Yôsuê 14 - Nau Brah Ndu Ngơi 2023

Tâm Pă neh mpeh nhâp nar dak krong Yurdan

¹ Aơ jêng drăp ndơn ma phung ƀon lan Israel sŏk dơn tâm bri Kanaan, tĭng nâm kôranh ƀư brah Y-Êlêasar, Y-Yôsuê, kon bu klâu Y-Nun, jêh ri phung kôranh ndŭl mpôl tâm lĕ ndŭl mpôl phung ƀon lan Israel tâm pă jêh ma khân păng.

² Khân păng nchroh n'hôr gay tâm pă drăp ndơn nây ăn ma sĭn ndŭl mpôl jêh ri du n'gul ndŭl mpôl di nâm Brah Yêhôva ntăm jêh ma Y-Môis.

³ Y-Môis ăn jêh drăp ndơn ma bar ndŭl mpôl jêh ri du n'gul ndŭl mpôl gŭ ta đah ri dak krong Yurdan, ƀiălah păng mâu ăn ôh drăp ndơn ma phung Lêvi gŭ vah vang lĕ ndŭl mpôl.

⁴ Phung kon sau Y-Yôsep dơi jêng bar ndŭl mpôl, nây jêng Manasê jêh ri Êphraim. Bu mâu ƀơk ôh neh ma phung Lêvi jêng drăp ndơn, ƀiălah knŏng ăn ƀon ma khân păng gŭ, nđâp ma lĕ ndrêch gơ̆ jŭm ƀon, prăp ma mpô mpa rong khân păng jêh ri nây jêng drăp ndơn khân păng.

⁵ Phung ƀon lan Israel hŏ tâm pă jêh bri di tĭng nâm nau Brah Yêhôva ntăm jêh ma Y-Môis.

N'gor neh Hêbron ăn ma Y-Kalep

⁶ Rnôk nây, phung kon sau Y-Yuđa hăn văch ma Y-Yôsuê ta Gilgal, jêh ri Y-Kalep, kon bu klâu Y-Jêphunê, phung Kênisit, lah ma păng pô aơ: “May gĭt nau Brah Yêhôva ngơi jêh ma Y-Môis, bunuyh Brah Ndu, ta Kadês Barnê tât ma may jêh ri gâp.

⁷ Tơlah Y-Môis, oh mon Brah Yêhôva, gŭ ta Kadês Barnê, păng đă gâp hăn n'hut uănh bri, rnôk nây gâp geh puăn jât năm jêh; jêh ri gâp nkoch mbơh tay ma păng tâm nau ngăn.

⁸ Ƀiălah phung oh nâu gâp hăn hao ndrel ma gâp ƀư rdja nuih n'hâm ma phung ƀon lan, bi gâp răp jăp hăn tĭng jêh Yêhôva Brah Ndu gâp.

⁹ Tâm nar nây, Y-Môis ton săk lah: ‘N'gor neh jâng may jot tât jêh, nanê̆ mra jêng drăp ndơn ma may jêh ri ma phung kon sau may n'ho ro, yorlah may răp jăp tông tĭng Yêhôva Brah Ndu gâp.’

¹⁰ Aơ, tâm puăn jât ma prăm năm aơ, ntơm bơh nar Brah Yêhôva ngơi nau nây ma Y-Môis, nôk phung Israel hôm hăn nsong tâm bri rdah, Brah Yêhôva hŏ prăp jêh nau rêh gâp tât ta aƀaơ aơ, jêh ri nar aơ gâp geh jêh pham jât ma prăm năm.

¹¹ Nar aơ gâp hôm e ngăch dăng tâm ban nâm nar Y-Môis prơh gâp hăn; gâp ăt hôm suan tâm ban nar kăle gay hăn tâm lơh, mâu lah hăn luh lăp.

¹² Pônây, ăn hom ma gâp bri klơ dor yôk aơ tĭng nâm nau Brah Yêhôva ngơi jêh tâm nar nĕ, yorlah tâm rnôk nây may tăng jêh ta aơ geh phung Anakim nđâp ma lĕ ƀon toyh jêh ri nâp ngăn. Dăn Brah Yêhôva gŭ ndrel ma gâp gay gâp mprơh khân păng tĭng nâm Brah Yêhôva lah jêh.”

¹³ Y-Yôsuê ăn nau ueh uĭn jêh ri ăn ma Y-Kalep, kon bu klâu Y-Jêphunê, ƀon Hêbron jêng drăp ndơn păng.

¹⁴ Yor ri, Hêbron dơi jêng drăp ndơn Y-Kalep, kon bu klâu Y-Jêphunê, phung Kênit, kŏ tât ta nar aơ, yorlah păng răp jăp tông tĭng Yêhôva Brah Ndu Israel.

¹⁵ Rnôk kăle Hêbron kuăl jêng Kiriat-Arba; Arba aơ jêng bunuyh juat toyh lơn tâm phung Anakim. Ntơm bơh nĕ jêh ri rlet pakơi, n'gor geh nau đăp mpăn, mâu hôm geh nau tâm lơh.