Yôsuê 22 - Nau Brah Ndu Ngơi 2023

Ndŭl mpôl Ruben, Gat jêh ri Manasê plơ̆ sĭt kơh ri dak krong Yurdan

¹ Rnôk nây, Y-Yôsuê kuăl rgum phung Ruben, phung Gat, jêh ri du n'gul phung ndŭl mpôl Manasê

² jêh ri lah: “Khân may djôt prăp jêh lĕ nau Y-Môis, oh mon Brah Yêhôva, ntăm jêh ma khân may, jêh ri tông tĭng lĕ nau gâp ntăm jêh ma khân may.

³ Ntơm bơh jŏ tât ma nar aơ, khân may mâu geh chalơi ôh oh nâu khân may; ƀiălah khân may njrăng djôt prăp lĕ kan, tĭng nâm nau ntăm Yêhôva Brah Ndu khân may.

⁴ Aƀaơ ri, Yêhôva Brah Ndu khân may ăn jêh ma phung oh nâu khân may rlu đăp mpăn di tĭng nâm nau Păng ton jêh ma khân păng. Pônây plơ̆ sĭt hom ma ngih khân may tâm n'gor neh jêng ndơ khân may, Y-Môis, oh mon Brah Yêhôva ăn jêh ma khân may ta kơh đah ri dak krong Yurdan.

⁵ Ƀiălah njrăng hom ƀư tĭng nau vay ntăm jêh ri nau vay bơh Y-Môis, oh mon Brah Yêhôva ntăm jêh ma khân may, gay ăn khân may yơk rŏng ma Yêhôva Brah Ndu khân may, hăn tâm trong Păng, djôt prăp lĕ nau vay Păng ntăm, tâm rnglăp đah Păng, jêh ri pah kan ma Păng ma lĕ nuih n'hâm jêh ri ma lĕ huêng khân may.”

⁶ Jêh nây Y-Yôsuê ăn nau ueh uĭn ma khân păng jêh ri ăn khân păng sĭt. Lĕ rngôch sĭt ma ngih bok khân păng nơm.

⁷ Y-Môis ăn jêh drăp ndơn ma du n'gul ndŭl mpôl Manasê ta Basan; bi Y-Yôsuê ăn jêh drăp ndơn ma du n'gul hôm e ndrel ma phung oh nâu khân păng ta đah aơ dak krong Yurdan, mpeh nhâp nar. Tơlah Y-Yôsuê ăn khân păng plơ̆ sĭt ma ngih khân păng jêh ri păng ăn nau ueh uĭn ma khân păng

⁸ jêh ri lah pô aơ: “Khân may plơ̆ sĭt ndrel ma dŭt âk drăp ndơ, âk mpô mpa rong, nđâp ma mah, prăk, kông, loih, jêh ri âk ngăn kho ao. Tâm pă hom ma phung oh nâu khân may drăp ndơ khân may pit in bơh phung rlăng khân may.”

⁹ Pônây, phung Ruben, phung Gat, jêh ri du n'gul ndŭl mpôl Manasê tâm nkhah đah phung ƀon lan Israel ta ƀon Silô tâm bri Kanaan, gay plơ̆ sĭt ma bri Gilêat, jêng kô̆ neh khân păng nơm hŏ pit sŏk jêh tĭng nâm nau Brah Yêhôva ntăm jêh ma Y-Môis.

Ndâk nơng ƀư brah êp dak krong Yurdan

¹⁰ Tơlah khân păng tât jêh tâm n'gor neh dak krong Yurdan tâm bri Kanaan, phung Ruben, phung Gat, jêh ri du n'gul ndŭl mpôl Manasê ndâk ta nây du nơng ƀư brah toyh ngăn ta meng kơh dak krong Yurdan.

¹¹ Tơlah phung ƀon lan Israel tăng bu nkoch ma phung Ruben, phung Gat, jêh ri du n'gul ndŭl mpôl Manasê ndâk jêh du nơng ƀư brah ta n'gor neh Yurdan tâm bri Kanaan, panăp phung ƀon lan Israel

¹² tơlah phung Israel tâm rƀŭn ta ƀon Silô, gay hăn tâm lơh đah khân păng.

¹³ Phung ƀon lan Israel prơh Y-Phinêas, kon bu klâu kôranh ƀư brah Y-Êlêasar, văch ta phung Ruben, phung Gat, jêh ri du n'gul ndŭl mpôl Manasê tâm bri Gilêat.

¹⁴ Jêh ri hăn ndrel ma păng geh jât kôranh chiă uănh, ăp ndŭl mpôl Israel du huê. Ăp nơm tâm khân păng chiă uănh rbăn rmưn phung Israel.

¹⁵ Khân păng văch ma phung Ruben, phung Gat, jêh ri du n'gul ndŭl mpôl Manasê tâm bri Gilêat jêh ri lah:

¹⁶ “Lĕ rngôch phung tâm rƀŭn Brah Yêhôva lah: ‘Mâm ƀư khân may ƀư tih jêh mâu răp jăp đah Brah Ndu phung Israel pônây? Mâm ƀư nar aơ khân may chalơi Brah Yêhôva gay khân may ndâk du nơng ƀư brah tâm rdâng đah Păng?

¹⁷ Nau tih he ta ƀon Pêôr hŏ ƀư jêh nau mhĭk ma lĕ phung tâm rƀŭn Brah Yêhôva jêh ri n'ho tât ma aƀaơ ri he hôm ê hŏ rao kloh. Nau ƀư tih pônây mâu hŏ mpay lĕ ƀơh?

¹⁸ Ƀiălah tâm nar aơ khân may chalơi tay Brah Yêhôva ƀơh? Tơlah nar aơ khân may tâm rdâng đah Brah Yêhôva, nar ôi taơ Păng mra ji nuih ngăn yơh ma lĕ phung Israel tâm rƀŭn.

¹⁹ Tơlah bri khân may pit sŏk jêh mâu ƀơ̆ ƀơch ôh, ăn khân may hăn rlet ma kô̆ neh drăp ndơn Brah Yêhôva, jêng ntŭk ngih bok Brah Yêhôva gŭ, gay dơn sŏk kô̆ neh ta nklang hên. Ƀiălah lơi ƀư nau tâm rdâng ôh đah Brah Yêhôva mâu lah tâm rdâng đah hên, gay rdâk ma khân may nơm du nơng ƀư brah êng ngăn đah nơng ƀư Brah Yêhôva Brah Ndu he.

²⁰ Mâu di hĕ Y-Akan, kon bu klâu Y-Sêra hŏ ƀư tih mâu răp jăp ôh yor ndơ prăp ma nau ƀư rai jêh, dĭng nau ji nuih Brah Yêhôva hao tât ma lĕ phung Israel tâm rƀŭn? Jêh ri mâu di knŏng du huê păng nơm ôh khĭt yor nau kue păng!’”

²¹ Rnôk nây, phung Ruben, phung Gat, jêh ri du n'gul ndŭl mpôl Manasê plơ̆ lah ma phung kôranh rnăk vâl âk rbăn rmưn phung Israel pô aơ:

²² “Brah Yêhôva, jêng Brah ma lĕ phung brah! Brah Yêhôva, jêng Brah ma lĕ phung brah! Păng gĭt nau aơ jêh ri phung Israel mra gĭt đŏng nau aơ! Tơlah aơ jêng nau tâm rdâng mâu lah mâu răp jăp ôh đah Brah Yêhôva, nar aơ lơi ta nhhuach ma hên ôh!

²³ Tơlah hên geh ndâk du nơng ƀư brah gay chalơi Brah Yêhôva, mâu lah gay nhhơr ndơ ƀư brah gŭch, ndơ ƀư brah rnih môi, jêh ri ndơ ƀư brah ma nau đăp mpăn ta nây, Brah Yêhôva nơm yơh har plơng hên!

²⁴ Hên ndâk nơng ƀư brah nây, yor hên klach phung kon sau khân may du nar kăndơ̆ mra lah ma phung kon sau hên: ‘Moh nau khlay khân may geh đah Brah Yêhôva, Brah Ndu Phung Israel?

²⁵ Hơi phung Ruben, phung Gat, Brah Yêhôva dơm jêh dak krong Yurdan jêng n'har vah vang hên đah khân may, khân may mâu geh du kô̆ tâm Brah Yêhôva!’ Pônây phung kon sau khân may mra ƀư phung kon sau hên mâu thoi đŏng nau klach yơk ma Brah Yêhôva.

²⁶ Yor ri, hên lah pô aơ he mra ndâk du nơng ƀư brah, mâu di nhhơr ndơ ƀư brah gŭch mâu lah nhhơr mpa ƀư brah,

²⁷ ƀiălah gay geh du nau mbơh vah vang hên đah khân may nđâp ma lĕ rngôch rô̆ kăndơ̆ hên pô aơ hên geh nhhơr ndơ ƀư brah gŭch, lĕ mpa ƀư brah jêh ri ndơ ƀư brah ma nau đăp mpăn gay yơk mbah Brah Yêhôva tanăp Păng. Pônây, nar kăndơ̆ phung kon sau khân may mâu lah ma phung kon sau hên: ‘Khân may mâu geh du kô̆ tâm Brah Yêhôva ôh!’

²⁸ Hên lah đŏng pô aơ ndah jŏ khân păng lah nau aơ ma hên mâu lah ngơi ma lĕ rngôch rô̆ hên kăndơ̆, hên mra plơ̆ lah: ‘Uănh hom rup nơng ƀư brah Brah Yêhôva phung chô yau hên hŏ ƀư jêh, mâu di ôh ma nau ndơ ƀư brah gŭch mâu lah nhhơr mpa ƀư brah, ƀiălah gay geh du nau mbơh vah vang hên jêh ri khân may!’

²⁹ Hên nar aơ mâu geh nau mĭn ŭch tâm rdâng đah Brah Yêhôva jêh ri mâu lĕ chalơi Păng, gay ndâk du nơng ƀư brah êng lơn ma nơng ƀư brah panăp ngih bok Yêhôva Brah Ndu he gay nhhơr ndơ ƀư brah gŭch, ndơ ƀư brah rnih môi jêh ri mpa ƀư brah.”

³⁰ Tơlah kôranh ƀư brah Y-Phinêas jêh ri phung kôranh chiă uănh phung tâm rƀŭn, jêng phung kôranh chiă uănh ma âk rbăn phung Israel hăn tĭng păng, tăng lĕ nau phung Ruben, phung Gat, jêh ri du n'gul ndŭl mpôl Manasê ngơi, khân păng di nuih da dê.

³¹ Y-Phinêas, kon bu klâu kôranh ƀư brah Y-Êlêasar, lah ma phung Ruben, phung Gat, jêh ri phung Manasê pô aơ: “Nar aơ hên gĭt năl pô aơ Brah Yêhôva gŭ tâm nklang he, yorlah khân may mâu ƀư tih nau mâu răp jăp đah Brah Yêhôva ôh, pônây khân may tâm rklaih jêh phung ƀon lan Israel bơh ti Brah Yêhôva.”

³² Y-Phinêas, kon bu klâu kôranh ƀư brah Y-Êlêasar, jêh ri phung kôranh chiă uănh hŏ tâm nkhah đah phung Ruben, jêh ri phung Gat, tâm bri Gilêat, plơ̆ sĭt đah phung ƀon lan Israel ta bri Kanaan jêh ri nkoch tay ma khân păng nau lĕ tât jêh.

³³ Iăt nau mbơh tay nây, phung ƀon lan Israel di nuih. Khân păng tâm rnê ma Brah Ndu jêh ri mâu hôm nau mĭn ôh hăn hao lơh phung Ruben jêh ri phung Gat gay ƀư rai n'gor neh khân păng gŭ đŏng.

³⁴ Pônây, phung Ruben, jêh ri phung Gat ntơ ma nơng ƀư brah nây jêng Ed, yorlah khân păng lah: “Nơng ƀư brah nây jêng du nau mbơh ma he Brah Yêhôva jêng Brah Ndu.”