Yônais 1 - Nau Brah Ndu Ngơi 2023

Y-Yôna nchuăt du bơh Kôranh Brah

¹ Geh nau Brah Yêhôva lah ma Y-Yôna kon bu klâu, Y-Amitai:

² “Dâk hăn hom may, hăn tât ma Ninive ƀon toyh jêh ri rdâng đah păng yorlah nau mhĭk khân păng hao jêh tât ta măt Gâp.”

³ Ƀiălah Y-Yôna dâk hăn du pôn ma bri Tarsis gay der bơh panăp măt Brah Yêhôva. Păng hăn jŭr ta ƀon Jôpa mâp du mlâm kumpăn hăn ma bri Tarsis. Y-Yôna ăn prăk ncho jêh ri jŭr kumpăn hăn Tarsis ndrel khân păng gay der bơh panăp Brah Yêhôva.

⁴ Ƀiălah Brah Yêhôva njêng phŭt toyh ta klơ dak mƀŭt jêh ri phŭt chuănh tât ta dak mƀŭt ƀư du mlâm kumpăn bơi chah rai.

⁵ Phung ƀĭt kumpăn klach da dê, ăp nơm kuăl ma brah khân păng nơm. Jêh ri khân păng mƀăr lơi ndô ndơ tâm kumpăn tâm dak mƀŭt gay ma n'gơch kumpăn. Ƀiălah Y-Yôna trŭnh hăn jêh tâm trôm blat kumpăn lâng săk jêh ri hăk bê̆ch.

⁶ Kôranh kumpăn văch dăch ma păng jêh ri lah: “Dơi lĕ may gŭ bê̆ch? Hăn dâk hom! Kuăl hom ma brah may. Klăp lah brah nây mra kah gĭt tay he pôri he mra klaih khĭt.”

⁷ Jêh nây, phung ƀĭt kumpăn tâm lah ndrăng khân păng pô aơ: “Văch hom, ăn he tâm nchroh gay gĭt mbu yor nơm geh nau mhĭk aơ tât ma he.” Pôri khân păng tâm nchroh jêh ri nau nchroh di ma Y-Yôna.

⁸ Rnôk nây, khân păng lah ma păng: “Ăn ma hên gĭt moh yor nau mhĭk tât aơ jŭr nkhŭt ta klơ he? Moh nau kan may jêh ri mbah tă may? Mbah tă bri dak may văch? Moh mpôl băl bunuyh?”

⁹ Păng plơ̆ lah: “Gâp jêng du huê Hêbrơ jêh ri gâp klach yơk ma Brah Yêhôva jêng Brah Ndu klơ trôk, Păng hŏ njêng jêh dak mƀŭt jêh ri neh sơh.”

¹⁰ Phung bunuyh gŭ ta klơ kumpăn klach ngăn jêh ri ôp păng: “Moh nau may hŏ ƀư jêh?” Rnôk nây, khân păng gĭt jêh păng du ndĕ tă bơh măt Brah Yêhôva yorlah păng hŏ nkoch jêh ma khân păng.

¹¹ Pôri khân păng ôp păng: “Mâm nau hên mra ƀư ma may gay ma dak mƀŭt dơi gŭ rngân ma he?” Yorlah dak mƀŭt rbuh lơ hâu ktang lơn.

¹² Păng plơ̆ lah pô aơ: “Sŏk hom gâp jêh ri mƀăr gâp tâm nklang dak mƀŭt rnôk nây dak mƀŭt mra gŭ rngân ma khân may, yorlah gâp gĭt yor gâp yơh phŭt toyh chuănh aơ tât ma khân may.”

¹³ Ƀiălah, phung bunuyh nây ƀĭt vah mplơ̆ kumpăn rlet ma kơh ƀiălah mâu dơi ôh yorlah dak mƀŭt rbuh tâm rdâng đah khân păng lơ hâu ktang lơn.

¹⁴ Khân păng mbơh sơm ma Brah Yêhôva pô aơ: “Ơ Brah Yêhôva, hên vơh vơl ma May, dăn lơi ăn hên khĭt yor nau rêh bunuyh aơ jêh ri lơi ta ăn mham mâu geh tih nkhŭt ntŭp ta klơ hên! Ơ Brah Yêhôva yorlah May jêng Nơm hŏ ƀư jêh nau May ŭch.”

¹⁵ Jêh nây, khân păng nhŭp Y-Yôna mƀăr tâm dak mƀŭt jêh ri nau ji nuih dak mƀŭt rngân.

¹⁶ Yor nây, phung bunuyh nây klach yơk ma Brah Yêhôva. Khân păng nhhơr ndơ ƀư brah ma Brah Yêhôva jêh ri ƀư nau ton ma Păng.