Yôsuê 10 - Nau Brah Ndu Ngơi 2023

Nar nsrŭng

¹ Nôk Y-Adôni Sêdek, hađăch Yêrusalem, tăng lư Y-Yôsuê hŏ lơh pit jêh ƀon Ai jêh ri ƀư rai lĕ ƀon nây, ƀư ma Ai jêh ri hađăch păng nâm bu hŏ ƀư ma Yêrikô jêh ri hađăch păng; tăng đŏng ma phung ƀon lan Gibêôn dăn nau tâm rnglăp đah phung Israel jêh ri gŭ ndrel ma khân păng

² hađăch nây klach ngăn, yorlah ƀon Gibêôn jêng ƀon toyh, tâm ban du rplay ƀon hađăch; ƀon nây toyh lơn ma ƀon Ai, jêh ri lĕ phung ƀon nây jêng phung janh ktang.

³ Pônây Y-Adôni Sêdek, hađăch ƀon Yêrusalem, đă bunuyh hăn ma Y-Hôham, hađăch ƀon Hêbron, nđâp ma Y-Piram, hađăch ƀon Jarmut, ma Y-Japhia, hađăch ƀon Lakis, jêh ri ma Y-Dêbir, hađăch ƀon Êglon, lah pô aơ:

⁴ “Hăn hao hom ma gâp jêh ri kơl gâp tâm lơh đah ƀon Gibêôn yorlah ƀon nây ƀư jêh nau đăp mpăn đah Y-Yôsuê jêh ri đah Phung ƀon lan Israel.”

⁵ Pônây prăm nuyh hađăch phung Amôrit, jêng hađăch ƀon Yêrusalem, hađăch ƀon Hêbron, hađăch ƀon Jarmut, hađăch ƀon Lakis, hađăch ƀon Êglon rgum ndrel ma ndrăng khân păng, djôt leo lĕ rngôch phung tahan khân păng hăn hao ƀư rmlak panăp ƀon Gibêôn, jêh ri hăn lơh đah ƀon nây.

⁶ Phung ƀon lan Gibêôn đă bunuyh hăn ma pôih tahan Gilgal, lah ma Y-Yôsuê pô aơ: “Dăn lơi dĭng chalơi ôh oh mon may. Hăn hao hom gơnh ma hên, tâm rklaih jêh ri kâp kơl hên; yorlah lĕ rngôch hađăch phung Amôrit gŭ ta klơ yôk hŏ tâm rnglăp jêh gay tâm lơh đah hên.”

⁷ Pônây tă bơh Gilgal Y-Yôsuê hăn hao ndrel ma phung tahan janh ktang jêh ri lĕ rngôch phung tahan.

⁸ Brah Yêhôva lah ma Y-Yôsuê: “Lơi klach ôh, yorlah Gâp jao jêh khân păng tâm ti may, mâu hôm geh ôh du huê nơm dơi tâm rdâng tanăp măt may.”

⁹ Pônây Y-Yôsuê tă bơh Gilgal hăn ndăng tâm du măng ang, jêh nây lơh ndal khân păng.

¹⁰ Brah Yêhôva ƀư ăn ma khân păng nchuăt du rŭng răng tanăp phung Israel, jêh ri nkhĭt khân păng âk ngăn ta Gibêôn. Phung tahan Israel tĭng rgot khân păng ta trong sop Bet-Hôron, jêh ri lơh nkhĭt khân păng kŏ tât ma Asêka jêh ri Makêda.

¹¹ Dôl khân păng nchuăt du panăp phung Israel, Brah Yêhôva ƀư ăn lŭ toyh tă bơh trôk tŭp ta trong ntơm bơh sop Bet-Hôron tât ta Asêka, jêh ri khân păng khĭt da dê. Rnoh phung khĭt yor mih tŭp pler jêng âk lơn ma rnoh phung khĭt ma đao phung tahan Israel.

¹² Tâm nar Brah Yêhôva jao phung Amôrit tâm ti phung Israel, Y-Yôsuê ngơi ma Brah Yêhôva tanăp măt phung Israel pô aơ: “Hơi nar, gŭ nsrŭng hom ta klơ Gibêôn! Hơi khay, gŭ nsrŭng hom tâm rlŭng Aijalon!”

¹³ Pônây nar nđâp ma khay gŭ nsrŭng, Kŏ tât phung ƀon lan Kôranh Brah plơng jêh ma phung rlăng khân păng. Mâu di hĕ bu nchih nau nây tâm ndrom samƀŭt Y-Jasar? Nar gŭ nsrŭng ta n'gul trôk, jêh ri mâu ndal nhâp ôh klăp lah du nar.

¹⁴ Ntơm bơh nĕ jêh ri tât aƀaơ, mâu mâp geh nar tâm ban ma nar nây, jêng nar Brah Yêhôva iăt bâr du huê bunuyh yorlah Brah Yêhôva tâm lơh an ma phung Israel.

¹⁵ Jêh nây Y-Yôsuê jêh ri lĕ rngôch phung Israel plơ̆ sĭt ma pôih tahan ta Gilgal.

Lơh rai prăm hađăch

¹⁶ Prăm hađăch nây nchuăt du, jêh ri gŭ krap tâm du trôm lŭ ta Makêda.

¹⁷ Bu mbơh ma Y-Yôsuê gĭt: “Bu joi saơ jêh prăm hađăch nĕ khân păng du krap tâm trôm lŭ ta Makêda.”

¹⁸ Y-Yôsuê lah: “Rlă hom lŭ toyh brôi ta bâr trôm nây jêh ri đă bunuyh gak njrăng khân păng.

¹⁹ Bi khân may nơm lơi gŭ rlu ôh, tĭng hom phung rlăng khân may, lơh phung tahan khân păng pakơi, lơi ăn khân păng nchuăt du lăp tâm ƀon khân păng ôh, yorlah Yêhôva Brah Ndu khân may hŏ jao jêh khân păng tâm ti khân may.”

²⁰ Tơlah Y-Yôsuê jêh ri phung Israel dơi jêh lơh khân păng kŏ tât pih kloh lĕ khân păng, knŏng hôm đê̆ đă phung tahan nchuăt lăp tâm lĕ ƀon geh mpêr nâp,

²¹ lĕ rngôch ƀon lan plơ̆ sĭt đăp mpăn ma Y-Yôsuê tâm pôih tahan ta Makêda, jêh ri mâu hôm geh ôh du huê bunuyh janh ngơi mhĭk đah phung ƀon lan Israel.

²² Rnôk nây, Y-Yôsuê lah: “Pơk hom bâr trôm lŭ djôt leo prăm nuyh hađăch nây luh jêh ri njŭn leo văch ma gâp.”

²³ Khân păng ƀư pônây, djôt leo prăm nuyh hađăch nây luh bơh trôm lŭ jêh ri njŭn leo văch ma păng, nĕ jêng hađăch ƀon Yêrusalem, hađăch ƀon Hêbron, hađăch ƀon Jarmut, hađăch ƀon Lakis, jêh ri hađăch ƀon Êglon.

²⁴ Nôk bu njŭn leo prăm hađăch nây văch ma Y-Yôsuê, Y-Yôsuê kuăl lĕ rngôch phung bu klâu Israel jêh ri lah ma phung kôranh chiă uănh tahan hŏ hăn ndrel jêh n'hanh păng pô aơ: “Văch dăch hom, jot jâng khân may ta trô ko phung hađăch aơ.” Khân păng hăn văch dăch, jot jâng khân păng ta trô ko phung hađăch nây.

²⁵ Y-Yôsuê lah ma khân păng: “Lơi klach mâu lah rdja nuih n'hâm ôh; janh ktang hom jêh ri nâp, yorlah Brah Yêhôva mra ƀư tâm ban pônây ma lĕ rngôch phung rlăng khân may jêng phung khân may mra tâm lơh.”

²⁶ Jêh nau nây, Y-Yôsuê lơh nkhĭt phung hađăch nĕ, yông khân păng ta prăm mlâm tơm si, jêh ri bu yông prăm nuyh hađăch nĕ ta klơ tơm si kŏ tât kêng măng.

²⁷ Nôk nar nhâp, Y-Yôsuê ntăm ma phung tahan păng djôt săk khân păng tă bơh tơm si. Khân păng mƀăr lĕ săk khĭt nây tâm trôm lŭ, jêng ntŭk phung hađăch nĕ hŏ gŭ krap, jêh nây rlă lĕ lŭ toyh njĭr ta bâr trôm nây; lŭ nây ăt hôm kŏ tât ta nar aơ.

Y-Yôsuê tâm lơh pit sŏk lĕ ƀon ta nkual Bơh Dâng

²⁸ Tâm nar nây, Y-Yôsuê ăt lơh pit Makêda, jêh ri sŏk đao nkhĭt lĕ ƀon nây nđâp ma hađăch păng. Păng ƀư rai ƀon nây jêh ri lĕ rngôch mpa rêh tâm nây, mâu om du huê nuyh hôm gŭ rêh ôh. Păng ƀư ma hađăch ƀon Makêda nâm bu păng hŏ ƀư jêh ma hađăch ƀon Yêrikô.

²⁹ Jêh nau nây, Y-Yôsuê ndrel ma lĕ rngôch phung Israel tă bơh Makêda găn Lipna jêh ri lơh Lipna.

³⁰ Brah Yêhôva ăt jao ƀon Lipna nđâp ma hađăch păng tâm ti phung Israel. Khân păng djôt đao gay ƀư rai ƀon nây jêh ri lĕ rngôch bunuyh tâm ƀon nây, mâu om du huê hôm gŭ rêh. Păng ƀư ma hađăch ƀon nây tâm ban păng hŏ ƀư jêh ma hađăch ƀon Yêrikô.

³¹ Jêh nĕ, Y-Yôsuê nđâp ma lĕ rngôch phung Israel hăn luh tă bơh Lipna tât ma Lakis, nchueng jŭm jêh ri tâm lơh đah ƀon nây.

³² Brah Yêhôva jao Lakis tâm ti phung Israel. Nar tal bar khân păng lơh pit sŏk ƀon nây, sŏk đao ƀư rai ƀon nây jêh ri lĕ rngôch mpa rêh gŭ tâm ƀon nây tâm ban păng ƀư jêh ta Lipna.

³³ Rnôk nây, Y-Hôram, hađăch ƀon Gêser, hăn hao ŭch kơl ma Lakis, ƀiălah Y-Yôsuê lơh hađăch nĕ jêh ri phung tahan păng, mâu om du huê hôm gŭ rêh.

³⁴ Y-Yôsuê ndrel ma lĕ rngôch phung Israel dâk hăn tă bơh Lakis tât ma ƀon Êglon, nchueng jŭm jêh ri tâm lơh đah ƀon nây.

³⁵ Nar nây, khân păng tâm lơh pit in jêh ri sŏk đao ƀư rai ƀon nây. Nar nây đŏng, Y-Yôsuê ƀư rai lĕ ƀon jêh ri lĕ rngôch phung tâm ƀon nây tâm ban hŏ ƀư jêh ma Lakis.

³⁶ Jêh nĕ, Y-Yôsuê ndrel ma lĕ rngôch phung Israel tă bơh Êglon hăn hao ma Hêbron, jêh ri rduh lơh đah ƀon nây.

³⁷ Khân păng pit in jêh ri sŏk đao ƀư rai ƀon nây, hađăch păng, lĕ ƀon jê̆, jêh ri lĕ rngôch mpa rêh gŭ tâm ƀon nây, mâu om du huê hôm gŭ rêh. Păng lĕ ƀư rai jêh ƀon jêh ri lĕ rngôch mpa rêh gŭ tâm ƀon nây tâm ban hŏ ƀư jêh ma Êglon.

³⁸ Y-Yôsuê ndrel ma lĕ rngôch phung Israel hăn tât tâm lơh đah Dêbir.

³⁹ Păng pit sŏk ƀon nây ndrel ma lĕ rngôch ƀon jê̆, jêh nây nhŭp hađăch păng jêh ri sŏk đao ƀư rai khân păng. Păng ƀư rai lĕ rngôch bunuyh tâm ƀon nây, mâu om du huê hôm gŭ rêh. Păng hŏ ƀư jêh ma ƀon Dêbir jêh ri hađăch ƀon nây tâm ban ma păng hŏ ƀư jêh ma Hêbron jêh ri Lipna nđâp ma hađăch păng.

⁴⁰ Pônây Y-Yôsuê tâm lơh pit sŏk ma lĕ n'gor, n'gor klơ dor, n'gor bơh pa dâng, n'gor jâng yôk, n'gor klơ yôk jêh ri lĕ rngôch hađăch khân păng. Păng mâu om du huê nuyh hôm gŭ rêh, păng ƀư rai lĕ rngôch mpô mpa geh n'hâm nsôr, tâm ban ma nau Yêhôva Brah Ndu phung Israel ntăm jêh.

⁴¹ Y-Yôsuê dơi đah lĕ hađăch nĕ ntơm bơh Kadês Barnê tât ta Gaxa, jêh ri lĕ bri Gôsen tât ma Gibêôn.

⁴² Y-Yôsuê nhŭp lĕ phung hađăch nây jêh ri pit sŏk bri khân păng knŏng hăn lơh du tơ̆ dơm, yorlah Yêhôva Brah Ndu phung Israel tâm lơh an ma phung Israel.

⁴³ Jêh nau nây, Y-Yôsuê jêh ri lĕ rngôch phung Israel plơ̆ sĭt ma pôih tahan ta Gilgal.