Yôsuê 9 - Nau Brah Ndu Ngơi 2023

Phung Gibêôn ndơm phung Israel

¹ Tơlah tăng nau nây, lĕ rngôch phung hađăch gŭ kơh ri dak krong Yurdan, mâu lah gŭ ta klơ yôk, tâm dâng jâng yôk, mâu lah rgŏ kơh Dak Mƀŭt Toyh tâm tham ma Liban, jêng phung hađăch phung Hitit, phung Amôrit, phung Kanaan, phung Pêrisit, phung Hivit jêh ri phung Jêbusit,

² dơn nau tâm rnglăp ndrel ndrăng khân păng gay tâm lơh rdâng đah Y-Yôsuê jêh ri phung Israel.

³ Ƀiălah dôl phung Gibêôn tăng nau Y-Yôsuê ƀư jêh ma Yêrikô jêh ri Ai

⁴ khân păng dŏng nau ndơm: Khân păng jan ƀư phung mbơh, sŏk dŭng ơm n'gân ta seh bri khân păng, săng nglik khân păng văn nông ndrănh lĕ ơm, hêk tă jĭm tay,

⁵ jâng khân păng nsoh ntâu jot ơm mhe jĭm tay, jêh ri khân păng nsoh bok ao lĕ ơm sat. Lĕ rngôch piăng let khân păng prăp nkrem lĕ kro jêh ri chah hăch jêh.

⁶ Khân păng hăn ma Y-Yôsuê ta pôih tahan Gilgal, lah ma păng jêh ri ma Phung ƀon lan Israel pô aơ: “Hên văch tă bơh bri ngai; aƀaơ ri ăn khân may ƀư nau đăp mpăn đah hên.”

⁷ Phung ƀon lan Israel lah ma phung Hivit: “Klăp lah khân may gŭ dăch ma hên, mâm ƀư hên dơi ƀư nau đăp mpăn đah khân may?”

⁸ Ƀiălah khân păng lah ma Y-Yôsuê: “Hên jêng phung oh mon may.” Y-Yôsuê ôp: “Mbu nơm khân may jêng, jêh ri mbah ntŭk tă khân may văch?”

⁹ Khân păng plơ̆ lah: “Phung oh mon may văch tă bơh du n'gor bri ngai ngăn, yor hên tăng ma amoh Brah Yêhôva jêng Brah Ndu khân may. Yorlah hên tăng lư jêh nau bu nkoch bri ma Păng, jêh ri lĕ nau Păng ƀư jêh tâm n'gor Êjipt;

¹⁰ hŏ tăng jêh lĕ nau Păng hŏ ƀư ma bar hê hađăch phung Amôrit gŭ đah ri dak krong Yurdan, jêng Y-Sihôn, hađăch Hêsbôn, jêh ri Y-Ôk, hađăch bri Basan gŭ ta Astarôt.

¹¹ Phung kôranh bu ranh hên jêh ri lĕ rngôch phung ƀon lan tâm bri hên lah jêh đah hên pô aơ: ‘Djôt leo hom ndơ sông sa prăp ma nau hăn nsong jêh ri hăn tâm mâp đah phung ƀon lan nây jêh ri lah pô aơ: “Hên jêng phung oh mon khân may; jêh ri aƀaơ ri, ƀư hom nau đăp mpăn đah hên.”’

¹² Aơ jêng piăng let hên: Nar hên ntơm hăn bơh ngih hên gay văch ta khân may, hên djôt piăng let nây prăp ma ndơ sông sa ma nau hăn nsong, ta nar nây piăng let aơ hôm duh ngăn, ƀiălah aƀaơ aơ păng lĕ kro jêh ri chah hăch jêh;

¹³ lĕ nông ntâu aơ jêng mhe tơlah hên troch bêng ndrănh, ƀiălah aƀaơ aơ lĕ sat jêh; bi ma kho ao jêh ri ntâu jot hên sat jêh yor hăn trong ngai ngăn.”

¹⁴ Pônây phung Israel dơn ndơ sông sa khân păng, ƀiălah mâu ôp ôh Brah Yêhôva.

¹⁵ Y-Yôsuê ƀư nau đăp mpăn đah khân păng jêh ri ton nanê̆ ăn ma khân păng gŭ rêh, jêh ri phung kôranh chiă uănh phung ƀon lan sơm ton ma khân păng đŏng.

¹⁶ Ƀiălah pe nar pakơi, jêh ƀư nau tâm rnglăp đah khân păng, phung Israel gĭt ma khân păng jêng phung chiau meng khân păng nơm jêh ri gŭ dăch ma khân păng.

¹⁷ Yor ri, phung ƀon lan Israel dâk hăn trong, jêh ri tât ta ƀon khân păng nar tal pe. Lĕ ƀon khân păng jêng ƀon Gibêôn, ƀon Chêphira, ƀon Bêrôt, jêh ri ƀon Kiriat-Jêarim.

¹⁸ Phung ƀon lan Israel mâu lơh nkhĭt khân păng ôh, yorlah phung kôranh chiă uănh phung ƀon lan hŏ sŏk amoh Yêhôva Brah Ndu Israel ton săk ma phung ƀon lan nây; ƀiălah lĕ rngôch phung tâm rƀŭn ngơi ƀrôk đah phung kôranh chiă uănh.

¹⁹ Lĕ phung kôranh chiă uănh lah ma lĕ rngôch phung tâm rƀŭn: “He ton săk jêh đah khân păng ma amoh Yêhôva Brah Ndu phung Israel; pônây, ntơm aƀaơ aơ he mâu dơi ƀư khân păng ôh.

²⁰ Ăn he ƀư ma khân păng kơt aơ: Ăn ma khân păng gŭ rêh, klach lah Brah Yêhôva ji nuih tât ma he yor nau he ton săk jêh ma khân păng.”

²¹ Pônây phung kôranh chiă uănh lah tay: “Ăn ma khân păng gŭ rêh, ƀiălah ăn khân păng chôk long, bâk dak ma lĕ rngôch phung tâm rƀŭn.” Khân păng ƀư di tĭng nâm phung kôranh chiă uănh lah jêh ma khân păng.

²² Y-Yôsuê kuăl phung Gibêôn hăn tât jêh ri lah: “Mâm ƀư khân may ndơm hên lah pô aơ: ‘Hên gŭ ngai ngăn tă bơh khân may’ ƀiălah khân may gŭ dăch ma hên?

²³ Yor ri, bu rak rtăp ma khân may jêh ri khân may mra jêng dĭk ƀaƀơ, chôk long, bâk dak ma ngih Brah Ndu gâp.”

²⁴ Khân păng plơ̆ lah ma Y-Yôsuê: “Yorlah phung oh mon may gĭt nanê̆ ngăn Yêhôva Brah Ndu khân may ntăm jêh ma Y-Môis, oh mon Păng, ăn lĕ n'gor aơ ma khân may, jêh ri ƀư rai lĕ rngôch bunuyh gŭ tâm bri nây. Yor nây, hên klach khân may khĭt nau rêh hên rĭ dĭng hên ƀư nâm pônây.

²⁵ Aƀaơ hên gŭ tâm ti may, dăn ƀư ma hên tĭng nau mĭn may ŭch nau ueh nau di.”

²⁶ Y-Yôsuê ƀư tĭng nâm nau păng hŏ lah jêh ri tâm rklaih khân păng tă bơh ti phung ƀon lan Israel, mâu nkhĭt phung nây ôh.

²⁷ Ntơm bơh nar nây, Y-Yôsuê đă khân păng chôk long, bâk dak ma phung tâm rƀŭn jêh ri ma nơng ƀư Brah Yêhôva tâm ntŭk Păng săch kŏ tât ta nar aơ.