Yôsuê 23 - Nau Brah Ndu Ngơi 2023

Nau Y-Yôsuê nti lah glĕ dŭt

¹ Tơlah Brah Yêhôva ăn nau mpăn rlêk ma phung Israel jŏ jêh, mâu hôm geh phung rlăng gŭ văr jŭm khân păng, jêh ri tơlah Y-Yôsuê lĕ ranh, gŭ rêh jŏ năm jêh,

² Y-Yôsuê kuăl rgum lĕ rngôch phung Israel, phung kôranh bu ranh, phung kôranh chiă uănh, phung kôranh phat dôih, jêh ri kôranh tahan khân păng jêh ri lah pô aơ: “Aƀaơ ri gâp lĕ ranh, gŭ rêh jŏ năm jêh.

³ Khân may hŏ saơ jêh lĕ nau Yêhôva Brah Ndu khân may ƀư jêh ma lĕ rngôch phung ƀon lan aơ yor khân may, Yêhôva Brah Ndu khân may sâm tâm lơh an jêh ma khân may.

⁴ Aơ, gâp nchroh n'hôr jêh ăn neh ma lĕ ndŭl mpôl khân may jêng drăp ndơn khân may jêh ri nđâp ma lĕ rngôch neh phung gâp ƀư rai jêh, bơh dak krong Yurdan tât ta Dak Mƀŭt Toyh, mpeh nhâp nar.

⁵ Yêhôva Brah Ndu khân may mra veng jêh ri prơh phung ƀon lan nây bơh năp măt khân may jêh ri khân may mra pit sŏk bri khân păng, tĭng nâm Yêhôva Brah Ndu khân may ton jêh ma khân may.

⁶ Pônây, ăn khân may nâp nuih n'hâm mât mray jêh ri ƀư tĭng kơt lĕ ntil nau hŏ nchih jêh tâm ndrom samƀŭt nau vay Y-Môis, lơi teng pa ma mâu lah pa chiau ôh.

⁷ Lơi tâm rlŭk ôh đah phung ndŭl mpôl hôm e ta nklang khân may, lơi ta kuăl amoh phung brah khân păng mâu lah sŏk amoh phung brah gay ton săk, jêh ri lơi pah kan mâu lah chon mon mbah panăp phung brah khân păng.

⁸ Ƀiălah tâm rnglăp hom đah Yêhôva Brah Ndu khân may, nâm bu khân may ƀư jêh tât ta nar aơ.

⁹ Yorlah Brah Yêhôva mprơh jêh bơh khân may phung ndŭl mpôl bunuyh toyh jêh ri dăng ktang, jêh ri tât ta nar aơ, mâu geh ôh du huê dơi tâm rdâng đah khân may.

¹⁰ Du huê tâm phung khân may dơi mprơh du rbăn bunuyh phung khân păng, yorlah Yêhôva Brah Ndu khân may jêng Nơm sâm tâm lơh an ma khân may tĭng nâm nau păng ton jêh ma khân may.

¹¹ Pônây, njrăng hom mât mray khân may nơm gay yơk rŏng ma Yêhôva Brah Ndu khân may.

¹² Tơlah khân may plơ̆ nuih n'hâm jêh ri tâm rnglăp đah phung ndŭl mpôl êng hôm gŭ ta nklang khân may jêh ri khân may tâm gŭ ur sai đah phung nây, mâu lah tâm rnglăp ndrel ma khân păng,

¹³ ăn khân may gĭt nanê̆ Yêhôva Brah Ndu khân may mâu mra hôm mprơh phung ndŭl mpôl bunuyh bơh khân may đŏng ôh. Ƀiălah khân păng mra jêng jal seng jêh ri ndơm dăk ma khân may, jêng mâng rvĕ rpăt ta pŭng vĕ khân may, ƀư lok ntâp trôm măt khân may, kŏ tât tơlah khân may rai yot bơh n'gor neh ueh Yêhôva Brah Ndu khân may ăn jêh ma khân may.

¹⁴ Aƀaơ ri gâp dăch hăn tâm trong lĕ phung neh ntu vay hăn. Pôri ma lĕ nuih n'hâm, ma lĕ huêng gĭt năl hom lĕ nau ueh Yêhôva Brah Ndu khân may hŏ ntăm jêh ma khân may, mâu geh du ntil nau mâu di, ƀiălah lĕ rngôch tât di ngăn jêh ma khân may. Nanê̆, mâu geh du ntil nau mâu di.

¹⁵ Tơlah tâm lĕ nau ueh Yêhôva Brah Ndu khân may hŏ lah jêh tât di ngăn jêh ma khân may, pônây lĕ Brah Yêhôva mra djôt lĕ nau mhĭk tât ma khân may đŏng, kŏ tât Păng ƀư rai lơi khân may bơh bri ueh aơ Yêhôva Brah Ndu khân may hŏ ăn jêh ma khân may.

¹⁶ Tơlah khân may rlau nau tâm rnglăp Yêhôva Brah Ndu khân may ntĭnh ntăm jêh ma khân may, jêh ri hăn pah kan ma phung brah êng jêh ri chon mon mbah panăp khân păng, rnôk nây Brah Yêhôva mra hao ji nuih ma khân may, jêh ri khân may mra rai yot gơnh ngăn bơh bri ueh Păng hŏ ăn jêh ma khân may.”