Yôsuê 11 - Nau Brah Ndu Ngơi 2023

Y-Yôsuê dơi lơh lĕ phung hađăch n'gor mpeh Pa Lơ

¹ Tơlah tăng nau nây, Y-Jabin, hađăch ƀon Hasôr, prơh bunuyh hăn mbơh ma Y-Jôbap, hađăch ƀon Madon, hăn ma hađăch ƀon Simrôn, ma hađăch ƀon Aksap,

² jêh ri hăn ma phung hađăch gŭ ta n'gor klơ dor yôk mpeh pa lơ, tâm neh lâng Chinêrôt mpeh tâm rđŭng, tâm bri jâng yôk jêh ri ta neh lâng klơ yôk Dôrơ mpeh nhâp nar.

³ Hađăch prơh đŏng phung hăn mbơh văch ta phung ƀon lan Kanaan mpeh luh nar jêh ri mpeh nhâp nar, văch tât ta phung Amôrit, phung Hitit, phung Pêrisit, phung Jêbusit gŭ tâm n'gor klơ dor yôk, jêh ri tât ta phung Hivit gŭ ta tâm dâng jâng yôk Hermôn, tâm n'gor Mispa.

⁴ Phung hađăch nây djôt leo lĕ rngôch phung tahan hăn tâm lơh, jêng du phung tahan âk ngăn tâm ban ma choih ta kơh dak mƀŭt nđâp ma seh jêh ri ndeh seh âk ngăn.

⁵ Lĕ rngôch phung hađăch nây tâm rƀŭn jêh ri ƀư pôih ndrel ndrăng khân păng dăch dak n'hor ta Mêrôm gay tâm lơh đah phung Israel.

⁶ Ƀiălah Brah Yêhôva lah ma Y-Yôsuê: “Lơi klach ôh, yorlah nar ôi aơ ta mông aơ, Gâp mra jao lĕ rngôch khân păng tâm ti phung Israel nkhĭt khân păng. Khân may mra koh jâng jon seh jêh ri su lĕ ndeh seh khân păng ma ŭnh.”

⁷ Pônây Y-Yôsuê ndrel ma lĕ rngôch phung tahan văch ndal, rduh lơh khân păng dăch ta n'hor dak Mêrôm,

⁸ jêh ri Brah Yêhôva jao khân păng tâm ti phung Israel. Y-Yôsuê jêh ri lĕ rngôch phung tahan lơh khân păng, tĭng lơh khân păng tât ta ƀon Sidôn Toyh, tât ta ƀon Misrêpôt-Maim, jêh ri tât ta rlŭng Mispê mpeh luh nar. Khân păng nkhĭt lĕ rngôch phung tâm lĕ ƀon nây, mâu om du huê nuyh hôm rêh.

⁹ Y-Yôsuê ƀư ma khân păng tĭng nâm nau Brah Yêhôva ntăm jêh: koh jâng jon seh khân păng, jêh ri su lơi ndeh seh khân păng ma ŭnh.

Lơh pit sŏk ƀon Hasôr jêh ri lĕ ƀon êng êng

¹⁰ Nôk nây, Y-Yôsuê plơ̆ sĭt pit in Hasôr jêh ri sŏk đao nkhĭt hađăch ƀon nây. Kăl e ƀon Hasôr jêng kôranh ma lĕ rngôch ƀon bri hađăch nây.

¹¹ Y-Yôsuê jêh ri phung tahan păng sŏk đao nkhĭt lĕ rngôch bunuyh gŭ tâm ƀon nây, mâu om du mpa geh n'hâm nsôr hôm rêh, jêh ri păng su ƀon Hasôr ma ŭnh.

¹² Y-Yôsuê nhŭp đŏng lĕ phung hađăch nây nkhĭt lơi ma đao, jêh nây pit sŏk jêh ri ƀư rai lĕ ƀon khân păng tĭng nâm Y-Môis, oh mon Brah Yêhôva, ntăm jêh.

¹³ Ƀiălah phung Israel mâu su ôh du rplay ƀon gŭ ta klơ dor yôk, Y-Yôsuê knŏng su ƀon Hasôr dơm.

¹⁴ Phung ƀon lan Israel sŏk pit lĕ rngôch ndơ jêh ri mpô mpa rong tâm lĕ ƀon nây, ƀiălah sŏk đao nkhĭt lĕ rngôch bunuyh jêh ri ƀư rai khân păng. Khân păng mâu om du huê bunuyh hôm rêh.

¹⁵ Tĭng nâm Brah Yêhôva ntăm jêh ma Y-Môis, oh mon Păng, Y-Môis ntăm đŏng ma Y-Yôsuê, jêh ri Y-Yôsuê ƀư di tĭng lĕ nau Brah Yêhôva hŏ ntăm jêh ma Y-Môis, Y-Yôsuê mâu ăn klen du ntil nau ôh.

¹⁶ Pônây, Y-Yôsuê pit sŏk lĕ n'gor nây, lĕ nkual klơ dor yôk, lĕ nkual Nêgep, lĕ nkual Gôsen, nkual jâng yôk jêh ri nkual neh lâng, nkual dor yôk Israel jêh ri lĕ bri jâng yôk khân păng;

¹⁷ bơh mpeh yôk Halak hao mpeh Sêir tât ma ƀon Baal-Gat tâm rlŭng Liban, tâm dâng jâng yôk Hermôn. Păng nhŭp lĕ hađăch n'gor nây, lơh jêh ri nkhĭt khân păng.

¹⁸ Y-Yôsuê tâm rdâng đah lĕ rngôch phung hađăch nây tâm năng nar jŏ jong.

¹⁹ Mâu geh ôh du rplay ƀon ƀư nau đăp mpăn đah phung ƀon lan Israel, knŏng phung Hivit gŭ ta ƀon Gibêôn. Phung ƀon lan Israel pit sŏk lĕ rngôch ƀon ma nau tâm lơh.

²⁰ Yorlah Brah Yêhôva ƀư ma phung hađăch nây dăng nuih n'hâm tâm rdâng đah phung Israel, gay ma khân păng mra rai lĕ, mâu dơi geh nau yô̆ nđach ôh, di nâm Brah Yêhôva ntăm jêh ma Y-Môis.

²¹ Rnôk nây, Y-Yôsuê pih kloh phung Anakim gŭ ta bri klơ dor yôk, lĕ ƀon Hêbron, ƀon Dêbir, ta ƀon Anap, jêh ri ta lĕ bri klơ dor yôk Yuđa tâm ban đŏng lĕ bri klơ dor yôk Israel. Y-Yôsuê ƀư rai lĕ khân păng ndrel ma lĕ ƀon khân păng.

²² Mâu hôm geh du huê bunuyh Anakim ôh hôm gŭ tâm bri phung ƀon lan Israel; knŏng hôm rnoh djê̆ gŭ ta Gaxa, ta Gat, jêh ri ta Asdôt.

²³ Pônây Y-Yôsuê pit sŏk lĕ n'gor tĭng nâm lĕ nau Brah Yêhôva ntĭnh ntăm jêh ma Y-Môis, jêh ri ăn bri nây ma phung Israel jêng drăp ndơn, tĭng nâm nau tâm pă ma ăp ndŭl mpôl khân păng. Jêh nau nây, n'gor geh nau đăp mpăn, mâu hôm geh nau tâm lơh.