Yônais 3 - Nau Brah Ndu Ngơi 2023

Y-Yôna hăn tât ƀon Ninive

¹ Geh nau Brah Yêhôva lah ma Y-Yôna tơ̆ bar pô aơ:

² “Dâk hom may, hăn tât ma Ninive ƀon toyh jêh ri mbơh ma păng nau Gâp hŏ nti lah jêh ma may.”

³ Pôri, Y-Yôna hăn ro ma ƀon Ninive tĭng nâm nau Brah Yêhôva ngơi. Ninive jêng ƀon toyh ngăn, mra hăn jâng roh tâm pe nar hăn trong.

⁴ Y-Yôna ntơm lăp tâm ƀon, du nar hăn trong jêh ri mbơh pô aơ: “Hôm puăn jât nar đŏng Ninive mra rlâm rai!”

⁵ Phung ƀon lan Ninive chroh ma Brah Ndu. Khân păng mbơh nau ât sông sa jêh ri ntơm bơh phung toyh lơn kŏ tât ma phung kon se jê̆ nsoh ao ƀau da dê.

⁶ Nau mhe mhan nây tât ma hađăch ƀon Ninive, pôri păng dâk tă bơh sưng hađăch păng doh lơi ao jâr păng, put ao ƀau jêh ri gŭ tâm ŭnh buh.

⁷ Jêh nây hađăch ntăm nau aơ tâm lam ƀon Ninive: “Tĭng nâm nau hađăch ntăm jêh ri phung kôranh toyh păng, mâu dơi ăn bunuyh mâu lah mpô mpa, ndrôk mâu lah biăp mâu dơi chiăm ler du ntil ndơ ôh. Mâu dơi ăn khân păng sông sa mâu lah nhêt dak ôh,

⁸ ƀiălah bunuyh jêh ri ma mpô mpa nsoh bok ƀau da dê. Lĕ rngôch bunuyh mbơh sơm hom lĕ nuih n'hâm ma Brah Ndu. Ăp nơm chalơi hom trong mhĭk jêh ri nau kan janh ktang bơh ti păng.

⁹ Gĭt lah Brah Ndu mra tâm rgâl nau mĭn jêh ri lơi lĕ nau Păng ji nuih gay ăn ma he klaih bơh nau khĭt?”

¹⁰ Rnôk nây, Brah Ndu saơ nau khân păng ƀư jêh ri saơ khân păng hŏ chalơi jêh trong mhĭk khân păng pôri Păng tâm rgâl nau mĭn ma nau mhĭk tât ta klơ khân păng nâm bu hŏ lah, jêh ri Păng mâu ƀư nau nây ôh.