Yôsuê 21 - Nau Brah Ndu Ngơi 2023

Puăn jât ma pham ƀon ƀơk ma phung Lêvi

¹ Rnôk nây, phung kôranh ndŭl mpôl phung Lêvi hăn ma kôranh ƀư brah Y-Êlêasar, ma Y-Yôsuê kon bu klâu Y-Nun jêh ri ma phung kôranh ndŭl mpôl ma lĕ ndŭl mpôl phung Israel,

² jêh ri lah ma khân păng ta ƀon Silô ta bri Kanaan pô aơ: “Brah Yêhôva ntăm jêh ma Y-Môis ăn lĕ ƀon ma hên gŭ jêh ri lĕ ndrêch gơ̆ jŭm ƀon prăp ma mpô mpa hên rong.”

³ Pônây, phung ƀon lan Israel tông tĭng nâm nau Brah Yêhôva ntăm, sŏk tâm drăp ndơn khân păng lĕ ƀon pakơi aơ jêh ri lĕ ndrêch gơ̆ văr jŭm ƀon gay ăn ma phung Lêvi.

⁴ Lĕ ndŭl mpôl nchroh n'hôr dơi geh kô̆ ma khân păng nơm: Phung kon sau kôranh ƀư brah Y-Arôn tâm noi deh Lêvi nchroh n'hôr dơi geh jât ma pe rplay ƀon bơh ndŭl mpôl Yuđa, ndŭl mpôl Simêôn, jêh ri ndŭl mpôl Benjamin.

⁵ Phung kon sau êng Y-Kôhat nchroh n'hôr geh jât rplay ƀon bơh ndŭl mpôl Êphraim, ndŭl mpôl Dan, jêh ri du n'gul ndŭl mpôl Manasê.

⁶ Phung kon sau Y-Gersôn nchroh n'hôr geh jât ma pe rplay ƀon bơh ndŭl mpôl Isakar, ndŭl mpôl Aser, ndŭl mpôl Naptali, jêh ri du n'gul ndŭl mpôl Manasê ta Basan.

⁷ Phung kon sau Mêrari tĭng nâm ăp ndŭl mpôl khân păng, geh jât ma bar rplay ƀon bơh ndŭl mpôl Ruben, ndŭl mpôl Gat, jêh ri ndŭl mpôl Sabulôn.

⁸ Phung ƀon lan Israel nchroh n'hôr ăn ma phung Lêvi lĕ ƀon nây ndrel ma lĕ ndrêch gơ̆ gŭ văr jŭm păng, di nâm Brah Yêhôva ntăm jêh ma Y-Môis.

⁹ Phung ƀon lan Israel sŏk lĕ ƀon, geh bu răk tâm dâng aơ, bơh ndŭl mpôl Yuđa jêh ri ndŭl mpôl Simêôn gay ăn ma khân păng.

¹⁰ Phung kon sau Y-Arôn bơh lĕ ndŭl mpôl Kôhat, jêng kon bu klâu Lêvi, sŏk dơn lĕ ƀon nây, yorlah nau nchroh tât ma khân păng lor lơn.

¹¹ Bu ăn ma khân păng ƀon Kiriat-Arba, (Y-Arba jêng mbơ̆ Y-Anak), jêng Hêbron ta klơ dor Yuđa, jêh ri ma lĕ ndrêch gơ̆ văr jŭm ƀon.

¹² Bi ma lĕ mir tâm ƀon jêh ri lĕ ƀon jê̆ păng bu ăn ma Y-Kalep, kon bu klâu Y-Jêphunê, jêng drăp ndơn păng.

¹³ Bu ăn ma phung kon sau Y-Arôn kôranh ƀư brah ƀon Hêbron, jêng ƀon du krap ma nơm lăn lêh ti nkhĭt bunuyh, jêh ri lĕ ndrêch gơ̆ gŭ văr jŭm păng; Lipna jêh ri lĕ ndrêch gơ̆ văr jŭm păng;

¹⁴ Jatir jêh ri lĕ ndrêch gơ̆ gŭ văr jŭm păng; Êstêmôa jêh ri lĕ ndrêch gơ̆ gŭ văr jŭm păng;

¹⁵ Hôlon jêh ri lĕ ndrêch gơ̆ gŭ văr jŭm păng; Dêbir jêh ri lĕ ndrêch gơ̆ gŭ văr jŭm păng;

¹⁶ Ain jêh ri lĕ ndrêch gơ̆ gŭ văr jŭm păng; Juta jêh ri lĕ ndrêch gơ̆ gŭ văr jŭm păng; Bet-Sêmes jêh ri lĕ ndrêch gơ̆ gŭ văr jŭm păng. Nây jêng sĭn rplay ƀon bơh bar ndŭl mpôl aơ.

¹⁷ Bu sŏk đŏng lĕ ƀon bơh ndŭl mpôl Benjamin ăn ma khân păng. Nây jêng ƀon Gibêôn jêh ri lĕ ndrêch gơ̆ gŭ văr jŭm păng; ƀon Gêba jêh ri lĕ ndrêch gơ̆ gŭ văr jŭm păng;

¹⁸ ƀon Anathôt jêh ri lĕ ndrêch gơ̆ gŭ văr jŭm păng; ƀon Almôn jêh ri lĕ ndrêch gơ̆ gŭ văr jŭm păng. Lĕ rngôch jêng puăn ƀon.

¹⁹ Lĕ ƀon phung kôranh ƀư brah, phung kon sau Y-Arôn, lĕ rngôch jêng jât ma pe ƀon jêh ri lĕ ndrêch gơ̆ gŭ văr jŭm păng.

²⁰ Phung Lêvi bơh lĕ ndŭl mpôl phung Kôhat ƀaƀă dơn lĕ ƀon jêng drăp ndơn bơh tâm ndŭl mpôl Êphraim.

²¹ Bu ăn ma khân păng ƀon Sichem jêng ntŭk du krap ma nơm lăn lêh ti nkhĭt bunuyh, ta klơ yôk Êphraim, jêh ri lĕ ndrêch gơ̆ gŭ văr jŭm păng; ƀon Gêser jêh ri lĕ ndrêch gơ̆ gŭ văr jŭm păng;

²² ƀon Kibsaim jêh ri lĕ ndrêch gơ̆ gŭ văr jŭm păng; ƀon Bet-Hôron jêh ri lĕ ndrêch gơ̆ gŭ văr jŭm păng. Lĕ rngôch jêng puăn rplay ƀon.

²³ Bu sŏk lĕ ƀon bơh ndŭl mpôl Dan gay ăn ma khân păng: nây jêng ƀon Êltêkê jêh ri lĕ ndrêch gơ̆ gŭ văr jŭm păng; ƀon Gibêthôn jêh ri lĕ ndrêch gơ̆ gŭ văr jŭm păng;

²⁴ ƀon Aijalon jêh ri lĕ ndrêch gơ̆ gŭ văr jŭm; ƀon Gat-Rimôn jêh ri lĕ ndrêch gơ̆ gŭ văr jŭm păng. Lĕ rngôch jêng puăn rplay ƀon.

²⁵ Bu sŏk đŏng lĕ ƀon bơh du n'gul ndŭl mpôl Manasê: Nĕ jêng ƀon Tanak jêh ri lĕ ndrêch gơ̆ gŭ văr jŭm păng; ƀon Gat-Rimôn jêh ri lĕ ndrêch gơ̆ gŭ văr jŭm păng.

²⁶ Lĕ rngôch jêng jât ƀon jêh ri lĕ ndrêch gơ̆ gŭ văr jŭm păng prăp ma lĕ ndŭl mpôl hôm e bơh noi deh Kôhat.

²⁷ Bu sŏk đŏng lĕ ƀon bơh du n'gul ndŭl mpôl phung Manasê. Nĕ jêng ƀon Gôlan tâm bri Basan, jêng ƀon du krap prăp ma nơm lăn lêh ti nkhĭt bunuyh ăn ma phung kon sau Y-Gersôn tâm rnăk vâl Lêvi, jêh ri lĕ ndrêch gơ̆ gŭ văr jŭm păng; ƀon Bêtêra jêh ri lĕ ndrêch gơ̆ gŭ văr jŭm păng. Lĕ rngôch jêng puăn rplay ƀon.

²⁸ Bu sŏk đŏng lĕ ƀon bơh ndŭl mpôl Isakar, nĕ jêng ƀon Kisiôn jêh ri lĕ ndrêch gơ̆ gŭ văr jŭm păng; Dabêrat jêh ri lĕ ndrêch gơ̆ gŭ văr jŭm păng;

²⁹ ƀon Jarmut jêh ri lĕ ndrêch gơ̆ gŭ văr jŭm păng; ƀon Ên-ganim jêh ri lĕ ndrêch gơ̆ gŭ văr jŭm păng. Lĕ rngôch jêng puăn rplay ƀon.

³⁰ Bu sŏk đŏng lĕ ƀon bơh ndŭl mpôl Aser, nây jêng Misal jêh ri lĕ ndrêch gơ̆ gŭ văr jŭm păng; Apdôn jêh ri lĕ ndrêch gơ̆ gŭ văr jŭm păng;

³¹ ƀon Hêlkat jêh ri lĕ ndrêch gơ̆ gŭ văr jŭm; ƀon Rêhôp jêh ri lĕ ndrêch gơ̆ gŭ văr jŭm. Lĕ rngôch jêng puăn rplay ƀon.

³² Bu sŏk đŏng lĕ ƀon bơh ndŭl mpôl Naptali, nây jêng ƀon Kêdês tâm bri Galilê, jêng ƀon du krap prăp ma nơm lăn lêh ti nkhĭt bunuyh jêh ri lĕ ndrêch gơ̆ gŭ văr jŭm păng; ƀon Hamôt-Dôrơ jêh ri lĕ ndrêch gơ̆ gŭ văr jŭm păng; ƀon Kartan jêh ri lĕ ndrêch gơ̆ gŭ văr jŭm păng; lĕ rngôch jêng pe rplay ƀon.

³³ Lĕ rngôch ƀon phung Gersôn, tĭng nâm ăp rnăk vâl, jêng jât ma pe rplay ƀon jêh ri lĕ ndrêch gơ̆ gŭ văr jŭm păng.

³⁴ Bu sŏk đŏng lĕ ƀon bơh ndŭl mpôl Sabulôn gay ăn ma lĕ rnăk vâl Mêrari, jêng phung Lêvi hôm e. Nĕ jêng ƀon Jôknêam jêh ri lĕ ndrêch gơ̆ gŭ văr jŭm păng; ƀon Karta jêh ri lĕ ndrêch gơ̆ gŭ văr jŭm păng;

³⁵ ƀon Dimna jêh ri lĕ ndrêch gơ̆ gŭ văr jŭm păng; ƀon Nahalal jêh ri lĕ ndrêch gơ̆ gŭ văr jŭm păng. Lĕ rngôch jêng puăn rplay ƀon.

³⁶ Bu sŏk đŏng bơh ndŭl mpôl Ruben lĕ ƀon, nĕ jêng ƀon Bêser jêh ri lĕ ndrêch gơ̆ gŭ văr jŭm păng; ƀon Jahsa jêh ri lĕ ndrêch gơ̆ gŭ văr jŭm păng;

³⁷ ƀon Kêdêmôt jêh ri lĕ ndrêch gơ̆ gŭ văr jŭm păng; ƀon Mêphat jêh ri lĕ ndrêch gơ̆ gŭ văr jŭm păng. Lĕ rngôch jêng puăn rplay ƀon.

³⁸ Bu sŏk đŏng bơh ndŭl mpôl Gat lĕ ƀon Ramôt tâm bri Gilêat, jêng ƀon du krap prăp ma nơm lăn lêh ti nkhĭt bunuyh, jêh ri lĕ ndrêch gơ̆ gŭ văr jŭm păng; ƀon Mahanaim jêh ri lĕ ndrêch gơ̆ gŭ văr jŭm păng;

³⁹ ƀon Hêsbôn jêh ri lĕ ndrêch gơ̆ gŭ văr jŭm păng; ƀon Jaser jêh ri lĕ ndrêch gơ̆ gŭ văr jŭm păng. Lĕ rngôch jêng puăn rplay ƀon.

⁴⁰ Rgum lĕ rngôch ƀon ăn ma phung rnăk vâl Mêrari, jêng kô̆ hôm ma phung rnăk vâl Lêvi, jêng jât ma bar rplay ƀon.

⁴¹ Rgum lĕ rngôch ƀon phung Lêvi ta nklang drăp ndơn phung ƀon lan Israel geh puăn jât ma pham rplay ƀon jêh ri lĕ ndrêch gơ̆ gŭ văr jŭm păng.

⁴² Ăp rplay ƀon nây geh lĕ ndrêch gơ̆ gŭ văr jŭm păng jêh ri lĕ rngôch ƀon aơ kơt nây da dê.

⁴³ Pônây, Brah Yêhôva ăn ma phung Israel lĕ bri Păng ton jêh ăn ma khân păng pit sŏk jêh ri gŭ tâm bri nây.

⁴⁴ Brah Yêhôva ăn ma khân păng tâm lam ntŭk dơi geh tâm nau mpăn rlêk, di tĭng nâm Păng ton jêh ma phung chô yau khân păng, mâu geh ôh phung rlăng dơi dâk tanăp khân păng. Brah Yêhôva jao jêh lĕ rngôch phung rlăng nây tâm ti khân păng.

⁴⁵ Tâm lĕ nau ton ueh Brah Yêhôva hŏ ăn jêh ma ngih Israel, mâu geh ôh du ntil nau mâu jêng ngăn. Lĕ rngôch tât di ngăn da dê jêh.