Yôsuê 8 - Nau Brah Ndu Ngơi 2023

Lơh pit in ƀon Ai

¹ Jêh nau nây, Brah Yêhôva lah ma Y-Yôsuê: “Lơi klach, mâu lĕ rdja nuih n'hâm! Djôt leo hom lĕ rngôch phung tahan hăn tĭng may, dâk hom jêh ri hăn hao gay lơh ƀon Ai. Aơ, Gâp jao jêh hađăch ƀon Ai, phung ƀon lan păng, ƀon păng, jêh ri neh păng tâm ti may.

² Ăn may ƀư ma ƀon Ai jêh ri ma hađăch păng tâm ban may hŏ ƀư jêh ma Yêrikô jêh ri hađăch păng. Khân may dơi sŏk ndơ pit in jêh ri mpô mpa rong ăn ma khân may nơm. Dơm hom phung tahan gŭ kâp dâp pakơi ƀon.”

³ Pônây Y-Yôsuê dâk ndrel ma lĕ rngôch phung tahan hăn hao tâm lơh ƀon Ai. Păng săch pe rmưn tahan janh ktang jêh ri đă khân păng hăn dôl măng.

⁴ Păng ntăm nau pô aơ: “Aơ, khân may mra gŭ kâp dâp pakơi ƀon, lơi hăn ngai ir. Lĕ rngôch ndrăp hom nau tâm lơh.

⁵ Bi ma gâp jêh ri lĕ rngôch phung ƀon lan ndrel ma gâp mra hăn văch dăch ƀon nây. Tơlah khân păng tâm rdâng tâm lơh đah hên nâm bu panăp, hên mra nchuăt tanăp khân păng.

⁶ Khân păng mra tĭng phung hên kŏ tât hên ndơm khân păng luh ngai padih ƀon, yorlah khân păng lah pô aơ: ‘Phung nây nchuăt du đah he kơt panăp nơh.’ Dôl hên nchuăt du đah khân păng

⁷ khân may mra luh du bơh ntŭk khân may gŭ kâp dâp jêh ri pit sŏk ƀon, yorlah Yêhôva Brah Ndu khân may mra jao ƀon nây tâm ti khân may.

⁸ Tơlah khân may pit in jêh ƀon, su lơi hom ƀon ma ŭnh. Ƀư di hom tĭng nau Brah Yêhôva ntăm jêh. Nĕ jêng nau gâp ntăm ma khân may.”

⁹ Pônây Y-Yôsuê đă khân păng hăn; khân păng gŭ kâp dâp vah vang Bêthel jêh ri Ai, mpeh nhâp nar ƀon Ai; bi ma Y-Yôsuê bê̆ch măng ndrel ma phung ƀon lan.

¹⁰ Ang ôi taơ, Y-Yôsuê kah rngăl ơm ôi, kơp phung tahan, jêh nây păng ndrel ma phung kôranh bu ranh Israel njŭn leo phung tahan hăn hao ma ƀon Ai.

¹¹ Lĕ rngôch phung tahan tĭng păng hăn hao dăch ƀon jêh ri ƀư rmlak mpeh pa lơ Ai; geh du rlŭng vah vang khân păng đah ƀon Ai.

¹² Y-Yôsuê djôt leo klăp lah tâm prăm rbăn bunuyh tahan gŭ kâp dâp vah vang Bêthel đah Ai, mpeh nhâp nar ma ƀon.

¹³ Rnôk phung ƀon lan hŏ ƀư rmlak mpeh pa lơ ƀon jêh ri phung tahan gŭ kâp dâp gak mpeh nhâp nar ƀon, măng nây Y-Yôsuê hăn lăp tâm rlŭng.

¹⁴ Saơ nau nây, hađăch ƀon Ai jêh ri phung ƀon lan păng ndal du luh tâm lơh đah phung Israel ntơm bơh ơm ôi ta ntŭk tâm nal jêh, mpeh neh lâng, ƀiălah hađăch mâu gĭt ôh geh du phung tahan gŭ kâp dâp ta pakơi ƀon.

¹⁵ Y-Yôsuê jêh ri lĕ rngôch phung Israel ndra ƀư mâu dơi jêh ri nchuăt du mpeh bri rdah.

¹⁶ Pônây lĕ rngôch phung ƀon lan gŭ tâm ƀon Ai rgum băl gay ma tĭng rgot. Khân păng tĭng Y-Yôsuê jêh ri khân păng hŏ hăn ngai jêh tă bơh ƀon.

¹⁷ Mâu hôm geh du huê nuyh hôm gŭ tâm ƀon Ai mâu lah ƀon Bêthel, mâu hôm geh du huê ma mâu tĭng rgot phung Israel. Khân păng chalơi hŏng ƀon toyh gay tĭng rgot phung Israel.

¹⁸ Rnôk nây, Brah Yêhôva lah ma Y-Yôsuê: “Yơr hom tak may djôt tâm ti rle mpeh ƀon Ai, yorlah Gâp mra jao ƀon nây tâm ti may.” Y-Yôsuê yơr tak păng djôt rle mpeh ƀon nây.

¹⁹ Nôk păng mhe yơr ti, phung tahan gŭ kâp dâp dâk ro bơh ntŭk khân păng kâp, nchuăt lăp ta ƀon, pit in jêh ri su ro ƀon nây ma ŭnh ƀon.

²⁰ Lah phung ƀon Ai uănh pakơi saơ nhhŭk ŭnh tâm ƀon thŭl leo klơ trôk jêh ri khân păng mâu hôm nchuăt du trong aơ mâu lah trong ri ôh, yorlah phung tahan Israel nchuăt du jêh mpeh bri rdah plơ̆ tay lơh phung tĭng khân păng.

²¹ Tơlah Y-Yôsuê jêh ri lĕ rngôch phung Israel saơ phung tahan gŭ kâp dâp lĕ pit in jêh ƀon jêh ri nhhŭk ŭnh tâm ƀon thŭl leo klơ, nôk nây khân păng plơ̆ tay lơh nkhĭt phung Ai.

²² Phung êng tâm ban đŏng luh du bơh ƀon hăn tâm lơh đah phung Ai, jêh ri phung Israel nchueng jŭm khân păng. Phung Israel lơh nkhĭt khân păng kŏ tât mâu hôm geh du huê hôm rêh mâu lah hôm klaih ôh.

²³ Khân păng nhŭp rêh hađăch ƀon Ai jêh ri njŭn leo păng ma Y-Yôsuê.

²⁴ Tơlah phung Israel ƀư nkhĭt jêh lĕ rngôch phung ƀon lan tâm ƀon Ai, mâu lah tâm mir mâu lah tâm bri rdah, jêng ntŭk phung Israel tĭng khân păng, jêh ri tơlah lĕ rngôch khân păng cha lôt khĭt jêh ma đao tât ma nuyh nglĕ dŭt, lĕ rngôch phung Israel plơ̆ sĭt đŏng ma Ai jêh ri sŏk đao nkhĭt phung hôm klen tâm trôm ƀon.

²⁵ Lĕ rngôch bunuyh ƀon Ai, lĕ phung bu klâu nđâp bu ur, cha lôt khĭt tâm nar nây, geh du rmưn bar rbăn bunuyh.

²⁶ Y-Yôsuê ăt yơr tak, mâu mƀơk ti ôh kŏ tât păng ƀư rai jêh lĕ rngôch bunuyh ƀon Ai.

²⁷ Phung ƀon lan Israel knŏng sŏk ma khân păng nơm mpô mpa rong jêh ri ndơ pit in bơh ƀon nây, tĭng nâm Brah Yêhôva hŏ ntăm jêh ma Y-Yôsuê.

²⁸ Pônây Y-Yôsuê su ƀon Ai jêh ri ƀư ma ƀon nây jêng du mbŭch ŭnh buh n'ho ro kŏ tât ta nar aơ.

²⁹ Păng yông hađăch ƀon Ai ta klơ tơm si jêh ri ăn ta nĕ tât mhaơ. Ƀiălah dôl nar nhâp, Y-Yôsuê ntĭnh bu n'hŭch săk jăn păng jŭr bơh tơm si jêh ri mƀăr păng ta ntŭk bu lăp mpông ƀon, jêh nây nkhŭt ta klơ păng du mbŭch rplay lŭ toyh, hôm tât ma nar aơ.

Ndâk nơng ƀư brah jêh ri răk nau vay ta klơ yôk Ê-bal

³⁰ Rnôk nây, Y-Yôsuê ndâk du nơng ƀư brah ma Yêhôva Brah Ndu Israel ta klơ yôk Êbal,

³¹ tĭng nau ntăm Y-Môis, oh mon Brah Yêhôva, ntăm jêh ma phung ƀon lan Israel, tĭng nâm nchih jêh tâm ndrom samƀŭt nau vay Y-Môis. Nĕ jêng du nơng ƀư brah ƀư ma du mlâm lŭ toyh, ê hŏ mâp lôk đah ndơ loih. Ta klơ nây, phung ƀon lan nhhơr ndơ ƀư brah gŭch ma Brah Yêhôva, jêh ri nhhơr ndơ ƀư brah ma nau đăp mpăn.

³² Jêh ri ta nây, tanăp phung ƀon lan Israel, Y-Yôsuê nchih tay đŏng ta klơ plơp lŭ du drôm samƀŭt nau vay Y-Môis hŏ nchih jêh.

³³ Lĕ rngôch bunuyh ƀon lan, lĕ phung bu năch, bunuyh tơm bri, phung kôranh bu ranh, phung kôranh chiă uănh, jêh ri phung phat dôih gŭ dâk bar đah Hip Nau Tâm Rnglăp panăp phung kôranh ƀư brah tâm noi deh Lêvi jêng phung tung Hip Nau Tâm Rnglăp Brah Yêhôva. Du n'gul phung ƀon lan gŭ dâk panăp yôk Gêrisim, jêh ri du n'gul ri gŭ dâk panăp yôk Êbal, tĭng nau Y-Môis, oh mon Brah Yêhôva, ntăm jêh ntơm bơh saơm, gay ăn nau ueh uĭn ma phung ƀon lan Israel.

³⁴ Jêh nau nây, Y-Yôsuê răk lĕ nau vay, nđâp ma nau ueh lăng jêh ri nau rak rtăp tĭng nâm nchih jêh tâm ndrom samƀŭt nau vay.

³⁵ Y-Yôsuê răk rĭng lĕ rngôch nau Y-Môis ntăm tanăp lĕ rngôch phung ƀon lan Israel, lĕ phung bu ur, phung kon se, jêh ri phung bu năch gŭ tâm nklang khân păng.