Yôsuê 24 - Nau Brah Ndu Ngơi 2023

Ƀư nâp tay nau tâm rnglăp ta Sichem

¹ Y-Yôsuê tâm rƀŭn lĕ rngôch phung ndŭl mpôl Israel ta ƀon Sichem, jêh ri păng kuăl rgum phung bu ranh, phung kôranh chiă uănh, phung kôranh phat dôih jêh ri phung kôranh tahan Israel, jêh ri mpơl măt khân păng nơm panăp Brah Ndu.

² Y-Yôsuê lah ma lĕ rngôch phung ƀon lan pô aơ: “Brah Yêhôva, Brah Ndu phung Israel, geh lah: ‘Rnôk kăl e, phung chô yau khân may jêng Y-Têra, mbơ̆ ma Y-Abraham jêh ri Y-Nahôr, gŭ ta kơh đah ri dak krong Ơphrat jêh ri pah kan ma phung brah êng.

³ Ƀiălah Gâp djôt leo jêh Y-Abraham, chô yau khân may, bơh đah ri dak krong jêh ri njŭn păng hăn lam lĕ bri Kanaan, ăn Y-Isăk ma păng jêh ri ƀư ma noi deh păng deh kon bĭk rơ̆.

⁴ Gâp ăn Y-Yakôb jêh ri Y-Êsau ma Y-Isăk, jêh nây ăn bri klơ dor Sêir ma Y-Êsau ƀư drăp ndơn, ƀiălah Y-Yakôb jêh ri phung kon păng hăn trŭnh ma Êjipt da dê.

⁵ Jêh nĕ, Gâp prơh hăn Y-Môis jêh ri Y-Arôn, jêh ri Gâp ntŭp lĕ nau mhĭk ta Êjipt jêh nau nây gâp djôt khân may du luh bơh nĕ.

⁶ Gâp djôt leo phung chô yau khân may du luh bơh Êjipt jêh ri hăn tât ma dak mƀŭt. Phung Êjipt tĭng phung chô yau khân may ma ndeh seh jêh ri phung tahan ncho seh tât ma Dak Mƀŭt Chăng.

⁷ Rnôk nây, tơlah phung chô yau khân păng nter dăn ma Brah Yêhôva, Gâp ăn tât nau ngo klĕng jŭr vah vang khân may đah phung Êjipt, ăn dak mƀŭt tâp brôi lĕ khân păng. Măt phung chô yau khân păng hŏ saơ jêh nau Gâp ƀư ma phung Êjipt. Jêh nau nây, khân may gŭ tâm bri rdah jŏ jêh.

⁸ Jêh nây, Gâp njŭn khân may mŭt ta n'gor phung Amôrit, gŭ kơh đah ri dak krong Yurdan. Khân păng tâm lơh đah khân may, jêh ri Gâp jao khân păng tâm ti khân may. Khân may pit sŏk bri khân păng ƀư drăp ndơn khân may, jêh ri Gâp ƀư rai khân păng bơh khân may.

⁹ Y-Balak, kon bu klâu Y-Sipôr, hađăch bri Môap, dâk tâm lơh đah phung Israel jêh ri păng prơh bu hăn jă Y-Balaam, kon bu klâu Y-Bêôr, đă rak rtăp ma khân may.

¹⁰ Ƀiălah Gâp mâu ŭch iăt nau Y-Balaam ôh; yor ri, păng nchâp ăn nau ueh uĭn ma khân may, jêh ri Gâp hŏ rklaih jêh khân may bơh ti Y-Balak.

¹¹ Jêh khân may rgăn dak krong Yurdan, hŏ tât jêh ma ƀon Yêrikô. Phung ƀon lan Yêrikô, tâm ban ma phung Amôrit, phung Pêrisit, phung Kanaan, phung Hitit, phung Girgasit, phung Hivit, jêh ri phung Jêbusit hăn lơh khân may, jêh ri Gâp jao jêh khân păng tâm ti khân may.

¹² Gâp njuăl ong bôk kla panăp khân may mprơh bar hê hađăch phung Amôrit luh bơh khân may; nây mâu di ma đao mâu lah ma na khân may ôh.

¹³ Gâp ăn neh ma khân may ƀiălah khân may mâu mâp muyh kăl ôh, âk ƀon khân may mâu mâp ndâk ôh jêh ri khân may gŭ tâm nây; lĕ đang krăk ƀâu jêh ri đang ôlive khân may mâu mâp tăm ôh ƀiălah khân may dơi sa păng.’

¹⁴ Pônây aƀaơ ri, klach yơk hom ma Brah Yêhôva jêh ri pah kan ma Păng ma lĕ nuih n'hâm jêh ri ma nau răp jăp. Mƀăr lơi hom phung brah phung chô yau khân may pah kan ta đah ri dak krong tâm ban ma tâm n'gor Êjipt jêh ri knŏng pah kan hom ma Brah Yêhôva.

¹⁵ Tơlah khân may mâu ŭch pah kan ma Brah Yêhôva ôh, nar aơ săch hom ma mbu nơm khân may ŭch pah kan, mâu lah phung brah phung chô yau khân may hŏ pah kan jêh ta kơh đah ri dak krong, mâu lah brah phung Amôrit tâm bri khân may gŭ. Ƀiălah gâp jêh ri phung tâm ngih gâp mra pah kan ma Brah Yêhôva.”

¹⁶ Phung ƀon lan plơ̆ sĭt pô aơ: “Hên ngơi n'hêl ngăn mâu chalơi ôh Brah Yêhôva gay pah kan ma phung brah êng!

¹⁷ Yorlah Yêhôva Brah Ndu he, Păng nơm njŭn leo jêh hên jêh ri phung chô yau hên du luh bơh Êjipt, jêng luh bơh ngih dĭk. Păng ƀư jêh lĕ nau mbên khlay toyh ngăn ngên tanăp măt hên jêh ri king n'gang hên tâm lĕ nau nsong jêh ri ta nklang lĕ rngôch phung ƀon lan hên hŏ rgăn.

¹⁸ Brah Yêhôva mprơh jêh tanăp hên lĕ rngôch phung ƀon lan, nđâp ma phung Amôrit jêng phung ƀon lan tơm bri. Yor ri, hên tâm ban đŏng mra pah kan ma Brah Yêhôva, yorlah Păng jêng Brah Ndu hên.”

¹⁹ Y-Yôsuê lah ma phung ƀon lan: “Khân may mâu dơi tŏng nau dăng pah kan ma Brah Yêhôva, yor lan Păng jêng Brah Ndu kloh ueh, Brah Ndu gĭt ntôn, Păng mâu yô̆ an ôh ma nau kue jêh ri nau tih khân may.

²⁰ Tơlah khân may chalơi Brah Yêhôva jêh ri pah kan ma phung brah bu năch, Păng mra plơ̆ sĭt tay ƀư mhĭk jêh ri ƀư rai khân may, nđâp lah lĕ ƀư lor jêh nau yô̆ ma khân may.”

²¹ Phung ƀon lan lah ma Y-Yôsuê: “Mâu ôh! Hên mra pah kan ma Brah Yêhôva.”

²² Pônây Y-Yôsuê lah ma phung ƀon lan: “Khân may jêng phung mbơh êng ma khân may nơm ma nau khân may hŏ ŭch săch Brah Yêhôva gay pah kan ma Păng.” Khân păng plơ̆ lah: “Hên jêng phung mbơh yơh.”

²³ Y-Yôsuê lah: “Aƀaơ, mƀăr lơi hom phung brah bu năch luh bơh khân may jêh ri rle nuih n'hâm khân may mpeh Brah Yêhôva, Brah Ndu Phung Israel.”

²⁴ Phung ƀon lan lah ma Y-Yôsuê: “Hên mra pah kan ma Yêhôva Brah Ndu hên, jêh ri hên mra tông bâr Păng.”

²⁵ Pônây, tâm nar nây, Y-Yôsuê ƀư nau tâm rnglăp đah phung ƀon lan, ăn lĕ nau vay dăp jêh ri lĕ nau vay ƀư ma khân păng ta ƀon Sichem.

²⁶ Y-Yôsuê nchih lĕ nau vay aơ tâm ndrom samƀŭt nau vay Brah Ndu. Jêh nĕ, păng sŏk du rplay lŭ toyh n'gân ta nây, tâm dâng tơm guyh dăch ntŭk Kloh Ueh Brah Yêhôva.

²⁷ Jêh nây Y-Yôsuê lah ma lĕ rngôch phung ƀon lan: “Aơ, lŭ aơ mra jêng nau mbơh ma phung he, yor păng geh tăng lĕ nau ngơi Brah Yêhôva hŏ ntăm jêh ma phung he; păng mra jêng du nau mbơh ma khân may, klach lah khân may dun ma Brah Ndu khân may nơm.”

²⁸ Y-Yôsuê đă phung ƀon lan sĭt; lĕ rngôch bunuyh plơ̆ sĭt da dê tâm drăp ndơn khân păng nơm.

Bu tâp Y-Yôsuê tâm Neh Ton

²⁹ Jêh lĕ nau nây, oh mon Brah Yêhôva jêng Y-Yôsuê, kon bu klâu Y-Nun, khĭt, dơi rêh du rhiăng jât năm.

³⁰ Bu tâp păng tâm ntŭk păng dơn drăp ta ƀon Timnat-Sêra tâm bri klơ dor Êphraim ta dor pa lơ yôk Gas.

³¹ Phung Israel pah kan ma Brah Yêhôva dôl rnôk Y-Yôsuê hôm rêh jêh ri dôl rnôk phung bu ranh gŭ rêh jŏ lơn ma păng. Nĕ jêng lĕ nau Brah Yêhôva ƀư jêh ma phung Israel.

³² Nting Y-Yôsep phung ƀon lan Israel djôt leo tă bơh Êjipt bu tâp ta ƀon Sichem, tâm lŏ sre Y-Yakôb rvăt jêh bơh phung kon sau Y-Hamôr, mbơ̆ Y-Sichem ma rnoh du rhiăng rplay prăk, jêh ri neh nây jêng drăp ndơn ma phung kon sau Y-Yôsep.

³³ Y-Êlêasar, kon bu klâu Y-Arôn, khĭt, jêh ri bu tâp păng ta ƀon Gêbêa, jêng kô̆ neh ăn ma kon bu klâu păng jêng Y-Phinêas, tâp păng ta ƀon Gêbêa, tâm bri klơ dor yôk Êphraim.