Yôsuê 6 - Nau Brah Ndu Ngơi 2023

Ƀon Yêrikô rlâm

¹ Rnôk nây, bu nchăng mpông ƀon Yêrikô jêh ri gak njrăng ngăn đah phung ƀon lan Israel, mâu ăn ma du huê bunuyh dơi luh lăp.

² Brah Yêhôva lah ma Y-Yôsuê: “Aơ, Gâp hŏ jao Yêrikô, hađăch jêh ri lĕ phung janh ktang păng tâm ti may.

³ Pônây may ndrel ma lĕ rngôch phung tahan hăn hom ndăch văr jŭm ƀon nây du tơ̆ jêh ri ăn ƀư kơt nây tâm prao nar.

⁴ Pơh nuyh kôranh ƀư brah mra djôt pơh mlâm nŭng ma nke hăn lor Hip Nau Tâm Rnglăp. Ƀiălah tât nar tal pơh, ăn khân may hăn ndăch văr jŭm ƀon pơh tơ̆, jêh ri kôranh ƀư brah mra uh nŭng.

⁵ Nôk khân păng uh nŭng du ndruh jong jêh ri tơlah khân may mhe tăng bâr nŭng rnôk nây ăn lĕ rngôch phung ƀon lan nter dŭt huy, mpêr ƀon nây mra rlâm lĕ, jêh nây phung ƀon lan mra hao mpêr, ăp nơm hăn hao song panăp.”

⁶ Pônây Y-Yôsuê, kon bu klâu Y-Nun, kuăl phung kôranh ƀư brah jêh ri lah: “Tung hom Hip Nau Tâm Rnglăp jêh ri ăn pơh nuyh kôranh ƀư brah djôt pơh mlâm nŭng ma nke hăn panăp Hip Nau Tâm Rnglăp Brah Yêhôva.”

⁷ Păng lah ma phung ƀon lan: “Rduh ran hom panăp, hăn ndăch văr jŭm ƀon; ăn phung bu klâu djôt ndơ tâm lơh hăn lor panăp Hip Nau Tâm Rnglăp Brah Yêhôva.”

⁸ Lah Y-Yôsuê ntăm jêh ma phung ƀon lan, pơh phung kôranh ƀư brah djôt pơh mlâm nŭng ma nke gŭ panăp Brah Yêhôva, nkre ma chuat nkre ma uh nŭng, bi ma Hip Nau Tâm Rnglăp Brah Yêhôva tĭng groi pakơi khân păng.

⁹ Phung djôt ndơ tâm lơh hăn panăp phung kôranh ƀư brah uh nŭng; phung tahan gak pakơi hăn tĭng groi pakơi Hip Nau Tâm Rnglăp. Khân păng ƀah hăn ƀah uh nŭng.

¹⁰ Ƀiălah Y-Yôsuê ntăm jêh ma phung ƀon lan pô aơ: “Khân may mâu dơi nter huy, lơi ăn bu tăng bâr khân may ngơi, mâu dơi ngơi du tong ôh kŏ tât mông nar gâp mra đă ma khân may troh nter, pôri mơ khân may mra troh nter huy.”

¹¹ Pônây Hip Nau Tâm Rnglăp Brah Yêhôva hăn ndăch văr jŭm ƀon du tơ̆, jêh nây khân păng sĭt ma pôih tahan jêh ri bê̆ch măng ta nây.

¹² Ang ôi taơ, Y-Yôsuê kah rngăl ơm ôi jêh ri phung kôranh ƀư brah tung Hip Nau Tâm Rnglăp Brah Yêhôva.

¹³ Pơh nuyh phung kôranh ƀư brah djôt pơh mlâm nŭng ma nke hăn panăp Hip Nau Tâm Rnglăp Brah Yêhôva, nkre hăn nkre uh nŭng. Phung djôt ndơ tâm lơh hăn lor panăp; phung tahan gak pakơi hăn tĭng groi pakơi Hip Nau Tâm Rnglăp Brah Yêhôva. Khân păng nkre hăn nkre uh nŭng.

¹⁴ Nar tal bar, khân păng hăn ndăch văr jŭm ƀon du tơ̆, jêh nây khân păng plơ̆ sĭt ma pôih tahan. Khân păng ƀư tâm ban lĕ tâm prao nar.

¹⁵ Tât nar tal pơh, khân păng kah rngăl ơm, ntơm ƀhit rvi ang, hăn ndăch văr jŭm ƀon pơh tơ̆ tâm ban ma lor. Knŏng êng nar nây khân păng hăn ndăch văr jŭm ƀon pơh tơ̆.

¹⁶ Tât tal pơh, tơlah phung kôranh ƀư brah uh nŭng, Y-Yôsuê lah ma phung ƀon lan: “Troh nter hom, yorlah Brah Yêhôva hŏ ăn jêh ƀon aơ ma khân may.

¹⁷ Ƀon jêh ri lĕ rngôch ndơ tâm ƀon jêng ndơ prăp ma Brah Yêhôva ƀư rai lơi. Knŏng du huê H'Rahap bu ur văng tĭr jêh ri lĕ rngôch phung gŭ tâm ngih ndrel ma păng mra dơi rêh, yorlah păng hŏ sâm pôn an jêh phung mbơh bơh he hŏ đă hăn.

¹⁸ Ƀiălah du ngai hom lĕ ndơ prăp ma nau ƀư rai. Yorlah tơlah khân may sŏk lĕ ndơ prăp ƀư rai lơi, khân may mra ƀư ma pôih tahan phung Israel jêng ndơ prăp ma nau ƀư rai, jêh ri djôt nau uh ah lăp tâm pôih tahan nây.

¹⁹ Lĕ rngôch prăk, mah, jêh ri lĕ glah ma kông, ma loih jêng ndơ prăp kloh ueh ma Brah Yêhôva; lĕ ndơ nây mra nglăp tâm jay prăp Brah Yêhôva.”

²⁰ Pônây phung ƀon lan troh nter jêh ri phung kôranh ƀư brah uh nŭng. Tơlah phung ƀon lan tăng bâr nŭng, khân păng troh nter dŭt huy jêh ri mpêr ƀon rlâm lĕ; phung ƀon lan hao lăp tâm ƀon, ăp nơm hăn hao song panăp jêh ri pit sŏk ƀon.

²¹ Khân păng sŏk đao ƀư rai lĕ rngôch mpa rêh tâm ƀon, nđâp bu klâu, bu ur, bu ranh, kon se nđâp ma ndrôk, biăp, jêh ri seh bri.

²² Rnôk nây, Y-Yôsuê lah ma bar hê hăn n'hut uănh jêh bri: “Lăp hom tâm ngih bu ur văng tĭr, djôt leo bu ur nây jêh ri lĕ rngôch bunuyh păng hăn luh bơh ngih păng, tĭng nâm khân may ton jêh ma păng.”

²³ Pônây bar hê phung ndăm hŏ hăn n'hut uănh jêh lăp tâm ngih nây, ngluh H'Rahap, mbơ̆ mê̆ păng, phung oh nâu păng, jêh ri lĕ ndô ndơ păng luh bơh ngih păng. Khân păng djôt leo lĕ phung tâm ngih păng luh jêh ri ăn khân păng gŭ padih pôih tahan phung Israel.

²⁴ Jêh nây khân păng su lơi ƀon ma ŭnh jêh ri lĕ rngôch ndơ tâm trôm ƀon, knŏng nglăp tâm jay prăp Brah Yêhôva prăk, mah, lĕ glah ma kông, ma loih.

²⁵ Ƀiălah Y-Yôsuê prăp nau rêh ma H'Rahap bu ur văng tĭr nđâp ma ngih mbơ̆ păng jêh ri lĕ rngôch ndơ păng. Păng gŭ rêh tâm nklang phung Israel kŏ tât ta nar aơ, yorlah păng sâm pôn jêh phung mbơh bơh Y-Yôsuê đă hăn n'hut uănh Yêrikô.

²⁶ Rnôk nây, Y-Yôsuê ton lah: “Mbu ndâk jêh ri rdâk njêng đŏng ƀon Yêrikô aơ Mra geh nau rak rtăp tanăp Brah Yêhôva! Mbu nơm n'gân tay mbon, kon bu klâu bôk rah păng khĭt; Mbu nơm rdâk tay mpông, kon mpô̆t păng khĭt.”

²⁷ Pônây Brah Yêhôva gŭ ndrel ma Y-Yôsuê, jêh ri păng geh nau lư n'găr lam bri.