Yôsuê 4 - Nau Brah Ndu Ngơi 2023

Ndray jât bar mlâm lŭ

¹ Tơlah lĕ rngôch ƀon lan hŏ rgăn jêh dak krong Yurdan, Brah Yêhôva lah ma Y-Yôsuê:

² “Săch hom jât ma bar nuyh tâm phung ƀon lan, ăp ndŭl mpôl du huê

³ jêh ri ntăm ma khân păng: ‘Sŏk hom jât ma bar mlâm lŭ tâm nklang dak krong Yurdan, ntŭk jâng phung kôranh ƀư brah gŭ nsrâng jêh ri djôt leo lŭ nây ndrel ma khân may, n'gân ta ntŭk khân may bê̆ch măng aơ.’”

⁴ Pônây Y-Yôsuê kuăl jât ma bar nuyh păng hŏ săch jêh tă bơh phung ƀon lan Israel, ăp ndŭl mpôl du huê,

⁵ jêh ri lah ma khân păng: “Văch hom lor panăp Hip Nau Tâm Rnglăp Yêhôva Brah Ndu khân may tâm nklang dak krong Yurdan, jêh ri ăp nơm, tĭng nâm ndah âk phung ndŭl mpôl Israel, tuy du mlâm lŭ ta klơ săng nglik khân păng nơm,

⁶ gay ma nau aơ dơi jêng du nau tâm mbên tâm nklang khân may. Du nar kăndơ̆, tơlah phung kon sau khân may mra ôp pô aơ: ‘Lĕ rplay lŭ aơ mâm nau bu ntĭt?’

⁷ khân may plơ̆ lah hom pô aơ: Dak ta dak krong Yurdan suăt tăch grăl tanăp Hip Nau Tâm Rnglăp Brah Yêhôva. Lah Hip Nau Tâm Rnglăp rgăn dak krong Yurdan dak krong tâm rnglah jêh ri lĕ rplay lŭ aơ jêng ndơ ndray n'ho ro ma phung ƀon lan Israel.”

⁸ Pônây phung ƀon lan Israel ƀư tĭng nâm nau Y-Yôsuê đă jêh, sŏk jât ma bar mlâm lŭ tă bơh ta nklang dak krong Yurdan tĭng ăp ndŭl mpôl phung ƀon lan Israel jêh ri djôt leo lŭ nây rgăn dak krong, tât ta ntŭk khân păng bê̆ch măng nây jêh ri n'gân ta nây di nâm Brah Yêhôva hŏ lah jêh ma Y-Yôsuê.

⁹ Y-Yôsuê tâm ban đŏng ndâk jât ma bar mlâm lŭ tâm nklang dak krong Yurdan, ta ntŭk jâng phung kôranh ƀư brah tung Hip Nau Tâm Rnglăp hŏ dâk. Lĕ rplay lŭ nây ăt hôm gŭ ta nây kŏ tât ta nar aơ.

¹⁰ Lĕ phung kôranh ƀư brah tung Hip Nau Tâm Rnglăp gŭ nsrâng tâm nklang dak krong Yurdan kŏ tât ƀư jêh lĕ kan Brah Yêhôva hŏ lah ma Y-Yôsuê đă ntăm tay ma phung ƀon lan tĭng di nâm nau Y-Môis ntăm jêh ma Y-Yôsuê. Jêh nây phung ƀon lan ndal rgăn dak krong Yurdan.

¹¹ Lah lĕ rngôch phung ƀon lan lĕ rgăn dak krong jêh pôri Hip Nau Tâm Rnglăp Brah Yêhôva jêh ri phung kôranh ƀư brah tâm ban đŏng hăn rgăn panăp phung ƀon lan.

¹² Phung kon sau Ruben, kon sau phung Gat, jêh ri du n'gul ndŭl mpôl Manasê djôt ndơ tâm lơh hăn lor panăp phung ƀon lan Israel, di nâm nau Y-Môis ntĭnh jêh ma khân păng.

¹³ Geh tâm puăn rmưn bunuyh djôt jêh ndơ lơh gay hăn tâm lơh, hăn rgăn tanăp Brah Yêhôva, hăn rduh lơh lĕ neh lâng Yêrikô, gay tâm lơh đah phung rlăng.

¹⁴ Tâm nar nây, Brah Yêhôva ƀư ma Y-Yôsuê geh nau yơk tanăp măt lĕ rngôch phung ƀon lan Israel; khân păng yơk ma păng tâm lĕ nar păng gŭ rêh tâm ban ma khân păng hŏ yơk ma Y-Môis.

¹⁵ Brah Yêhôva lah ma Y-Yôsuê:

¹⁶ “Ntĭnh hom ma kôranh ƀư brah tung Hip Nau Tâm Rnglăp du luh tă bơh dak krong Yurdan.”

¹⁷ Pônây Y-Yôsuê ntăm ma phung kôranh ƀư brah: “Du luh hom tă bơh dak krong Yurdan.”

¹⁸ Lah phung kôranh ƀư brah tung Hip Nau Tâm Rnglăp Brah Yêhôva tă bơh nklang dak krong Yurdan hăn hao, jêh ri tơlah mpang jâng khân păng chuat jêh ta neh kơh, dak krong Yurdan plơ̆ sĭt ƀoi ơm, hoch bêng ler bar kơh nâm bu saơm.

Phung ƀon lan ƀư rmlak ta Gilgal

¹⁹ Lơ jât khay nguay, phung ƀon lan luh tă bơh dak krong Yurdan jêh ri ƀư rmlak ta Gilgal, ta nglĕ dŭt mpeh luh nar Yêrikô.

²⁰ Y-Yôsuê ndâk ta Gilgal jât ma bar mlâm lŭ khân păng sŏk tă tâm dâng dak krong Yurdan.

²¹ Păng lah ma phung ƀon lan Israel: “Du nar kăndơ̆, tơlah phung kon sau khân may ôp ma mbơ̆ khân păng: ‘lĕ rplay lŭ aơ mâm nau bu ntĭt?’

²² Rnôk nây khân may mra lah ma phung kon sau khân may gĭt pô aơ: ‘Israel hŏ hăn rgăn jêh dak krong Yurdan aơ ta neh sơh,

²³ yorlah Yêhôva Brah Ndu khân may hŏ ƀư jêh dak krong Yurdan suăt kroh tanăp măt khân may kŏ tât nôk khân may hŏ hăn rgăn jêh, tâm ban Yêhôva Brah Ndu khân may ƀư jêh ma Dak Mƀŭt Chăng, ƀư ăn păng suăt kroh tanăp măt he kŏ tât lĕ he hŏ rgăn jêh dak mƀŭt.’

²⁴ Pônây, lĕ rngôch phung bunuyh ta neh ntu dơi gĭt mpang ti nau dơi Brah Yêhôva, jêh ri khân may tâm ban đŏng klach yơk ma Yêhôva Brah Ndu khân may ƀaƀơ.”