Yôhan 5 - Nau Brah Ndu Ngơi 2023

Brah Yêsu ta ƀon Yêrusalem. – Păng ƀư bah bunuyh rvĕn ta dak nglao Ƀêthehđa

¹ Pakơi nây, geh du nar rƀŭn phung Yuđa, Brah Yêsu hăn hao ta ƀon Yêrusalem.

² Ta ƀon Yêrusalem, dăch mpông Biăp, geh du nglao dak, nau ngơi Hêbrơ rnha jêng Ƀêthehđa. Nglao nây geh prăm đôr mpông.

³ Geh âk ngăn bunuyh ji kuet, chieh măt, rvĕn, jâng ti siăr gŭ bê̆ch ta nây.

⁵ Geh du huê bunuyh ji hŏ jŏ pe jât ma pham năm.

⁶ Brah Yêsu saơ bunuyh nây gŭ bê̆ch jêh ri gĭt jêh nơm nây ji hŏ jŏ năm, păng ôp: “May ŭch bah lĕ?”

⁷ Bunuyh ji nây plơ̆ lah: “Ơ kôranh, mâu geh bunuyh kơl mƀăr gâp tâm nglao tâm nôk dak nkŏch, tơ lah gâp tât hŏ geh jêh bunuyh êng hŏ jŭr lor ma gâp jêh.”

⁸ Brah Yêsu lah: “Dâk hom, tuy sưng bê̆ch may jêh ri hăn sĭt.”

⁹ Bunuyh nây dơi bah ji ro, tuy sưng bê̆ch jêh ri hăn sĭt. Nar nây jêng nar saƀat.

Phung Yuđa phong Brah Yêsu ƀư tih tâm nar saƀat

¹⁰ Phung Yuđa lah ma bunuyh mhe bah ji: “Nar aơ jêng nar saƀat, may mâu dơi ôh tuy sưng bê̆ch.”

¹¹ Ƀiălah bunuyh nây lah: “Nơm ƀư bah nau ji gâp lah ma gâp: ‘Tuy hom sưng bê̆ch may jêh ri hăn.’ ”

¹² Khân păng ôp: “Mbu nơm đă: ‘Tuy hom sưng bê̆ch jêh ri hăn’?”

¹³ Ƀiălah bunuyh mhe bah nây mâu gĭt năl ôh nơm ƀư bah păng, yorlah Brah Yêsu du jêh ri lăp tâm phung âk ta nây.

¹⁴ Pakơi nây, Brah Yêsu mâp bunuyh nây tâm ngih Brah, jêh ri lah ma păng: “Aơ, may hŏ bah ji jêh, lơi hôm may ƀư tih ôh, klach lah geh nau mhĭk lơ hô rlau lơn tât ma may.”

¹⁵ Bunuyh nây hăn nkoch ăn ma phung Yuđa pô aơ Brah Yêsu jêng bunuyh hŏ ƀư bah nau ji ma păng nơm.

¹⁶ Yor nây, phung Yuđa ƀư mhĭk ma Brah Yêsu, yor nau Păng ƀư bah lĕ nau nây tâm nar Saƀat.

¹⁷ Ƀiălah Brah Yêsu lah đŏng ma khân păng: “Mbơ̆ Gâp hôm ƀư kan ma tât nar aơ, Gâp kan kơt nây lĕ.”

¹⁸ Yor nây, phung Yuđa lơ hâu joi nau ŭch nkhĭt Brah Yêsu, yor Păng mâu knŏng ƀư rai nau vay tâm nar saƀat dơm ôh, jêh ri kuăl Brah Ndu jêng Mbơ̆, kơp êng săk Păng nơm tâm ban ma Brah Ndu.

¹⁹ Pôri, Brah Yêsu lah ma khân păng: “Nanê̆ ngăn, Gâp lah nanê̆ ngăn khân may, Kon mâu dơi ƀư êng ôh, ƀiălah knŏng ƀư nau Kon saơ Mbơ̆ ƀư; yorlah lĕ kan Mbơ̆ ƀư, Kon ƀư đŏng tâm ban pônây.

²⁰ Yorlah Mbơ̆ rŏng ma Kon jêh ri, tâm mpơl ma Kon lĕ kan Mbơ̆ hŏ ƀư. Mbơ̆ mra hôm tâm mpơl ma Kon lĕ kan dŭt toyh lơn ma lĕ nau nây đŏng gay ăn khân may hih rhâl.

²¹ Tâm ban ma Mbơ̆ ƀư ăn phung khĭt dâk rêh tay pônây lĕ Kon ăn đŏng nau rêh ma mbu nơm Kon ŭch kơt nây lĕ.

²² Mbơ̆ mâu geh phat dôih ôh, ƀiălah jao lĕ nau dơi phat dôih ma Kon,

²³ gay lĕ bunuyh yơk ma Kon tâm ban yơk ma Mbơ̆ lĕ. Mbu nơm mâu yơk ma Kon mâu đŏng yơk ma Mbơ̆ jêng Nơm hŏ njuăl Kon văch.

²⁴ Nanê̆ ngăn, Gâp lah nanê̆ ngăn ma khân may, mbu nơm iăt nau Gâp ngơi jêh ri chroh Nơm hŏ njuăl Gâp, păng geh nau rêh n'ho ro jêh ri mâu geh ôh nau phat dôih, ƀiălah rgăn bơh nau khĭt gay hăn lăp tâm nau rêh.”

²⁵ “Nanê̆ ngăn, Gâp lah ma khân may, mông dăch tât, jêh ri hŏ tât jêh, nôk phung khĭt mra tăng bâr Kon Brah Ndu, jêh ri phung bunuyh tăng bâr Păng mra rêh.

²⁶ Yorlah nâm bu Mbơ̆ geh nau rêh tâm Păng nơm, pôri Mbơ̆ ăn đŏng ma Kon nau rêh tâm Păng nơm kơt nây lĕ.

²⁷ Mbơ̆ hŏ ăn jêh nau dơi ƀư nau phat dôih ma Kon, yorlah Kon jêng Kon Bunuyh.

²⁸ Lơi hih rhâl ôh nau aơ, yor mông dăch tât, nôk lĕ rngôch bunuyh khĭt gŭ tâm môch mra tăng bâr Kôranh Brah jêh ri du luh;

²⁹ mbu hŏ ƀư nau ueh mra dâk rêh tay gay geh nau rêh ngăn, mbu hŏ ƀư mhĭk mra dâk rêh tay gay dơn nau phat dôih.

³⁰ Gâp nơm mâu dơi ƀư êng du ntil kan ôh; Gâp phat dôih tĭng nau Gâp tăng, jêh ri nau Gâp phat dôih jêng nau sŏng, yorlah Gâp mâu joi tĭng nau gâp ŭch, ƀiălah joi tĭng nau mĭn Nơm hŏ njuăl jêh Gâp.

³¹ Tơlah Gâp mbơh nkoch êng ma Gâp nơm, nau Gâp mbơh nkoch mâu nanê̆ ôh.

³² Geh Nơm êng nkoch ma Gâp; Gâp gĭt nau Nơm nây mbơh nkoch ma Gâp nây jêng di ngăn.

³³ Khân may hŏ njuăl jêh bunuyh văch ta Y-Yôhan, jêh ri Y-Yôhan hŏ mbơh nkoch ma nau ngăn.

³⁴ Mâu di ôh Gâp ŭch geh nau kon bunuyh mbơh nkoch, ƀiălah Gâp lah lĕ nau nây gay ma khân may dơi rklaih.

³⁵ Y-Yôhan jêng ŭnh kađen mpoh hit ang, bi khân may ŭch geh nau maak ƀât lât tâm nau ang păng.

³⁶ Ƀiălah Gâp geh du nau mbơh nkoch dŭt toyh rlau lơn ma nau Y-Yôhan; yorlah lĕ kan Mbơ̆ hŏ jao Gâp ƀư lôch jêh, lĕ kan Gâp dôl ƀư aơ, mbơh nkoch pô aơ Mbơ̆ hŏ njuăl Gâp.

³⁷ Mbơ̆ nơm, Nơm hŏ njuăl Gâp, ăt mbơh nkoch lĕ Gâp. Khân may ê mâp tăng bâr Păng, mâu lah saơ muh măt Păng,

³⁸ jêh ri nau Păng ngơi mâu gŭ tâm khân may ôh, yorlah khân may mâu chroh ôh ma Nơm Păng hŏ njuăl văch.

³⁹ Khân may sek uănh joi Nau Brah Ndu Ngơi, yorlah mĭn tâm nây geh nau rêh n'ho ro. Nau Brah Ndu Ngơi nây yơh mbơh nkoch ma Gâp,

⁴⁰ ƀiălah khân may mâu ŭch văch ta Gâp gay dơi geh nau rêh n'ho ro.

⁴¹ Gâp mâu dơn ôh nau chrêk rmah tă bơh kon bunuyh,

⁴² ƀiălah Gâp gĭt jêh khân may mâu geh nau rŏng Brah Ndu gŭ tâm khân may ôh.

⁴³ Gâp văch tâm amoh Mbơ̆ Gâp, ƀiălah khân may mâu rom dơn Gâp ôh, tơlah geh bunuyh êng văch tâm amoh êng păng nơm, ri mơ khân may mra rom dơn păng.

⁴⁴ Khân may ŭch dơn nau chrêk rmah ndrăng khân may nơm, mâu joi ôh nau chrêk rmah tă bơh Brah Ndu knŏng nguay, mâm khân may dơi chroh?

⁴⁵ Lơi mĭn pô aơ Gâp mra phong khân may tanăp Mbơ̆. Bunuyh mra phong khân may jêng Y-Môis, bunuyh nây khân may dơm nau kâp gân.

⁴⁶ Tơlah khân may chroh ma Y-Môis, pôri chroh đŏng ma Gâp, yorlah Y-Môis nchih jêh ma Gâp.

⁴⁷ Ƀiălah tơlah khân may mâu chroh ôh lĕ nau Y-Môis nchih, mâm ƀư khân may dơi chroh nau Gâp ngơi?”