Yôsuê 20 - Nau Brah Ndu Ngơi 2023

Prao ƀon du krap

¹ Brah Yêhôva lah ma Y-Yôsuê:

² Lah hom ma phung ƀon lan Israel săch hom ƀon du krap tĭng nâm Gâp ăn Y-Môis ngơi jêh ma khân may

³ gay ma nơm mâu mĭn ŭch nkhĭt bunuyh ƀiălah lăn lêh ti dơi du krap ta ntŭk nây. Lĕ ƀon nây mra jêng ntŭk du krap đah nơm har plơng mham.

⁴ Nơm lăn lêh ti nkhĭt bunuyh mra nchuăt du tâm lĕ ƀon nây, gŭ nsrâng ta ntŭk mpông ƀon nây, jêh ri rblang nau păng ma phung kôranh bu ranh ƀon nây gĭt. Phung kôranh bu ranh mra rom nơm nây lăp tâm ƀon, ntĭm ăn ma păng du ntŭk gŭ jêh ri păng mra dơi gŭ ndrel ma khân păng.

⁵ Tơlah nơm har plơng mham tĭng, phung kôranh bu ranh mâu mra jao nơm lăn lêh tih nkhĭt bunuyh tâm ti păng ôh, yorlah nau păng nkhĭt nơm chiau meng păng lăn lêh ti dơm, mâu prot lĕ geh nau ji nuih ma păng bơh saơm.

⁶ Ăn păng gŭ tâm ƀon nây kŏ tât nôk păng hăn panăp phung tâm rƀŭn phat dôih, jêh ri kŏ tât kôranh ƀư brah toyh lơn djôt kan rô̆ nây lĕ khĭt jêh. Rnôk nây, nơm mâu mĭn ŭch nkhĭt bunuyh mra dơi plơ̆ sĭt ma ƀon jêh ri ngih păng nơm, yor tă bơh ƀon nây yơh păng du.”

⁷ Pônây, phung ƀon lan Israel prăp êng ƀon Kêdês tâm bri Galilê, bri klơ dor Naptali, ƀon Sichem tâm bri klơ dor Êphraim jêh ri ƀon Kiriat-Arba, jêng Hêbron, tâm bri klơ dor yôk Yuđa.

⁸ N'gor đah ri dak krong Yurdan, mpeh luh nar ƀon Yêrikô, khân păng ntĭm ƀon Bêser tâm bri rdah, tâm neh lâng klơ dor tâm ndŭl mpôl Ruben, ƀon Ramôt tâm bri Gilêat, tâm ndŭl mpôl Gat jêh ri ƀon Gôlan tâm bri Basan, tâm ndŭl mpôl Manasê.

⁹ Nây jêng lĕ ƀon prăp ma lĕ rngôch phung ƀon lan Israel, jêh ri ma phung bu năch njưh ƀât lât ta nklang khân păng, gay ma mbu nơm lăn lêh ti khĭt bunuyh ăn du krap ta nây, gay ma păng mâu mra khĭt ôh đah ti nơm har plơng mham êlor nkra phat dôih tanăp phung tâm rƀŭn.