Yôsuê 16 - Nau Brah Ndu Ngơi 2023

N'gor neh ndŭl mpôl Êphraim

¹ Kô̆ neh phung kon sau Y-Yôsep hŏ nchroh n'hôr jêh ntơm bơh dak krong Yurdan dăch Yêrikô, mpeh luh nar lĕ n'hor dak Yêrikô, hăn rgăn tâm bri rdah, jêh ri bơh Yêrikô hao tât ma bri klơ dor yôk Bêthel.

² N'har hăn bơh Bêthel tât ma Lus, hăn rgăn n'gor neh phung Arkit ta Atarôt,

³ hăn trŭnh mpeh nhâp nar tât ma n'gor neh Japhlêtit, tât ma n'gor neh Bet-Hôron Pa Dâng jêh ri Gêser jêh nây dŭt lôch ta dak mƀŭt.

⁴ Nĕ jêng kô̆ drăp ndơn phung kon sau Y-Yôsep jêng phung Manasê jêh ri phung Êphraim hŏ dơn jêh.

⁵ N'gor neh phung Êphraim tĭng nâm ăp rnăk vâl khân păng kơt aơ: n'har drăp ndơn khân păng mpeh luh nar, ntơm bơh Atarôt-Adar tât ma Bet-Hôron Pa Lơ,

⁶ jêh ri bơh nĕ hăn sŏng tât ta dak mƀŭt; mpeh pa lơ jêng Mikmêtat; mpeh luh nar, trong n'har bri ndăch jŭm mpeh Tanat-Silô, jêh ri hăn tât ma mpeh luh nar tât ma Janôa,

⁷ jêh nây bơh Janôa, păng hăn trŭnh tât ma Atarôt jêh ri Naara, tât ma Yêrikô, jêh ri dŭt lôch ta dak krong Yurdan.

⁸ Tă bơh Tapua n'har bri aơ hăn tât ma mpeh nhâp nar tât ta dak n'hor Kana, jêh ri dŭt lôch ta dak mƀŭt. Nĕ jêng drăp ndơn ndŭl mpôl phung Êphraim, tĭng nâm ăp rnăk vâl khân păng.

⁹ Padih ƀon toyh jêh ri ƀon jê̆ nây, phung Êphraim geh đŏng ƀon prăp êng ma khân păng tâm drăp ndơn phung Manasê.

¹⁰ Ƀiălah, khân păng mâu mprơh ôh phung Kanaan gŭ tâm ƀon Gêser, pônây phung Kanaan gŭ ta nklang phung Êphraim kŏ tât ta nar aơ, ƀiălah bu phak khân păng pah kan tâm ban ma dĭk.