Yôsuê 17 - Nau Brah Ndu Ngơi 2023

N'gor neh du n'gul ndŭl mpôl Manasê mpeh nhâp nar

¹ Ndŭl mpôl Manasê nchroh n'hôr tâm pă bri yorlah păng jêng kon bôk rah Y-Yôsep. Kon bôk rah Y-Manasê jêng Y-Makir, mbơ̆ Y-Gilêat, jêng du huê tahan, pôri bu ăn bri Gilêat jêh ri bri Basan ma păng.

² Lĕ phung kon Manasê ƀaƀă nchroh n'hôr đŏng gay tâm pă bri tĭng nâm ăp rnăk vâl khân păng: Y-Abiêser, Y-Hêlek, Y-Asriêl, Y-Sichem, Y-Hêpher, jêh ri Sêmida. Nĕ jêng phung kon bu klâu Y-Manasê, sau Y-Yôsep, tĭng nâm ăp rnăk vâl khân păng.

³ Y-Sêlôpêhat, kon bu klâu Y-Hêpher, sau Y-Gilêat, se Y-Makir, săn Y-Manasê, păng mâu hôm geh kon bu klâu ôh, ƀiălah phung kon bu ur dơm; knŏng geh phung kon bu ur păng: H'Mahla, H'Nôa, H'Hôgla, H'Milka jêh ri H'Tirsa.

⁴ Khân păng hăn panăp kôranh ƀư brah Y-Êlêasar, panăp Y-Yôsuê, kon bu klâu Y-Nun, jêh ri kôranh chiă uănh jêh ri lah pô aơ: “Brah Yêhôva ntăm jêh ma Y-Môis ăn ma hên du kô̆ drăp ndơn nđâp ma phung oh nâu hên.” Pônây, Y-Yôsuê tông bâr Brah Yêhôva ntăm ăn ma khân păng du kô̆ drăp ndơn tâm ban ma phung oh nâu mbơ̆ khân păng.

⁵ Pônây Manasê nchroh n'hôr dơi jât kô̆, mâu kơp ma bri Gilêat jêh ri bri Basan ta kơh đah ri dak krong Yurdan,

⁶ yorlah phung kon bu ur Manasê geh du kô̆ drăp ndơn ndrel ma phung kon bu klâu păng, bi bri Gilêat dơi pă ma phung kon bu klâu Manasê ƀaƀă.

⁷ N'har bri Manasê ntơm bơh Aser tât ma Mikmêtat panăp Sichem, jêh nây hăn tât ma mpeh pa dâng tât ntŭk gŭ phung Ên-Tapuach.

⁸ Neh Tapua jêng ndơ Manasê, ƀiălah ƀon Tapua dăch n'har Manasê jêng ndơ phung kon sau Y-Êphraim.

⁹ Ntơm bơh nây, n'har hăn trŭnh tât ta dak n'hor Kana; tâm lĕ rngôch ƀon Manasê ta mpeh pa dâng dak n'hor nây, geh đŏng ƀon jêng ndơ Êphraim. N'har Manasê hăn tât ta mpeh pa lơ dak n'hor jêh ri dŭt lôch ta dak mƀŭt.

¹⁰ Kô̆ neh ta mpeh pa dâng jêng ndơ Êphraim, kô̆ neh ta mpeh pa lơ jêng ndơ phung Manasê, sŏk dak mƀŭt jêng n'har. Mpeh pa lơ dor êp Aser, mpeh luh nar êp Isakar.

¹¹ Tâm n'gor neh Isakar jêh ri phung Aser, Manasê hôm geh ƀon Bet-Sêan nđâp ma lĕ ƀon jê̆ păng jêh ri ƀon Iblêam nđâp ma ƀon jê̆ păng, n'ho ma lĕ phung bunuyh gŭ tâm ƀon Dôrơ nđâp ma lĕ ƀon jê̆ păng, phung bunuyh gŭ tâm ƀon Ên-Dôr nđâp ma lĕ ƀon jê̆ păng, phung bunuyh gŭ tâm ƀon Tanak nđâp ma lĕ ƀon jê̆ păng, phung bunuyh gŭ tâm ƀon Mêgidô nđâp ma lĕ ƀon jê̆ păng, jêh ri ƀon tal pe jêng Naphat.

¹² Ƀiălah, phung kon sau Y-Manasê mâu dơi pit sŏk ôh lĕ rngôch ƀon nây, yor ri phung Kanaan ăt gŭ tâm bri nây.

¹³ Ƀiălah phung ƀon lan Israel jêng dăng ktang jêh, khân păng phak phung Kanaan pah kan jêh ri mâu mprơh khân păng ôh.

Kon sau Y-Yôsep dun

¹⁴ Phung kon sau Y-Yôsep ngơi ma Y-Yôsuê: “Hên hŏ jêng jêh du phung ƀon lan lĕ bĭk rơ̆, yorlah Brah Yêhôva ăn nau ueh uĭn ma hên kŏ nar aơ. Pônây nâm ƀư may ăn ma hên knŏng geh du kô̆ neh jêng drăp ndơn hên dơm?”

¹⁵ Y-Yôsuê plơ̆ lah: “Tơlah khân may jêng du phung ƀon lan âk ngăn jêh ri bri klơ dor Êphraim lĕ rhăt ir, khân may hăn hao hom tât ta bri krŏng muyh jêh ri njêng ma khân may du ntŭk tâm n'gor phung Pêrisit jêh ri phung Rêphaim.”

¹⁶ Ƀiălah phung kon sau Y-Yôsep plơ̆ lah: “Bri klơ dor yôk mâu tŏng ntŭk ăn ma hên ôh, bi tâm neh lâng, lĕ rngôch phung Kanaan gŭ jêh ta nây, khân păng geh ndeh seh loih, phung Bet-Sêan nđâp lĕ ƀon jê̆ khân păng jêh ri phung gŭ tâm rlŭng Jesrêel, kơt nây đŏng.”

¹⁷ Y-Yôsuê lah ma ngih Y-Yôsep, jêng phung Êphraim jêh ri phung Manasê, pô aơ: “Khân may jêng du phung ƀon lan âk, geh nau dăng ktang. Khân may mâu mra geh knŏng du kô̆ nây dơm ôh,

¹⁸ ƀiălah bri klơ dor yôk mra jêng ndơ ma khân may, nđâp lah bri krŏng, khân may mra muyh păng, jêh ri n'har păng mra jêng ndơ ma khân may; yorlah khân may dơi mprơh phung Kanaan, nđâp lah khân păng geh ndeh seh loih jêh ri dăng ktang.”