Yôsuê 18 - Nau Brah Ndu Ngơi 2023

N'gor neh ma ndŭl mpôl nglĕ dŭt

¹ Lĕ rngôch phung Israel tâm rƀŭn rgum ta ƀon Silô jêh ri ndâk Ngih Bok Nau Tâm Rƀŭn ta nây. Lĕ n'gor bri gŭ tâm dâng nau dơi chiă uănh khân păng.

² Ƀiălah tâm phung ƀon lan Israel hôm e pơh ndŭl mpôl ê hŏ tâm pă ôh drăp ndơn.

³ Y-Yôsuê lah ma phung ƀon lan Israel: “Ndah nâm jŏ khân may lăp lơh pit sŏk bri Brah Yêhôva, Brah Ndu phung chô yau khân may, ăn jêh ma khân may?

⁴ Săch hom tâm ăp ndŭl mpôl pe nuyh jêh ri gâp mra đă khân păng hăn. Khân păng mra dâk hăn lam bri, nchih rup neh tĭng nâm ăp kô̆ drăp ndơn, jêh nây plơ̆ sĭt ma gâp.

⁵ Khân păng mra tâm pă bri tâm pơh kô̆. Phung Yuđa mra mât prăp ta n'gor neh khân păng ta mpeh pa dâng, ngih Y-Yôsep mra mât prăp ta n'gor neh khân păng ta nkual mpeh pa lơ.

⁶ Pônây, khân may nchih hom rup neh tâm pơh kô̆ neh jêh ri djôt leo rup nây sĭt ma gâp ta aơ jêh ri gâp mra nchroh n'hôr ma khân may ta aơ tanăp Yêhôva Brah Ndu he.

⁷ Ƀiălah bu mâu pă ôh neh ma phung Lêvi ndrel ma khân may, yorlah nau kan kôranh ƀư brah ma Brah Yêhôva jêng kô̆ drăp ndơn ma khân păng. Bi phung Gat, phung Ruben jêh ri du n'gul ndŭl mpôl Manasê hŏ dơn sŏk jêh kô̆ drăp ndơn bơh Y-Môis, oh mon Brah Yêhôva, ăn jêh ma khân păng ta kơh đah ri dak krong Yurdan mpeh luh nar.”

⁸ Pônây phung bu nây dâk hăn. Y-Yôsuê ntăm ma khân păng nchih rup neh, jêh lah: “Hăn hom lam n'gor jêh ri nchih rup neh, jêh nây plơ̆ sĭt ma gâp jêh ri ta aơ gâp mra nchroh n'hôr ma khân may tanăp Brah Yêhôva ta Silô.”

⁹ Khân păng hăn lam tâm bri nây, nchih rup neh tâm du ndrom samƀŭt tâm pă tâm pơh kô̆, tĭng nâm ăp ƀon jê̆, jêh nây khân păng plơ̆ sĭt ma Y-Yôsuê ta pôih tahan tâm ƀon Silô.

¹⁰ Y-Yôsuê nchroh n'hôr ma khân păng tâm ƀon Silô tanăp Brah Yêhôva jêh ri ta aơ Y-Yôsuê tâm pă bri ma phung ƀon lan Israel tĭng nâm lĕ ndŭl mpôl khân păng.

N'gor neh ndŭl mpôl Benjamin

¹¹ Ndŭl mpôl bơh phung kon sau Y-Benjamin nchroh n'hôr tĭng nâm ăp rnăk vâl khân păng jêh ri n'gor neh khân păng nchroh n'hôr di vah vang ndŭl mpôl phung Yuđa jêh ri ndŭl mpôl phung Yôsep.

¹² N'har bri phung Benjamin mpeh pa lơ ntơm bơh dak krong Yurdan, hăn hao mpeh pakơi Yêrikô, mpeh pa lơ, hăn rgăn nkual klơ dor yôk mpeh nhâp nar, jêh ri dŭt lôch ta bri rdah Bet-Aven.

¹³ Tă bơh nây, n'har hăn sŏng tât ma mpeh pa dâng Lus, geh đŏng rnha jêng Bêthel, jêh nây hăn trŭnh ma Atarôt-Adar ta klơ gôl yôk mpeh pa dâng rđŭng Bet-Hôron.

¹⁴ N'har hăn ndăch ntơm bơh mpeh nhâp nar rgăn mpeh pa dâng, jêng ntơm bơh yôk tâm tham Bet-Hôron mpeh pa dâng jêh ri dŭt lôch ta Kiriat-Baal, jêng Kiriat-Jêarim, ƀon phung Yuđa. Nây yơh jêng n'har mpeh nhâp nar.

¹⁵ N'har mpeh pa dâng ntơm bơh ƀon Kiriat-Jêarim mpeh nhâp nar, hăn tât ta dak n'hor Nêptôa,

¹⁶ jêh nây hăn trŭnh ta jâng yôk tâm tham rlŭng Ben-Hinôm, mpeh pa lơ rlŭng Rêphaim. Păng hăn trŭnh rlŭng Hinôm ta pakơi ƀon phung Jêbusit, mpeh rđŭng, jêh nây trŭnh tât ta Ên-Rôgel.

¹⁷ Jêh nây, n'har ndăch jŭm mpeh pa lơ tât ta Ên-Sêmes; ntơm bơh nây hăn sŏng tât ta Gêlilôt, tâm tham sop Adumim, păng hăn jŭr ta lŭ Y-Bôhan (Y-Bôhan jêng kon bu klâu Y-Ruben)

¹⁸ jêh nây hăn rgăn gôl yôk mpeh pa lơ Arabah jêh ri hăn trŭnh ta Arabah.

¹⁹ N'har nây hăn rgăn Bet-Hôgla mpeh pa lơ, jêh nây lôch ta ntŭk mbŏng mpeh pa lơ Dak Mƀŭt Khĭt, ta mpeh bôl rđŭng dak krong Yurdan. Nĕ jêng n'har mpeh rđŭng.

²⁰ Mpeh luh nar jêng pĭt n'har đah dak krong Yurdan. Nây yơh jêng drăp ndơn phung kon sau Y-Benjamin jêh ri n'har ndăch jŭm puăn njônh, tĭng nâm ăp rnăk vâl khân păng.

²¹ Lĕ rngôch ƀon ndŭl mpôl phung Benjamin, tĭng nâm ăp rnăk vâl khân păng jêng: Yêrikô, Bet-Hôgla, Êmek-Kêsis,

²² Bet-Araba, Sêmaraim, Bêthel,

²³ Avim, Para, Ôphra,

²⁴ Chêpar-Ammôni, Ôpni, jêh ri Gêba: lĕ rngôch jêng jât ma bar ƀon jêh ri ma lĕ ƀon jê̆ khân păng.

²⁵ Gibêôn, Rama, Bêrôt,

²⁶ Mispê, Chêphira, Môsa,

²⁷ Rêkem, Gêrpêel, Tarala,

²⁸ Sêla Hêlep, Jêbus, jêng Yêrusalem, Gibêa, Kiriat. Lĕ rngôch jêng jât ma puăn ƀon ndrel ma lĕ ƀon jê̆ khân păng. Nây yơh jêng drăp ndơn ma phung kon sau Y-Benjamin tĭng nâm ăp rnăk vâl khân păng.