Yônais 2 - Nau Brah Ndu Ngơi 2023

Y-Yôna mbơh sơm tâm ndŭl ka

¹ Brah Yêhôva rơm du mlâm ka toyh gay ma rvăn Y-Yôna. Y-Yôna gŭ tâm ndŭl ka pe nar pe măng.

² Y-Yôna tă bơh ndŭl ka mbơh sơm ma Yêhôva Brah Ndu păng.

³ Păng lah: “Gâp mâp nau mhĭk kuăl mbơh sơm ma Brah Yêhôva Jêh ri Păng hŏ plơ̆ lah ma gâp Tă bơh tâm trôm ndŭl ƀon phung khĭt, gâp nter lah Pôri Păng hŏ tăng jêh bâr gâp.

⁴ May hŏ mƀăr jêh gâp tâm brŏng jru Tâm dâng blat dak mƀŭt Jêh ri n'hor dak toyh nkŭm jŭm gâp. Lĕ rngôch mpiăt dak jêh ri dak rbuh May rgăn Văch nkŭm ta klơ gâp da dê.

⁵ Gâp nter lah: ‘Gâp lĕ bu mƀăr tă bơh tanăp măt May; Nđâp tơlah pônây, gâp ăt n'gơr uănh ma ngih brah kloh ueh May.’

⁶ Dak văch nkŭm jŭm gâp kŏ tât huêng gâp; Brŏng jru gŭ jŭm gâp puăn mpeh; Mbrĭng dak lĕ put bôk gâp.

⁷ Gâp hŏ jŭr jêh tât lĕ mbon jâng yôk; Neh hŏ sŏk rnăng păng rdâl ta klơ gâp n'ho ro. Ơ Yêhôva Brah Ndu gâp, May hŏ djôt jêh nau rêh gâp tă bơh trôm Jru!

⁸ Tơlah huêng gâp lĕ huơi jêh tâm gâp Pôri gâp kah gĭt ma Brah Yêhôva Jêh ri nau gâp mbơh sơm tât ma May, Lăp tât tâm ngih brah kloh ueh May.

⁹ Phung mĭn rvê ma nau mƀruh Pôri nau yô̆ nđach mra chalơi khân păng.

¹⁰ Ƀiălah gâp mra sŏk bâr tâm rnê Mra nhhơr ndơ ƀư brah ma May; Gâp mra plơ̆ lôch nau gâp hŏ ton jêh. Nau tâm rklaih luh tă bơh Brah Yêhôva!”

¹¹ Brah Yêhôva lah ma ka jêh ri păng jrih Y-Yôna luh ta klơ neh sơh.