Yôsuê 5 - Nau Brah Ndu Ngơi 2023

¹ Lah lĕ rngôch phung hađăch Amôrit gŭ đah ri dak krong Yurdan mpeh nhâp nar, jêh ri lĕ rngôch phung hađăch Kanaan gŭ dăch dak mƀŭt tăng nau Brah Yêhôva hŏ ƀư jêh ma dak krong Yurdan suăt kroh tanăp phung ƀon lan Israel kŏ tât hăn rgăn lăn jêh, pôri khân păng rdja nuih n'hâm jêh ri mâu hôm blau mĭn ôh gay tâm rdâng đah phung ƀon lan Israel.

Y-Yôsuê ƀư koh ntâu ma phung ƀon lan

² Rnôk nây, Brah Yêhôva lah ma Y-Yôsuê: “Ƀư hom pêh ma lŭ ŭnh jêh ri koh ntâu đŏng ma phung Israel tal bar.”

³ Pônây Y-Yôsuê ƀư pêh ma lŭ ŭnh jêh ri koh ntâu ma phung ƀon lan Israel ta yôk Haralôt.

⁴ Yor nau nây dĭng Y-Yôsuê koh ntâu ma khân păng: Lĕ rngôch phung bu klâu tâm phung ƀon lan hŏ luh jêh bơh Êjipt, jêng lĕ tahan, hŏ khĭt ta rŏ trong da dê tâm bri rdah, lah jêh khân păng du luh bơh Êjipt.

⁵ Lĕ rngôch phung ƀon lan hŏ luh bơh Êjipt geh nau koh ntâu, ƀiălah lĕ rngôch phung mhe bu deh rŏ trong tâm bri rdah, jêh du luh bơh Êjipt ê mâp geh nau koh ntâu ôh.

⁶ Yorlah phung ƀon lan Israel hŏ hăn tâm bri rdah puăn jât năm kŏ tât ma lĕ rngôch phung ƀon lan jêh ri lĕ phung tahan hŏ du luh bơh Êjipt khĭt ƀhiau, yorlah mâu tông bâr Brah Yêhôva. Brah Yêhôva hŏ ton ma khân păng pô aơ Păng mâu ăn ma khân păng saơ neh Brah Yêhôva hŏ ton ma chô yau khân păng mra ăn ma he, jêng neh bêng ma dak toh jêh ri dak sŭt.

⁷ Jêh ri Păng hŏ n'hao phung kon sau khân păng gay ntrok ta ntŭk khân păng, jêng phung Y-Yôsuê koh ntâu, yorlah khân păng ê mâp geh ôh nau koh ntâu ta rŏ trong.

⁸ Tơlah lĕ rngôch phung ƀon lan lôch jêh nau koh ntâu, khân păng gŭ ta ntŭk khân păng tâm rmlak tahan kŏ tât khân păng lĕ bah.

Prăp rƀŭn Nau Găn

⁹ Rnôk nây, Brah Yêhôva lah ma Y-Yôsuê: “Nar aơ Gâp hŏ sŏk lơi nau bêk prêng khân may bơh Êjipt.” Yor nây bu ntơ ma ntŭk nây jêng Gilgal kŏ tât ta nar aơ.

¹⁰ Phung ƀon lan Israel ƀư rmlak ta Gilgal tâm neh lâng Yêrikô, jêh ri prăp rƀŭn Nau Găn di tâm nar jât mpuăn khay nĕ, rnôk kêng măng.

¹¹ Ta nar pakơi, jêh rƀŭn Nau Găn, tâm nar nĕ, khân păng sông sa play bơh neh tă bri nây, piăng let mâu geh ndrui, jêh ri ba vâr.

¹² Lah khân păng sa play do tă bơh bri nây, pôri tât nar ôi taơ, mâu hôm geh ôh mana jêh ri phung ƀon lan Israel mâu hôm geh mana đŏng ôh, ƀiălah tâm năm nây khân păng sông sa kao play tă bơh neh Kanaan.

Y-Yôsuê saơ nau tâm mpơl

¹³ Dôl Y-Yôsuê gŭ dăch Yêrikô, păng n'gơr măt uănh, păng saơ du huê bunuyh djôt đao rnglay dâk tra năp măt păng. Y-Yôsuê hăn văch dăch ma păng jêh ri ôp: “May mpeh ma hên mâu lah mpeh ma phung rlăng hên?”

¹⁴ Păng plơ̆ lah: “Mâu gŭ mpeh bu aơ bu ri ôh, ƀiălah aƀaơ gâp văch jêng kôranh chiă uănh ma phung tahan Brah Yêhôva.” Y-Yôsuê păn ro muh măt ta neh, yơk mbah jêh ri ôp: “Moh nau Kôranh Brah ntăm ma oh mon May?”

¹⁵ Kôranh chiă uănh ma phung tahan Brah Yêhôva lah ma Y-Yôsuê: “Doh lơi hom ntâu jot tă bơh jâng may, yorlah ntŭk may gŭ dâk nây jêng neh kloh ueh.” Y-Yôsuê ƀư tâm ban pônây lĕ.