Yônais 4 - Nau Brah Ndu Ngơi 2023

Y-Yôna mâu maak jêh ri geh Kôranh Brah nduyh

¹ Rnôk nây, Y-Yôna mâu maak jêh ri ji nuih hâu ngăn.

² Păng mbơh sơm ma Brah Yêhôva pô aơ: “Ơ Brah Yêhôva, mâu di hĕ nau aơ jêng nau gâp hŏ lah jêh ma May dôl gâp hôm gŭ tâm bri gâp hĕ? Yor nây yơh gâp ndal hăn du ma bri Tarsis. Yorlah gâp gĭt May jêng Brah Ndu ueh, yô̆ nđach, mâu gơnh ji nuih ôh, bêng ma nau ueh jêh ri tâm rgâl nau mĭn mâu ƀư tŭp nau mhĭk.

³ Ơ Brah Yêhôva, aƀaơ aơ gâp vơl dăn ma May sŏk hom nau rêh gâp, yorlah ma gâp, khĭt ueh lơn đah hôm rêh!”

⁴ Brah Yêhôva ôp păng: “Di lĕ may ji nuih?”

⁵ Rnôk nây, Y-Yôna luh du tă bơh ƀon Ninive jêh ri gŭ ta ƀon mpeh luh nar. Ta nây, păng ƀư du mlâm ndưp jêh ri gŭ nde tâm dâng gui ndưp nây gay kâp uănh nau mra geh tât ma ƀon nây.

⁶ Yêhôva Brah Ndu rơm ndrăp ăn du mlâm tơm rpŭng jêh ri ăn păng vơr hao prêh ta klơ Y-Yôna gŭ gay geh n'hâm ta klơ bôk Y-Yôna jêh ri gay rklaih păng tă bơh nau păng rgănh. Y-Yôna maak hâu ngăn ma tơm rpŭng nây.

⁷ Ƀiălah kah ôi taơ, luh nar, Brah Ndu ăn du mlâm ndrŭng tât chuh ma tơm rpŭng nây, jêh ri păng nhop klêu.

⁸ Tơlah luh nar, Brah Ndu rơm ăn sial duh khôm tă mpeh luh nar jêh ri nar jŭr nđat ta klơ bôk Y-Yôna kŏ tât păng huơi jêh ri păng dăn dơi khĭt jêh ri lah pô aơ: “Bi ma gâp, khĭt ueh lơn đah hôm rêh!”

Y-Yôna geh nau nduyh

⁹ Ƀiălah Brah Ndu lah ma Y-Yôna: “Tơlah may nuih yor tơm rpŭng aơ, di lĕ?” Păng lah: “May ji nuih kŏ tât khĭt ăt di đŏng.”

¹⁰ Brah Ndu lah đŏng: “May nhhuach ma du mlâm tơm rpŭng may mâu mâp hŏt r'ah yor păng jêh ri may mâu đŏng lĕ mât mray ăn păng toyh. Păng hon tâm du măng jêh ri păng khĭt tâm du măng.

¹¹ Bi Gâp, mâm dĭng Gâp mâu nhhuach ma ƀon Ninive, yorlah tâm ƀon nây geh rmeh ma du rsen bar rmưn bunuyh mâu gĭt tâm rnglah ôh ti pa ma đah ti pa chiau, ndrel ma âk mpô mpa ta nây hĕ?”