Yôsuê 2 - Nau Brah Ndu Ngơi 2023

Y-Yôsuê njuăl bunuyh đă hăn n'hut uănh Yêrikô

¹ Tă bơh Sitim, Y-Yôsuê, kon bu klâu Y-Nun, đă bar hê bunuyh hăn n'hut uănh ma nau ndâp. Păng lah: “Hăn n'hut uănh hom bri rngleh êng, jêng ƀon Yêrikô.” Pônây bar hê khân păng hăn tât ta ngih du huê bu ur văng tĭr amoh H'Rahap, jêh ri khân păng njưh ta nây.

² Bu mbơh ma hađăch Yêrikô pô aơ: “Hơi hađăch, măng aơ geh phung bunuyh Israel tât jêh gay hăn n'hut uănh n'gor.”

³ Hađăch Yêrikô đă bunuyh hăn lah ma H'Rahap: “Djôt leo hom phung bu klâu hŏ lăp jêh tâm ngih ay văch ta aơ, yorlah khân păng văch gay n'hut uănh lam n'gor aơ.”

⁴ Ƀiălah bu ur nây leo pôn jêh bar hê khân păng, jêh ri lah: “Ngăn khân păng hŏ tât ta ngih gâp, ƀiălah gâp mâu gĭt ôh mbah tă khân păng văch.

⁵ Nôk kêng măng, tơlah bu dăch nchăng mpông ƀon, phung bu klâu nây lĕ du luh, gâp mâu gĭt ôh mbah ntŭk khân păng hăn. Pônây, tĭng hom khân păng gơnh, khân may mra tĭng ban ro khân păng.”

⁶ Ngăn ya, bu ur nây leo jêh khân păng hao klơ chor ngih, pôn khân păng tâm dâng mbŭch tơm mhay păng lăk klơ chor ngih.

⁷ Hađăch đă phung tahan tĭng khân păng mpeh ma dak krong Yurdan tât ta ntŭk sơh. Tơlah phung tĭng luh hăn jêh, bu nchăng ro mpông ƀon.

⁸ Êlor ma bar hê bunuyh n'hut uănh hăn bê̆ch, H'Rahap hao ta klơ chor ngih,

⁹ jêh ri lah ma khân păng: “Gâp gĭt Brah Yêhôva hŏ ăn n'gor aơ ma khân may; bu klach ngăn yorlah khân may hŏ trŭnh ndal ta hên kŏ tât lĕ rngôch phung ƀon lan tâm n'gor rdja nuih n'hâm nau mĭn tanăp khân may.

¹⁰ Yorlah hên tăng jêh nôk khân may du luh bơh n'gor bri Êjipt, Brah Yêhôva hŏ ƀư jêh Dak Mƀŭt Chăng suăt lơi ta tra năp khân may, jêh ri hên tăng đŏng nau khân may hŏ ƀư jêh ma Y-Sihôn jêh ri Y-Ôk, bar hê hađăch phung Amôrit, gŭ ta đah ri dak krong Yurdan, khân may ƀư rai lĕ.

¹¹ Tơlah hên tăng jêh nau nây nuih n'hâm hên uh ah, tâm phung hên mâu hôm geh nơm nâp tanăp khân may; yorlah Yêhôva Brah Ndu khân may jêng Brah Ndu nơm gŭ klơ trôk dŭt prêh jêh ri gŭ tâm dâng neh aơ.

¹² Pônây aƀaơ, tâm amoh Brah Yêhôva ton hom ma gâp yorlah gâp ƀư ueh ma bar hê khân may, ăn bar hê khân may tâm ban đŏng ƀư ueh ma ngih mbơ̆ gâp jêh ri ăn ma gâp du nau mbên nanê̆

¹³ pô aơ khân may mra om ma mê̆ mbơ̆ gâp, oh nâu, oh nur gâp jêh ri lĕ rngôch phung ndrel ma khân păng dơi rêh, jêh ri tâm rklaih hên bơh nau khĭt.”

¹⁴ Bar hê bu klâu nây plơ̆ lah: “Nau rêh hên mra ntrok ma nau rêh ay! Tơlah ay mâu mbơh ma bu kan hên, hên mra sŏk nau răp jăp jêh ri nuih n'hâm ueh ƀư ma ay nôk Brah Yêhôva ăn neh aơ ma hên.”

¹⁵ Pôri bu ur nây sŏk du njăr rse brăt njŭr bar hê khân păng trŭnh ta bơh mpông bloh, yorlah ngih păng êp pĭt mpêr ƀon jêh ri păng gŭ tâm trôm mpêr ƀon.

¹⁶ Păng lah ma bar hê khân păng: “Hăn hom mpeh yôk, lơi ăn bu tĭng ban khân may. Gŭ krap hom ta nây pe nar kŏ tât nôk phung tĭng khân may lĕ plơ̆ sĭt jêh, jêh nau nây khân may hăn tĭng trong khân may nơm.”

¹⁷ Bar hê khân păng lah ma păng: “Aơ jêng nau hên djôt prăp nau ton, ay hŏ đă hên ton:

¹⁸ Tơlah hên lăp jêh tâm bri aơ, ăn ay kât rse sut chăng aơ ta mpông bloh ntŭk ay hŏ njŭr hên trŭnh, jêh nây ay rgum mê̆ mbơ̆, phung oh nâu, jêh ri lĕ rngôch phung tâm ngih mbơ̆ ay gŭ tâm ngih ay.

¹⁹ Tơlah du huê bunuyh hăn luh tă bơh mpông ngih ay, mham bunuyh nây mra nkhŭt ta klơ păng nơm, bi hên mâu geh nau tih ôh. Ƀiălah mbu nơm lăp ƀư mhĭk ma du huê nơm gŭ ndrel ma ay tâm trôm ngih, mham nơm nây mra nkhŭt ta klơ bôk hên.

²⁰ Bi tơlah ay mbơh ma bu nau kan hên, pônây hên mâu mra khan ôh nau hên ton đah ay.”

²¹ Păng plơ̆ lah: “Ƀư di nâm nau khân may hŏ lah.” Jêh nây păng đă ma khân păng hăn, jêh ri khân păng luh hăn. Păng kât rse sut chăng ta mpông bloh.

²² Pônây, bar hê khân păng hăn tât mpeh ma yôk, gŭ ta nây pe nar kŏ tât nôk phung tĭng ƀoi khân păng plơ̆ sĭt. Phung nây hăn joi lam lĕ rngôch trong ƀiălah mâu dơi saơ khân păng.

²³ Bar hê n'hut uănh nây hăn trŭnh tă bơh yôk plơ̆ sĭt, rgăn dak krong Yurdan jêh ri tât ma Y-Yôsuê, kon bu klâu Y-Nun, jêh ri nkoch bri ma păng lĕ nau tât jêh ma khân păng.

²⁴ Khân păng lah ma Y-Yôsuê: “Nanê̆ ngăn, Brah Yêhôva jao jêh lĕ n'gor nây tâm ti he; lĕ rngôch phung gŭ tâm n'gor nây rdja nuih n'hâm da dê tanăp măt phung he.”