Yôsuê 15 - Nau Brah Ndu Ngơi 2023

N'gor neh ndŭl mpôl Yuđa

¹ Kô̆ neh prăp ma ndŭl mpôl Yuđa nchroh n'hôr tĭng nâm ăp rnăk vâl khân păng, mpeh pa dâng n'har Êđôm tât ma bri rdah Sin ta bri bôl mpeh rđŭng pa dâng.

² N'har mpeh pa dâng khân păng ntơm bơh Dak Mƀŭt Boh, jêng bơh nkuĭl dak mƀŭt rle mpeh pa dâng;

³ jêh ri ntơm bơh sop Akrabim trŭnh mpeh pa dâng, hăn rgăn bri rdah Sin, hao mpeh pa dâng Kadês Barnê, hăn rgăn Hêsron, hao tât ta mpeh Adar, ndăch rgăn mpeh Karka,

⁴ hăn rgăn mpeh Asmôn, lăp tâm Dak N'hor Êjipt jêh ri hăn tât ta lôch dak mƀŭt. Nây mra jêng n'har mpeh pa dâng khân may.

⁵ N'har mpeh luh nar jêng ntơm bơh Dak Mƀŭt Khĭt tât ta rnhuĭl dak krong Yurdan. N'har mpeh pa lơ ntơm bơh nkuĭl dak mƀŭt ta rnhuĭl dak krong Yurdan,

⁶ hao tât ma Bet-Hôgla, rgăn mpeh pa lơ Bet-Araba, jêh ri hao tât ta lŭ Y-Bôhan, kon bu klâu Y-Ruben.

⁷ N'har nây hao tât ma Dêbir, ntơm bơh rlŭng Akôr hăn tât ma mpeh pa lơ, ndăch mpeh Gilgal, tâm tham sop Adumim mpeh pa dâng tâm rlŭng; jêh nây hăn ƀoi tu dak Ên-Sêmes jêh ri tât Ên-Rôgel.

⁸ Bơh nây, n'har hao dăch rlŭng Ben-Hinôm, tĭng dor yôk mpeh pa dâng Jêbusit, jêng Yêrusalem. Jêh nĕ, n'har hao tât ma n'gơn yôk tâm tham rlŭng Hinôm mpeh nhâp nar, ta bôl mpeh pa lơ rlŭng Rêphaim.

⁹ N'har hăn bơh n'gơn yôk tât ma dak n'hor Nêptôa, jêh ri jong tât ta lĕ ƀon tâm yôk Ephrôn; jêh ri hăn trŭnh tât ma aơ jêng Baala, jêng Kiriat-Jêarim.

¹⁰ N'har hăn ndăch jŭm bơh Baala rgăn mpeh nhâp nar tât ta yôk Sêir, jêh nây ndăch jŭm tĭng dor yôk mpeh pa lơ yôk Jêrim, jêng Chêsalon, jêh ri hăn trŭnh tât ta Bet-Sêmes jêh ri rgăn Timna.

¹¹ N'har nây thoi tât dor yôk mpeh pa lơ Êkron jêh ri ndăch jŭm tât ma Sikêron, hăn rgăn yôk Balah, hăn sŏng tât ma Japnel, jêh ri lôch ta dak mƀŭt.

¹² Bi n'har mpeh nhâp nar jêng kơh Dak Mƀŭt Toyh. Nây jêng n'har văr jŭm phung kon sau Y-Yuđa, tĭng nâm ăp rnăk vâl khân păng.

Y-Kalep dơi pit sŏk Hêbron jêh ri Dêbir

¹³ Tĭng nâm nau vay Brah Yêhôva ntăm, Y-Yôsuê ăn ma Y-Kalep, kon bu klâu Y-Jêphunê, du kô̆ neh ta nklang phung Yuđa, jêng ƀon Kiriat-Arba, mbơ̆ Y-Anak. Nĕ jêng ƀon Hêbron.

¹⁴ Y-Kalep dơi mprơh pe nuyh kon bu klâu Y-Anak, jêng Y-Sêsai, Y-Ahiman, jêh ri Y-Talmai.

¹⁵ Ntơm bơh nây păng hăn hao lơh ma phung ƀon lan gŭ tâm ƀon Dêbir. Dêbir kăl e ri rnha Kiriat-Sêpher.

¹⁶ Y-Kalep lah: “Gâp mra ăn kon druh gâp jêng H'Aksa jêng ur ma mbu nơm dơi lơh jêh ri pit sŏk ƀon Kiriat-Sêpher.”

¹⁷ Y-Ôtniêl, kon bu klâu Y-Kênas jêng nâu Y-Kalep, dơi pit sŏk ƀon nây jêh ri Y-Kalep ăn kon druh păng H'Aksa jêng ur ma păng.

¹⁸ Dôl sĭt gŭ đah Y-Ôtniêl, bu ur nây đă sai păng dăn ma mbơ̆ păng du lôk mir lŏ. Tơlah bu ur jŭr bơh seh bri păng, Y-Kalep lah ma păng. “Moh nau ay ŭch?”

¹⁹ Păng ơh: “Dăn mbơ̆ ăn ma gâp du drăp ndơ, yorlah may ăn jêh gâp gŭ tâm n'gor Nêgep, dăn may ăn đŏng ma gâp lĕ dak n'hor.” Y-Kalep ăn ro ma păng lĕ dak n'hor ta nkual klơ jêh ri ta nkual tâm dâng.

²⁰ Nĕ jêng drăp ndơn ndŭl mpôl Yuđa, tĭng nâm ăp rnăk vâl khân păng.

Amoh săk lĕ rngôch ƀon Yuđa

²¹ Lĕ rngôch ƀon toyh ta bôl pa dâng jêng ndơ phung ƀon lan Yuđa, dăch n'har Êđôm jêng: Kapsêel, Êder, Jagur,

²² Kina, Dimôra, Adeada,

²³ Kêdês, Hasôr, Itnan,

²⁴ Sip, Têlem, Bêalôt,

²⁵ Hasôr-Hadata, Kêriôt-Hêsron, nâm bu ntĭt Hasôr,

²⁶ Amam, Sêma, Môlada,

²⁷ Hasar-Gada, Hêsmon, Bet-Pêlet,

²⁸ Hasar-Sual, Bêr-Sêba, Bisôtia,

²⁹ Balah, Iyim, Êsem.

³⁰ Êltôlat, Chêsin, Hôrma,

³¹ Siklak, Madmana, Sansana,

³² Lêbaôt, Silim, Ain, jêh ri Rimôn: lĕ rngôch ƀon nây geh bar jât ma sĭn ƀon ndrel ma ƀon jê̆ khân păng.

³³ Tâm nkual jâng yôk geh: Êstaôl, Sôra, Asna,

³⁴ Sanôa, Ên-ganim, Tapua, Ênam,

³⁵ Jarmut, Adulam, Sôkô, Asêka,

³⁶ Saraim, Aditaim, Gêdêra, jêh ri Gêdêrôtaim: lĕ rngôch jêng jât ma puăn ƀon ndrel ma ƀon jê̆ khân păng.

³⁷ Geh đŏng Sênan, Hadasa, Mikdal-Gat,

³⁸ Dilin, Mispê, Joktêel,

³⁹ Lakis, Bôskat, Êglon,

⁴⁰ Kabon, Lahmam, Chitlis,

⁴¹ Gêdêrôt, Bet-Dagôn, Naama, jêh ri Makêda: lĕ rngôch jêng jât ma prao ƀon ndrel ma ƀon jê̆ khân păng.

⁴² Lipna, Êther, Asan,

⁴³ Ipta, Asna, Nêsip,

⁴⁴ Keila, Aksip, jêh ri Marêsa: lĕ rngôch jêng sĭn ƀon ndrel ma ƀon jê̆ khân păng.

⁴⁵ Êkron, ndrel ma ƀon toyh jêh ri ƀon jê̆ khân păng;

⁴⁶ ntơm bơh Êkron tât ta dak mƀŭt, lĕ ƀon dăch Asdôt ndrel ma ƀon jê̆ khân păng.

⁴⁷ Asdôt, lĕ ƀon toyh jêh ri ƀon jê̆ păng, Gaxa, lĕ ƀon toyh jêh ri ƀon jê̆ păng, tât ta dak n'hor Êjipt jêh ri ta kơh Dak Mƀŭt Toyh.

⁴⁸ Tâm bri klơ dor yôk geh: Samir, Jatir, Sôkô,

⁴⁹ Dana, Kiriat-Sana, jêng Dêbir,

⁵⁰ Anap, Êstêmô, Amin,

⁵¹ Gôsen, Hôlon, Gilô: lĕ rngôch jêng jât ma nguay ƀon ndrel ma ƀon jê̆ khân păng.

⁵² Arap, Ruma, Êsan,

⁵³ Janum, Bet-Tapua, Aphêka.

⁵⁴ Humta, Kiriat-Arba, jêng Hêbron, jêh ri Siôr: lĕ rngôch jêng sĭn ƀon ndrel ma ƀon jê̆ khân păng.

⁵⁵ Maôn, Karmel, Sip, Juta,

⁵⁶ Jesrêel, Jokdam, Sanôa,

⁵⁷ Kain, Gibêa, jêh ri Timna: lĕ rngôch jêng jât ƀon ndrel ma ƀon jê̆ khân păng.

⁵⁸ Halhul, Bet-Sur, Gêdôr,

⁵⁹ Maarat, Bet-Anôt, jêh ri Êltêkôn: lĕ rngôch jêng prao ƀon ndrel ma ƀon jê̆ khân păng.

⁶⁰ Kiriat-Baal, jêng Kiriat-Jêarim, jêh ri Raba: lĕ rngôch jêng bar ƀon ndrel ma ƀon jê̆ khân păng.

⁶¹ Tâm bri rdah geh Bet-Araba, Midin, Sêkaka,

⁶² Nipsan, ƀon Boh, jêh ri Êngêdi: lĕ rngôch jêng prao ƀon ndrel ma ƀon jê̆ khân păng.

⁶³ Phung Yuđa mâu dơi mprơh ôh phung Jêbusit gŭ tâm Yêrusalem. Pônây phung Jêbusit hôm gŭ ndrel ma phung ƀon lan Yuđa ta Yêrusalem kŏ tât ta nar aơ.