Yôsuê 3 - Nau Brah Ndu Ngơi 2023

Phung Israel rgăn dak krong Yurdan

¹ Tă bơh Sitim, Y-Yôsuê dâk ơm ôi, ndrel ma phung Israel hăn tât ta dak krong Yurdan, jêh ri khân păng bê̆ch măng ta nây êlor rgăn dak krong.

² Lôch pe nar, phung kôranh chiă uănh hăn lam rmlak tahan,

³ ntăm ma phung ƀon lan pô aơ: “Lah khân may saơ Hip Nau Tâm Rnglăp Yêhôva Brah Ndu khân may phung kôranh ƀư brah Lêvi tung hăn, ăn khân may du luh bơh ntŭk khân may jêh ri tĭng groi pakơi hip nây.

⁴ Ƀiălah, vah vang khân may đah Hip Nau Tâm Rnglăp tâm ƀah sĭn rhiăng met, lơi hăn dăch gay khân may dơi gĭt trong khân may mra hăn, yorlah khân may mâu mâp hăn trong aơ.”

⁵ Y-Yôsuê lah ma phung ƀon lan: “Ƀư kloh hom khân may nơm, yorlah nar ôi taơ Brah Yêhôva mra ƀư âk nau kan khlay ngăn ta nklang khân may.”

⁶ Y-Yôsuê lah ma kôranh ƀư brah: “Tung hom Hip Nau Tâm Rnglăp hăn rgăn dak krong lor panăp phung ƀon lan.” Pônây khân păng tung Hip Nau Tâm Rnglăp jêh ri hăn lor panăp phung ƀon lan.

⁷ Brah Yêhôva lah ma Y-Yôsuê: “Nar aơ Gâp mra ntơm ƀư ma may geh nau yơk tanăp măt lĕ rngôch bunuyh ƀon lan Israel, gay ma khân păng dơi gĭt Gâp mra gŭ ndrel ma may tâm ban Gâp hŏ gŭ jêh ndrel ma Y-Môis.

⁸ Ăn may ntăm ma phung kôranh ƀư brah tung Hip Nau Tâm Rnglăp pô aơ: ‘Tơlah khân may dăch tât ta kơh dak krong Yurdan, gŭ nsrâng hom ta nklang n'hong.’”

⁹ Y-Yôsuê lah ma phung ƀon lan Israel: “Hăn dăch hom, iăt nau Yêhôva Brah Ndu khân may ngơi.”

¹⁰ Jêh ri Y-Yôsuê lah: “Yor nau nây, khân may mra gĭt ma Brah Ndu gŭ rêh mro mrăng gŭ ta nklang khân may, Păng mra mprơh lĕ phung Kanaan, phung Hitit, phung Hivit, phung Pêrisit, phung Girgasit, phung Amôrit, jêh ri Jêbusit du tă bơh năp khân may.

¹¹ Aơ, Hip Nau Tâm Rnglăp Kôranh Brah ma lĕ neh ntu hăn lor panăp khân may, rgăn dak krong Yurdan.

¹² Pônây săch hom jât ma bar nuyh bơh phung ndŭl mpôl Israel, ăp ndŭl mpôl du huê.

¹³ Tơlah phung kôranh ƀư brah tung Hip Nau Tâm Rnglăp Brah Yêhôva, jêng Kôranh Brah ma lĕ neh ntu, lah jâng khân păng jot tâm dak krong Yurdan, dak krong mâu hôm hoch ôh, jêh ri dak hoch tă bơh tu mra nsŭn ta du ntŭk.”

¹⁴ Lah phung ƀon trơn rmlak khân păng gay rgăn kơh ri dak krong Yurdan, phung kôranh ƀư brah tung Hip Nau Tâm Rnglăp hăn lor panăp phung ƀon lan.

¹⁵ Nôk nây, dak krong Yurdan hao toyh ler tât ta kơh dôl tâm lĕ yan kăch. Tơlah phung tung Hip Nau Tâm Rnglăp tât ta dak krong Yurdan, jêh ri jâng phung kôranh ƀư Brah tung Hip Nau Tâm Rnglăp lah nđĭl ta dak

¹⁶ pôri dak bơh tu nsrŭng hoch, nsŭn du ntŭk, ngai tât ta ƀon Ađam, ƀon nây gŭ dăch ƀon Sarêthan; bi dak hoch mpeh ma dak mƀŭt Arabah, jêng Dak Mƀŭt Khĭt, nking lĕ ro, jêh ri phung ƀon lan rgăn dak krong, ta ntŭk tâm tham đah ƀon Yêrikô.

¹⁷ Phung kôranh ƀư brah tung Hip Nau Tâm Rnglăp Brah Yêhôva gŭ nsrâng ta neh sơh tâm nklang dak krong Yurdan, dôl lĕ rngôch phung Israel hăn rgăn ta neh sơh, kŏ tât lĕ rngôch phung ƀon lan rgăn jêh dak krong Yurdan.