau ktang, luh mpŭnh nau ƀơ̆ ƀơch khân păng nơm; khân păng nâm bu lĕ mănh mbing nhhơt, nau ngo vêt vê prăp ma khân păng n'ho ro.

¹⁴ Yorlah phung bunuyh aơ, Y-Ênŏk jêng sau tâm tal pơh bơh Y-Ađam hŏ lah nau mbơh lor pô aơ: “Ri, Kôranh Brah văch jêh ma âk ngăn phung kloh ueh

¹⁵ gay ƀư nau phat dôih ma lĕ rngôch bunuyh, jêh ri tâm rmal lĕ rngôch phung mâu yơk ma lĕ nau mâu yơk khân păng ƀư tih jêh, jêh ri ma lĕ nau ngơi sưr bơh phung tih mâu yơk hŏ lah jêh tâm rdâng đah Păng.”

¹⁶ Khân păng jêng phung vay ngơi ƀŭk dŭk suyh, nduyh lah bu, ƀư tĭng lĕ nau kơnh ŭch khân păng nơm, trôm mbung ngơi âk nau sưr êng păng nơm, tâm rnê rlau keh ma bu gay sŏk drăp nkhôm.

¹⁷ Ƀiălah hơi phung gâp rŏng, kah gĭt hom lĕ nau phung kôranh oh mon Kôranh Brah he jêng Brah Yêsu Krist, mbơh jêh lor.

¹⁸ Khân păng lah jêh ma oh nâu: “Tâm rnôk nglĕ dŭt mra geh phung mưch rmot, nchuăt tĭng nâm lĕ nau kơnh ŭch mâu blau yơk khân păng nơm.”

¹⁹ Khân păng yơh jêng phung tâm nkhah mpôl, phung bunuyh gŭ rêh tĭng nglay săk, mâu geh Brah Huêng Ueh ôh.

Nau nkah nâp nuih n'hâm

²⁰ Hơi phung gâp rŏng, ndâk njêng hom khân may nơm ma nau chroh dŭt kloh ueh khân may. Mbơh sơm hom tâm Brah Huêng Ueh.

²¹ Mât mray hom khân may nơm tâm nau Brah Ndu rŏng. Gŭ kâp hom nau yô̆ nđach bơh Kôranh Brah he jêng Brah Yêsu Krist gay geh nau rêh n'ho ro.

²² Yô̆ nđach hom phung ƀaƀă vay đing;

²³ tâm rklaih hom phung êng têk khân păng luh bơh ŭnh; jêh ri ma phung êng đŏng, geh hom nuih n'hâm yô̆ nđach nđâp nau klach, tâm rmot nđâp ma du blah ao nglay săk ƀư ƀơ̆ ƀơch jêh.

²⁴ Mbơh sơm dăn Nơm geh nau brah djôt prăp khân may bơh nau chêh prah jêh ri ƀư ma khân may dâk tanăp nau chrêk rmah Păng mâu geh têl khap, jêh ri tâm nau răm maak,

²⁵ jêng Brah Ndu knŏng nguay, Nơm Tâm Rklaih he, ma Brah Yêsu Krist, Kôranh Brah he, geh nau tâm rnê, nau rnam, nau ktang jêh ri nau dơi ntơm bơh lĕ rngôch rnôk lor, aƀaơ aơ jêh ri ma tât n'ho ro! Amen.