Yôhan 8 - Nau Brah Ndu Ngơi 2023

¹ Bi Brah Yêsu hao klơ yôk Ôlive.

Bu ur văng tĭr

² Tât ơm ôi, Păng plơ̆ tay ta ngih brah. Geh âk phung ƀon lan văch ta Păng da dê; Păng gŭ nti lah ma khân păng.

³ Phung kôranh nchih samƀŭt jêh ri phung Pharisi njŭn leo du huê bu ur khân păng nhŭp dôl văng tĭr, ăn bu ur gŭ tâm nklang phung âk

⁴ jêh ri lah ma Brah Yêsu: “Hơi Nơm Nti, bu nhŭp bu ur aơ dôl păng văng tĭr.

⁵ Tâm nau vay, Y-Môis ntăm ma he klŭp lŭ phung bunuyh ƀư nau pônây. Bi May, mâm May lah?”

⁶ Khân păng lah kơt nây gay ma rlong uănh Brah Yêsu, dĭng ma geh nau dơi phong Păng. Ƀiălah Brah Yêsu kŭnh, nchih ma nglau ti Păng ta neh.

⁷ Yor phung nây ăt ôp Păng ƀaƀơ, yor ri dĭng Brah Yêsu n'gơr bôk jêh ri lah: “Mbu tâm khân may jêng bunuyh mâu geh nau tih, ăn păng klŭp bu ur nây ma lŭ lor.”

⁸ Jêh nây Brah Yêsu kŭnh nchih ta neh.

⁹ Lah khân păng tăng nau nây, khân păng du rhôch rhôch, phung bu ranh hăn lor. Brah Yêsu gŭ êng n'hanh ma bu ur hôm gŭ ta nây.

¹⁰ Brah Yêsu n'gơr bôk lah đah bu ur nây: “Hơi bu ur, ntŭk phung phong ay ndơh? Mâu geh bunuyh tâm rmal ay ƀơh?”

¹¹ Bu ur nây plơ̆ lah: “Hơi Kôranh Brah, mâu hôm geh bunuyh đŏng ôh.” Brah Yêsu lah: “Gâp ăt mâu tâm rmal ay; hăn hom, lơi hôm ƀư tih đŏng ôh.”]

Brah Yêsu jêng nau ang ma neh ntu

¹² Brah Yêsu lah đŏng ma phung ƀon lan pô aơ: “Gâp jêng nau ang ma neh ntu, mbu nơm tĭng Gâp mâu mra hăn tâm nau ngo ôh, ƀiălah mra geh nau ang ma nau rêh.”

¹³ Pôri phung Pharisi lah: “Nơm Nti mbơh nkoch êng May nơm, nau May mbơh nkoch nây mâu nanê̆ ôh.”

¹⁴ Brah Yêsu plơ̆ lah: “Nđâp lah Gâp mbơh êng Gâp nơm kđôi, ri mơ nau Gâp mbơh nkoch jêng ngăn, yorlah Gâp gĭt mbah tă ntŭk Gâp văch jêh ri mbah ntŭk Gâp hăn. Ƀiălah khân May mâu gĭt ôh, mbah tă ntŭk gâp văch jêh ri khân may mâu gĭt lĕ mbah ntŭk Gâp hăn.

¹⁵ Khân may phat dôih tĭng nau vay bunuyh, ƀiălah Gâp mâu phat dôih bu ôh.

¹⁶ Ƀiălah, tơlah Gâp phat dôih, nau Gâp phat dôih jêng di ngăn, yorlah mâu êng Gâp ôh, ƀiălah Gâp ndrel ma Mbơ̆ jêng Nơm hŏ njuăl Gâp.

¹⁷ Tâm nau vay khân may geh nchih pô aơ nau lah bar hê bunuyh mbơh nkoch jêng di ngăn.

¹⁸ Gâp mbơh nkoch êng ma Gâp nơm, jêh ri Mbơ̆ jêng Nơm hŏ njuăl Gâp, mbơh nkŏch đŏng ma Gâp.”

¹⁹ Yor ri, khân păng ôp Brah Yêsu: “Mbah ntŭk Mbơ̆ May?” Brah Yêsu plơ̆ lah: “Khân may mâu gĭt Gâp ôh, mâu đŏng gĭt Mbơ̆ Gâp. Lah khân may gĭt năl Gâp ri mơ gĭt đŏng Mbơ̆ Gâp.”

²⁰ Brah Yêsu lah lĕ nau aơ ta ntŭk n'gân lĕ thŭng prăk nhhơr, dôl nti lah tâm ngih brah. Ƀiălah mâu geh bunuyh nhŭp Păng ôh yorlah mông Păng ê hŏ tât.

²¹ Brah Yêsu lah đŏng ma khân păng: “Gâp hăn, khân may mra joi Gâp, jêh ri khân may mra khĭt tâm nau tih khân may nơm. Ta ntŭk Gâp hăn, khân may mâu dơi hăn ôh.”

²² Phung Yuđa lah: “Mâm păng mra nkhĭt êng păng nơm, lah păng lah pô aơ: ‘Ta ntŭk Gâp hăn, khân may mâu dơi hăn ôh’?”

²³ Brah Yêsu plơ̆ lah: “Khân may luh tă tâm dâng, ƀiălah Gâp văch tă bơh klơ. Khân may jêng tă bơh neh ntu aơ, Gâp mâu jêng tă bơh neh ntu ôh.

²⁴ Yor nây, Gâp hŏ lah jêh ma khân may, khân may mra khĭt tâm nau tih khân may nơm; Yorlah tơlah khân may mâu chroh ôh ma nau Gâp jêng Nơm N'ho Ro, khân may mra khĭt tâm nau tih khân may nơm.”

²⁵ Khân păng ôp đŏng Brah Yêsu pô aơ: “Mbu moh May jêng?” Brah Yêsu plơ̆ lah: “Nâm bu nau Gâp hŏ lah jêh ma khân may saơm dơh.

²⁶ Gâp geh âk nau ŭch lah jêh ri phat dôih ma khân may; ƀiălah Nơm njuăl Gâp văch jêng ngăn, jêh ri Gâp mbơh ăn ma neh ntu lĕ nau Gâp hŏ tăng tă bơh Păng.”

²⁷ Phung khân păng mâu gĭt rbăng ôh nau Brah Yêsu nkoch Mbơ̆ ma khân păng.

²⁸ Yor ri, Brah Yêsu lah đŏng: “Nôk khân may yông Kon Bunuyh ta klơ, nôk nây khân may mra gĭt pô aơ Gâp jêng Nơm N'ho Ro, jêh ri gĭt Gâp mâu êng Gâp nơm ƀư du ntil ndơ ôh, ƀiălah knŏng mbơh lĕ nau Mbơ̆ nti jêh ma Gâp.

²⁹ Nơm tơm njuăl Gâp gŭ ndrel ma Gâp, mâu ôh chalơi Gâp gŭ êng, yorlah Gâp ƀư ueh nuih n'hâm Păng ƀaƀơ.”

³⁰ Dôl Brah Yêsu ngơi lĕ nau nây, geh âk bunuyh chroh ma Păng.

³¹ Pôri, Brah Yêsu lah ma phung Yuđa chroh jêh ma Păng pô aơ: “Lah khân may gŭ nâp tâm nau Gâp ngơi, khân may jêng oh mon Gâp ngăn.

³² Khân may mra gĭt nau ngăn, jêh ri nau ngăn mra rklaih ma khân may.”

³³ Phung Yuđa lah: “Hên jêng phung kon sau Y-Abraham, mâu mâp jêng dĭk bu ôh, mâm ƀư May lah: ‘Khân may mra jêng kon me’?”

³⁴ Brah Yêsu plơ̆ lah: “Nanê̆ ngăn, Gâp lah ngăn ma khân may, mbu nơm ƀư tih jêng dĭk ma nau tih.

³⁵ Bunuyh dĭk bu mâu gŭ mro tâm ngih ôh, ƀiălah kon sau gŭ ta nây mro.

³⁶ Kơt nây, Lah Kon Bunuyh ăn khân may jêng kon me khân may mra jêng kon me nanê̆ ngăn.

³⁷ Gâp gĭt khân may jêng phung kon sau Y-Abraham, ƀiălah khân may joi nau ŭch ƀư nkhĭt gâp, yorlah nau Gâp ngơi mâu lăp ôh tâm khân may.

³⁸ Gâp lah lĕ nau Gâp hŏ saơ jêh ta ntŭk Mbơ̆ Gâp, bi khân may ƀư lĕ nau khân may tăng bơh mbơ̆ khân may nơm.”

³⁹ Khân păng plơ̆ lah: “Mbơ̆ hên jêng Y-Abraham.” Brah Yêsu lah: “Lah khân may jêng kon sau Y-Abraham, khân may ƀư lĕ kan Y-Abraham ƀư.

⁴⁰ Ƀiălah aƀaơ aơ khân may joi nau nkhĭt Gâp, jêng bunuyh hŏ lah ma khân may ma nau ngăn tă bơh Brah Ndu. Y-Abraham mâu ƀư lĕ nau kơt nây ôh.

⁴¹ Khân may ƀư kan ma mbơ̆ khân may nơm.” Khân păng lah: “Hên mâu di jêng kon văng tĭr ôh, hên knŏng geh du Mbơ̆, jêng Brah Ndu.”

⁴² Brah Yêsu lah ma khân păng: “Lah Brah Ndu jêng Mbơ̆ khân may, khân may rŏng lĕ ma Gâp; yorlah Gâp luh tă bơh Brah Ndu jêh ri văch tă bơh Păng, yor Gâp mâu văch êng Gâp nơm ôh, ƀiălah Brah Ndu yơh hŏ njuăl Gâp.

⁴³ Mâm ƀư khân may mâu gĭt rbăng nau Gâp lah? Yorlah khân may mâu iăt nau Gâp ngơi.

⁴⁴ Khân may luh tă bơh mbơ̆ khân may jêng brah mhĭk, jêh ri khân may ŭch ƀư tĭng nau kơnh ŭch ma mbơ̆ khân may. Bơh ntơm saơm păng jêng nơm nkhĭt bunuyh, jêh ri mâu gŭ tâm nau ngăn ôh, yorlah nau ngăn mâu geh tâm păng ôh. Lah păng ngơi nau mƀruh jêng ngơi tĭng nuih n'hâm djơh păng nơm, yorlah păng jêng nơm mƀruh jêh ri mbơ̆ nau mƀruh.

⁴⁵ Ƀiălah yor ri Gâp ngơi nau ngăn, khân may mâu chroh ma Gâp.

⁴⁶ Mbu nơm tâm phung khân may dơi phong Gâp jêng tih? Lah Gâp ngơi nau ngăn, mâm ƀư khân may mâu chroh ma Gâp?

⁴⁷ Mbu nơm luh văch tă bơh Brah Ndu, păng iăt nau Brah Ndu. Khân may mâu iăt ôh, yorlah khân may mâu jêng phung Brah Ndu.”

⁴⁸ Phung Yuđa plơ̆ lah: “Hên lah Nơm Nti jêng du huê bunuyh Samari jêh ri geh brah mhĭk lơh, di mâu lah mâu?”

⁴⁹ Brah Yêsu plơ̆ lah: “Gâp mâu geh brah mhĭk lơh ôh, ƀiălah Gâp tâm rnê Mbơ̆ Gâp, bi khân may ƀư bêk ma Gâp.

⁵⁰ Gâp mâu joi nau chrêk rmah ma Gâp nơm ôh; hŏ geh Nơm joi nau nây jêh ri phat dôih.

⁵¹ Nanê̆ ngăn, Gâp lah ngăn ma khân may, mbu nơm djôt prăp nau Gâp ngơi, păng mâu mra mâp nau khĭt ôh.”

⁵² Phung Yuđa lah: “Aƀaơ aơ, hên gĭt rah vah jêh Nơm nti geh brah mhĭk lơh. Y-Abraham lĕ khĭt jêh, phung nơm mbơh lor hŏ khĭt tâm ban lĕ; ƀiălah May lah: ‘Lah mbu moh djôt prăp nau Gâp ngơi mâu mra mâp ma nau khĭt ôh.’

⁵³ Nơm Nti toyh lơn ma Y-Abraham, chô yau hên jêng bunuyh khĭt jêh ƀơh? Phung nơm mbơh lor khĭt tâm ban lĕ! May mĭn May nơm mbu jêng?”

⁵⁴ Brah Yêsu plơ̆ lah: “Lah Gâp tâm rnê êng Gâp nơm, nau chrêk rmah Gâp mâu khlay ôh. Mbơ̆ Gâp nơm tâm rnê Gâp, Păng jêng Nơm khân may kuăl jêng Brah Ndu khân may.

⁵⁵ Khân may mâu gĭt năl Păng ôh, ƀiălah Gâp gĭt năl Păng. Lah Gâp lah Gâp mâu gĭt năl Păng ôh, Gâp mra jêng bunuyh mƀruh tâm ban ma khân may. Ƀiălah Gâp gĭt năl Păng ngăn jêh ri djôt prăp nau Păng ngơi.

⁵⁶ Y-Abraham jêng mbơ̆ khân may maak răm ŭch saơ ma nar Gâp; păng hŏ saơ jêh ri răm rhơn.”

⁵⁷ Phung Yuđa lah: “Nơm Nti ê hŏ tât prăm jât năm ƀiălah hŏ saơ jêh Y-Abraham!”

⁵⁸ Brah Yêsu plơ̆ lah: “Nanê̆ ngăn, Gâp lah ngăn ma khân may, êlor geh Y-Abraham, Gâp hŏ geh jêh.”

⁵⁹ Khân păng dônh lŭ gay klŭp Brah Yêsu, ƀiălah Păng du ndĕ, jêh ri luh bơh ngih brah.