Yôsuê 19 - Nau Brah Ndu Ngơi 2023

N'gor neh ndŭl mpôl Simêôn

¹ Ndŭl mpôl phung Simêôn nchroh n'hôr dơi geh kô̆ neh tal bar tĭng nâm ăp rnăk vâl khân păng. Drăp ndơn ndŭl mpôl nây gŭ ta nklang drăp ndơn phung kon sau Y-Yuđa.

² Drăp ndơn ndŭl mpôl Simêôn geh: Bêr-Sêba, Sêba, Môlada,

³ Hasar-Sual, Bala, Êsem,

⁴ Êltôlat, Bêthul, Hôrma,

⁵ Siklak, Bet-Markabôt, Hasar-Susa,

⁶ Bet-Lêbaôt, jêh ri Saruhen: lĕ rngôch jêng jât mpe rplay ƀon toyh ndrel ma ƀon jê̆ khân păng.

⁷ Ain, Rimôn, Êther, jêh ri Asan. Lĕ rngôch jêng puăn rplay ƀon ndrel ma lĕ ƀon jê̆ khân păng,

⁸ geh lĕ rngôch ƀon jê̆ văr jŭm lĕ ƀon aơ tât ta Balat-Bêr, jêng ƀon Rama ta bri Nêgep. Nây yơh jêng drăp ndơn ndŭl mpôl Simêôn tĭng nâm ăp rnăk vâl khân păng.

⁹ “Drăp ndơn phung kon sau Y-Simêôn dơn sŏk bơh kô̆ neh phung Yuđa, yorlah kô̆ neh phung kon sau Y-Yuđa jêng toyh huy ngăn. Pônây, phung kon sau Y-Simêôn dơn sŏk drăp ndơn ta nklang kô̆ neh phung kon sau Y-Yuđa.

N'gor neh ndŭl mpôl Sabulôn

¹⁰ Phung kon sau Y-Sabulôn nchroh n'hôr dơi geh kô̆ neh tal pe tĭng nâm ăp rnăk vâl khân păng. N'har bri khân păng hăn tât ta Sarit.

¹¹ N'har nây hăn hao rlet nhâp nar mpeh ma Marêal, tât ma Dabêset, jêh nây tât ma dak n'hor tham Jôknêam.

¹² Ntơm bơh Sarit, n'har bri ndăch mpeh luh nar, jêng mpeh luh nar, tât ma n'har Kislôt-Tabor, jêh nây hăn tât ta Dabêrat, jêh ri hao tât ma Japhia.

¹³ Ntơm bơh nây, păng hăn tât ma mpeh luh nar, jêng mpeh luh nar tât ta Gat-Hêpher jêh ri tât ta Êt-Kasin, hăn ndăch jŭm Nêa jêh nây tât ta Rimôn.

¹⁴ Jêh nây, n'har hăn ndăch hao mpeh pa lơ mpeh Hanathôn, jêh ri lôch ta rlŭng Iptahel.

¹⁵ Păng glom lĕ ƀon Katat, Nahalal, Simrôn, Idala, jêh ri Ƀêtlêhem. Lĕ rngôch jêng jât ma bar rplay ƀon toyh ndrel ma lĕ ƀon jê̆ khân păng.

¹⁶ Lĕ ƀon nây nđâp ma lĕ ƀon jê̆ khân păng jêng drăp ndơn ma phung Sabulôn tĭng nâm ăp rnăk vâl khân păng.

N'gor neh ndŭl mpôl Isakar

¹⁷ Phung kon sau Y-Isakar nchroh n'hôr dơi geh kô̆ neh tal puăn tĭng nâm ăp rnăk vâl khân păng.

¹⁸ N'har bri khân păng hăn tât ta Jesrêel, Chêsulôt, Sunem,

¹⁹ Hapharaim, Siôn, Anaharat,

²⁰ Rabit, ƀon Kisiôn, Êbet,

²¹ Rêmet, Ên-ganim, Ên-Hada, Bet-Pasêt.

²² N'har bri aơ mâp ma Tabor, Sahasuma, jêh ri Bet-Sêmes, jêh nây n'har lôch ta dak krong Yurdan. Lĕ rngôch jêng jât ma prao rplay ƀon ndrel ma lĕ ƀon jê̆ khân păng.

²³ Lĕ ƀon nây ndrel ma lĕ ƀon jê̆ khân păng jêng drăp ndơn phung kon sau Y-Isakar tĭng nâm ăp rnăk vâl khân păng.

N'gor neh ndŭl mpôl Aser

²⁴ Phung kon sau Y-Aser nchroh n'hôr dơi geh kô̆ neh tal prăm tĭng nâm ăp rnăk vâl khân păng.

²⁵ N'har bri nây geh: Hêlkat, Hali, Bêten, Aksap,

²⁶ Alamêlek, Amat, jêh ri Misal. Mpeh nhâp nar tâm mâp đah Karmel jêh ri n'hor dak Sihôr-Lipnat,

²⁷ jêh nây ndăch jŭm mpeh luh nar, hăn tât ta Bet-Dagôn, jêh ri mâp Sabulôn jêh ri rlŭng Iptahel, ta mpeh pa lơ Bet-Êmek jêh ri Niêl, jêh nây hăn rgăn Kabul mpeh pa chiau,

²⁸ tât ta Êbron, Rêhôp, Hamôn, Kana tât ta ƀon toyh Sidôn.

²⁹ N'har nây rle mpeh Rama tât ta ƀon Tyre geh mpêr nâp ngăn, jêh nây hăn tât ta Hôsa jêh ri lôch ta dak mƀŭt, dăch Mahala, tâm bri Aksip,

³⁰ Uma, Aphek, jêh ri Rêhôp. Lĕ rngôch jêng bar jât ma bar ƀon ndrel ma lĕ ƀon jê̆ khân păng.

³¹ Lĕ ƀon nây ndrel ma lĕ ƀon jê̆ khân păng jêng drăp ndơn phung kon sau bơh ndŭl mpôl Aser tĭng nâm ăp rnăk vâl khân păng.

N'gor neh ndŭl mpôl Naptali

³² Phung kon sau Naptali nchroh n'hôr dơi geh kô̆ neh tal prao tĭng nâm ăp rnăk vâl khân păng.

³³ N'har păng ntơm bơh Hêlep, bơh tơm guyh ta Sananim, rlet ma mpeh Adami Nêkep jêh ri Japnêel, tât ta Lakum jêh ri lôch ta dak krong Yurdan.

³⁴ Jêh nây, n'har aơ tâm êp ndăch mpeh nhâp nar tât ma ƀon Asnôt-Tabor jêh ri bơh nây hăn tât ma Hukôk. Mpeh pa dâng ta nkual neh Sabulôn, mpeh nhâp nar ta nkual neh Aser jêh ri đah phung Yuđa, mpeh luh nar ta dak krong Yurdan.

³⁵ Ƀon toyh geh mpêr nâp jêng ƀon: Sidim, Sêr, Hamat, Rakat, Chinêrôt,

³⁶ Adama, Rama, Hasôr,

³⁷ Kêdês, Êdrei, Ên-Hasôr,

³⁸ Yiron, Mikdal-El, Hôrem, Bet-Anat, jêh ri Bet-Sêmes. Lĕ rngôch jêng jât ma sĭn rplay ƀon toyh ndrel ma ƀon jê̆ khân păng.

³⁹ Lĕ ƀon toyh ndrel ma ƀon jê̆ khân păng jêng drăp ndơn ma ndŭl mpôl phung Naptali tĭng nâm ndŭl mpôl khân păng.

N'gor neh ndŭl mpôl Dan

⁴⁰ Phung kon sau Dan nchroh n'hôr dơi geh kô̆ neh tal pơh tĭng nâm ăp rnăk vâl khân păng.

⁴¹ N'har bri khân păng geh Sôra, Êstaôl, Ir-Sêmes,

⁴² Salabin, Aijalon, Itla,

⁴³ Êlon, Timna, Êkron,

⁴⁴ Êltêkê, Gibêthôn, Balat,

⁴⁵ Jêhut, Bênê-Bêrak, Gat-Rimôn,

⁴⁶ Mê-Jarkôn, jêh ri Rakôn, ndrel ma kô̆ neh tâm tham Jôpa.

⁴⁷ Tơlah bu văch rvan n'gor neh phung Dan, phung Dan hao tâm lơh đah Lêsem, sŏk đao ƀư rai ƀon nây, pit sŏk păng jêng drăp ndơn jêh ri gŭ ta nây, jêh nây rnha ƀon Lêsem nây jêng Dan tĭng nâm amoh chô yau khân păng.

⁴⁸ Lĕ ƀon nây ndrel ma lĕ ƀon jê̆ khân păng jêng drăp ndơn ndŭl mpôl Dan, tĭng nâm ăp rnăk vâl khân păng.

Drăp ndơn Y-Yôsuê

⁴⁹ Tơlah khân păng tâm pă ăp n'gor neh hŏ lôch jêh, phung ƀon lan Israel sŏk du kô̆ drăp ndơn ta nklang khân păng ăn ma Y-Yôsuê, kon bu klâu Y-Nun.

⁵⁰ Phung ƀon lan Israel djôt prăp nau Brah Yêhôva ntăm ăn ma Y-Yôsuê ƀon păng dăn, nây jêng ƀon Timnat-Sêra tâm dor Êphraim. Păng ndâk ƀon nây jêh ri gŭ ta nây.

⁵¹ Nĕ jêng lĕ drăp ndơn kôranh ƀư brah Y-Êlêasar, Y-Yôsuê, kon bu klâu Y-Nun, jêh ri phung kôranh ndŭl mpôl lĕ ndŭl mpôl Israel nchroh n'hôr tâm pă ta ƀon Silô, ta Ngih Bok Nau Tâm Rƀŭn Brah Yêhôva. Pônây, khân păng tâm pă bri lôch jêh.