Yôsuê 1 - Nau Brah Ndu Ngơi 2023

Nau pit sŏk neh ton ( 1:1 – 12:24 ) Brah Ndu ton ma Y-Yôsuê

¹ Jêh Y-Môis, oh mon Brah Yêhôva khĭt jêh, Brah Yêhôva lah ma Y-Yôsuê, kon bu klâu Y-Nun, nơm kơl kan Y-Môis:

² “Y-Môis, oh mon Gâp khĭt jêh. Aƀaơ may jêh ri lĕ rngôch ƀon lan aơ dâk hăn rgăn kơh ri dak krong Yurdan, gay lăp tâm bri Gâp dăch ăn ma phung ƀon lan Israel.

³ Ta ntŭk mpang jâng khân may jot jêh, Gâp ăn ma khân may, tĭng nâm Gâp hŏ ton jêh ma Y-Môis.

⁴ Nkual neh khân may mra sŏk ntơm bơh bri rdah jêh ri bri Liban aơ tât ta dak krong toyh, jêng dak krong Ơphrat, lĕ bri phung Hitit tât ta Dak Mƀŭt Toyh mpeh nhâp nar.

⁵ Du bông nau rêh may mâu mra geh ôh nơm dơi tâm rdâng đah may. Gâp mra gŭ ndrel ma may tâm ban Gâp hŏ gŭ ndrel jêh ma Y-Môis; Gâp mâu mra ƀah ngai đah may ôh, mâu chalơi may.

⁶ Ăn may janh ktang jêh ri nănh yorlah may mra njŭn leo phung ƀon lan aơ hăn sŏk dơn bri neh Gâp hŏ ton jêh ăn ma chô yau khân păng.

⁷ Ăn may janh ktang, nănh nanê̆ jêh ri blau njrăng ƀư tĭng lĕ rngôch nau vay Y-Môis, oh mon Gâp, ntĭnh jêh ma may; lơi teng pa ma mâu lah pa chiau ôh, gay moh ntŭk may hăn mra dơi geh jêng.

⁸ Ndrom samƀŭt nau vay aơ lơi ăn ngai bơh bâr mbung may, ƀiălah mĭn rvê hom nau nây măng nâm nar, gay blau njrăng ƀư tĭng lĕ nau nchih jêh tâm nây. Ri mơ may chăt jêng jêh ri dơi jêng tâm trong may hăn.

⁹ Mâu di Gâp hŏ ntĭnh jêh ma may? Janh ktang hom, nănh! Lơi râm sâr, lơi klach ôh! Yorlah Yêhôva Brah Ndu may gŭ ndrel ma may tâm ăp ntŭk may hăn.”

Y-Yôsuê ntăm đă dâk hăn

¹⁰ Jêh nau nây, Y-Yôsuê ntăm ăn ma phung kôranh chiă uănh phung ƀon lan pô aơ:

¹¹ “Hăn nchuăt hom lam tâm rmlak tahan jêh ri ntăm ma phung ƀon lan pô aơ: ‘Ndrăp hom ndơ sông sa! Hôm tâm pe nar dơm khân may mra rgăn dak krong Yurdan aơ, gay lăp pit sŏk neh Yêhôva Brah Ndu khân may ăn ma khân may.’”

¹² Y-Yôsuê lah đŏng ma phung Ruben, phung Gat, jêh ri du n'gul ndŭl mpôl Manasê pô aơ:

¹³ “Kah gĭt tay hom nau ngơi Y-Môis, oh mon Brah Yêhôva, hŏ ntăm jêh ma khân may pô aơ: ‘Yêhôva Brah Ndu khân may ăn ma khân may du ntŭk rlu jêh ri ăn neh aơ ma khân may.’

¹⁴ Ur, kon, jêh ri mpô mpa rong khân may mra gŭ tâm neh Y-Môis ăn ma khân may mpeh kơh aơ dak krong Yurdan; ƀiălah khân may, jêng lĕ rngôch phung janh ktang, ăn djôt ndơ tâm lơh hăn rlet lor panăp đah phung oh nâu khân may, jêh ri kâp kơl khân păng,

¹⁵ kŏ tât Brah Yêhôva ăn nau rlu ma phung oh nâu khân may, tâm ban hŏ ăn jêh ma khân may, jêh ri khân păng tâm ban đŏng dơn neh Yêhôva Brah Ndu khân may ăn ma khân păng. Jêh nau nây khân may mra plơ̆ sĭt pit sŏk drăp ndơn jêng neh Y-Môis, oh mon Brah Yêhôva, ăn jêh ma khân may mpeh đah aơ dak krong Yurdan, mpeh luh nar.”

¹⁶ Khân păng lah ma Y-Yôsuê: “Hên mra ƀư lĕ nau may ntăm jêh ma hên jêh ri mra hăn moh ntŭk may đă hăn.

¹⁷ Hên mra tông bâr may tâm lĕ nau kan nâm bu hên hŏ tông bâr jêh ma Y-Môis. Knŏng ŭch Yêhôva Brah Ndu may gŭ ndrel ma may, tâm ban Păng hŏ gŭ ndrel jêh ma Y-Môis!

¹⁸ Mbu tâm rdâng đah nau may ntăm jêh ri mâu tông ôh lĕ nau may ngơi, bu mra nkhĭt lơi nơm nây. Knŏng dăn may janh ktang jêh ri nănh nuih n'hâm.”