Yôsuê 13 - Nau Brah Ndu Ngơi 2023

Tâm pă neh ma lĕ ndŭl mpôl ( 13:1 – 24:33 ) Lĕ n'gor bri ê hŏ pit in

¹ Tơlah Y-Yôsuê ranh jêh, gŭ rêh jŏ năm jêh, Brah Yêhôva lah ma păng pô aơ: “May ranh jêh, gŭ rêh jŏ năm jêh, bi ma bri neh gay ma pĭt in hôm âk ngăn.

² Aơ jêng bri hôm e: Lĕ rngôch bri phung Philistin jêh ri lĕ rngôch bri phung Gêsurit

³ ntơm bơh dak krong Sihôr tâm tham đah Êjipt kŏ tât ta n'har neh Êkron mpeh pa lơ, bri nây bu kơp jêng bri phung Kanaan (prăm nuyh hađăch phung Philistin jêng hađăch ƀon Gaxa, ƀon Asdôt, ƀon Askalôn, ƀon Gat, jêh ri ƀon Êkron). N'gor neh phung Avim

⁴ ntơm bơh pa dâng, lĕ n'gor Kanaan jêh ri n'gor Mêara, jêng ndơ phung Sidôn, tât ma ƀon Aphek jêh ri tât ma n'har neh phung Amôrit.

⁵ N'gor neh phung Gêbalit, jêh ri lĕ bri Liban mpeh luh nar, ntơm bơh Baal-Gat ta jâng yôk Hermôn tât ma ntŭk lăp Hamat.

⁶ Bi ma lĕ rngôch phung ƀon lan gŭ tâm bri klơ dor yôk, ntơm bơh Liban tât ma Misrêpôt-Maim, lĕ rngôch phung Sidôn, Gâp nơm yơh mra mprơh khân păng luh bơh phung ƀon lan Israel. Ƀiălah may tâm pă hom bri nây ma phung Israel jêng drăp ndơn, tĭng nâm nau Gâp ntĭnh jêh ma may.

⁷ Pônây aƀaơ ri, tâm pă hom bri nây ma sĭn ndŭl mpôl, jêh ri ma du n'gul ndŭl mpôl Manasê.”

Tâm pă neh mpeh luh nar dak krong Yurdan

⁸ Phung Ruben, phung Gat, jêh ri du n'gul ndŭl mpôl Manasê hŏ dơn jêh drăp ndơn bơh Y-Môis ăn jêh ma khân păng ta đah ri dak krong Yurdan mpeh luh nar, tĭng nâm Y-Môis, oh mon Brah Yêhôva, ăn jêh ma khân păng.

⁹ N'gor neh khân păng ntơm bơh Arôer ta klơ kơh rlŭng Arnôn jêh ri ƀon toyh gŭ ta nklang rlŭng nây, nđâp ma lĕ n'gor neh lâng klơ dor ntơm bơh Mêdêba tât ma Dibôn,

¹⁰ jêh ri lĕ rngôch ƀon Y-Sihôn, hađăch phung Amôrit, nơm chiă uănh ta Hêsbôn tât ma n'har neh phung Ammôn;

¹¹ Gilêat nđâp ma n'gor neh phung Gêsurit jêh ri phung Makatit, lĕ yôk Hermôn, lĕ Basan tât ta Salêka,

¹² jêh ri lĕ ƀon bri hađăch Ôk ta Basan. Hađăch nây chiă uănh jêh ta Astarôt jêh ri ta Êdrei, jêh ri păng jêng nơm hôm rêh klen bơh phung Rêphaim, Y-Môis dơi jêh đah phung nây jêh ri mprơh lơi khân păng.

¹³ Ƀiălah phung ƀon lan Israel mâu mprơh ôh phung Gêsur jêh ri phung Makatit. Yor ri, phung Gêsurit jêh ri phung Makatit hôm gŭ vah vang phung Israel kŏ tât ta nar aơ.

¹⁴ Y-Môis mâu ăn drăp ndơn ma ndŭl mpôl Lêvi yor lĕ ndơ ƀư brah nhhơr ăn ŭnh sa ma Yêhôva Brah Ndu Israel jêng drăp ndơn khân păng tĭng nâm Păng lah jêh ma Y-Môis.

¹⁵ Y-Môis ăn drăp ndơn ma ndŭl mpôl Ruben tĭng nâm noi deh khân păng.

¹⁶ N'gor neh khân păng ntơm bơh Arôer ta kơh rlŭng Arnôn, jêh ri ƀon ta nklang rlŭng nây, nđâp ma lĕ bri neh lâng klơ dor dăch Mêdêba;

¹⁷ Hêsbôn jêh ri lĕ rngôch ƀon khân păng gŭ tâm bri neh lâng klơ dor, jêng Dibôn, Bamôt-Baal, Bet-Baal-Mêon,

¹⁸ Jahsa, Kêdêmôt, Mêphat,

¹⁹ Kiriathaim, Sipma, Sêret-Sahar gŭ ta klơ gôl tâm rlŭng,

²⁰ Bet-Pêôr, lĕ gôl yôk Pisga jêh ri Bet-Jêsimôt,

²¹ lĕ rngôch ƀon tâm bri neh lâng klơ dor jêh ri lĕ ƀon bri hađăch Sihôn, hađăch phung Amôrit, jêng nơm chiă uănh jêh ta ƀon Hêsbôn. Y-Môis lơh dơi jêh hađăch nây nđâp ma phung kôranh chiă uănh Madian, jêng Y-Êvi, Y-Rêkem, Y-Sur, Y-Hur, jêh ri Y-Rêba, jêng phung kon hađăch Y-Sihôn gŭ tâm n'gor neh nây.

²² Đơ phung khĭt tă bơh đao phung ƀon lan phung Israel, geh Y-Balaam jêng nơm ƀŭk rƀên, kon bu klâu Y-Bêôr.

²³ Dak krong Yurdan jêng n'har neh phung Ruben. Nĕ jêng drăp ndơn phung Ruben tĭng nâm ăp rnăk vâl khân păng, nđâp ma ƀon toyh jêh ri ƀon jê̆ khân păng.

²⁴ Y-Môis ăn du kô̆ neh ma ndŭl mpôl Gat, tĭng nâm ăp noi deh khân păng.

²⁵ N'gor neh ndŭl mpôl Gat jêng Jaser, lĕ rngôch ƀon Gilêat, du n'gul bri phung Ammôn, tât ma ƀon Arôer tâm tham ma Raba;

²⁶ jêh ri ntơm bơh Hêsbôn tât ma Ramat Mispê, jêh ri Betônim; jêh ri ntơm bơh Mahanaim tât ta n'har Dêbir.

²⁷ Bi ma tâm rlŭng geh Bet-Haram, Bet-Nimra, Sukôt, jêh ri Saphôn, jêng kô̆ hôm e bơh ƀon bri hađăch Sihôn, hađăch Hêsbôn, dak krong Yurdan jêng n'har tât ma bôl dak mƀŭt Chinêrôt, ta đah ri dak krong Yurdan mpeh luh nar.

²⁸ Nây jêng drăp ndơn phung Gat tĭng nâm ăp rnăk vâl khân păng nđâp ma ƀon toyh jêh ri ƀon jê̆ khân păng.

²⁹ Y-Môis ăn đŏng du kô̆ neh ma du n'gul ndŭl mpôl phung Manasê, jêng drăp ndơn ma du n'gul ndŭl mpôl Manasê tĭng nâm ăp rnăk vâl khân păng.

³⁰ N'gor neh khân păng ntơm bơh Mahanaim, lĕ n'gor Basan, lĕ ƀon bri hađăch Ôk, hađăch bri Basan, jêh ri lĕ rngôch ƀon jê̆ bri Jar tâm bri Basan, geh prao jât rplay ƀon.

³¹ Du n'gul bri Gilêat, Astarôt, jêh ri ƀon Êdrei, jêng lĕ ƀon tâm ƀon bri hađăch Ôk tâm bri Basan, lĕ ƀon aơ tâm pă ma du n'gul phung kon sau Y-Makir, săn Y-Manasê tĭng nâm ăp rnăk vâl khân păng.

³² Nĕ jêng drăp ndơn Y-Môis tâm pă jêh tâm neh lâng bri Môap, ta đah ri dak krong Yurdan, mpeh luh nar Yêrikô.

³³ Ƀiălah Y-Môis mâu ăn drăp ndơn ma ndŭl mpôl Lêvi, yorlah Yêhôva Brah Ndu Israel jêng drăp ndơn ma khân păng, di nâm nau Păng lah jêh ma khân păng.