Yôhan 4 - Nau Brah Ndu Ngơi 2023

Brah Yêsu jêh ri bu ur Samari

¹ Lah Brah Yêsu hŏ gĭt jêh phung Pharisi tăng lư Păng dơn jêh ri ƀư ƀaptem ma oh mon âk rlau lơn ma Y-Yôhan.

² (Na nê̆ mâu di Brah Yêsu ƀư ƀaptem ôh, ƀiălah jêng phung oh mon Păng ƀư),

³ yor ri Brah Yêsu du luh bơh n'gor Yuđa plơ̆ sĭt ta n'gor Galilê.

⁴ Ƀiălah ăn Păng hăn rgăn n'gor Samari.

⁵ Pôri, Păng hăn tât ta du ƀon tâm n'gor Samari, kuăl jêng Sikar, dăch lôk mir Y-Yakôp ăn jêh ma kon păng jêng Y-Yôsep.

⁶ Ta aơ geh du mlâm ntu dak Y-Yakôp. Yorlah rgănh hăn trong, rĭ dĭng Brah Yêsu gŭ rlu kêng ntu dak. Nôk nây klăp lah jât ma bar mông nklang bôk nar.

⁷ Du huê bu ur Samari văch bâk dak. Brah Yêsu lah ma păng: “Ăn dak ma Gâp nhêt.”

⁸ Nôk nây, phung oh mon Păng hŏ hăn rvăt ndơ sa tâm ƀon.

⁹ Bu ur Samari nây lah: “Mâm may jêng du huê bunuyh Yuđa dăn dak ta gâp jêng du huê bu ur Samari?” (Yorlah phung Yuđa ơm mâu dơh dăch ôh đah phung Samari).

¹⁰ Brah Yêsu plơ̆ lah: “Tơlah ay gĭt ndơ Brah Ndu ăn, jêh ri Păng dôl ngơi đah ay: ‘Ăn Gâp dăn nhêt dak’ jêng mbu nơm pôri n'hêl nanê̆ ay mra vơl dăn ma Păng, jêh ri Păng mra ăn dak rêh ma ay.”

¹¹ Bu ur nây lah: “Hơi Kôranh, may mâu geh ndơ gay bâk, ntu dak aơ jru ngăn, pôri ntŭk tă may geh dak rêh nây?

¹² Chô yau hên jêng Y-Yakôp ăn ma hên ntu dak aơ; Y-Yakôp nơm, phung kon sau jêh ri ma mpô mpa rong păng nhêt ta ntu dak aơ da dê, mâm may toyh lơn ma Y-Yakôp?”

¹³ Brah Yêsu plơ̆ lah: “Mbu nơm nhêt dak aơ mra hôm ji hir ƀaƀơ,

¹⁴ ƀiălah mbu nơm nhêt dak Gâp mra ăn, mâu hôm ji hir đŏng ôh. Dak Gâp ăn mra plơ̆ jêng tu dak tâm bunuyh nây, bêng ler tât nau rêh n'ho ro.”

¹⁵ Bu ur nây lah: “Hơi kôranh, dăn ăn gâp dak nây, gay ma gâp mâu hôm ji hir jêh ri mâu hôm văch ta aơ bâk dak đŏng.”

¹⁶ Brah Yêsu lah: “Hăn kuăl hom sai ay, jêh ri plơ̆ ta aơ.”

¹⁷ Bu ur nây ơh: “Gâp mâu geh sai ôh.” Brah Yêsu lah: “Ay lah ay mâu geh sai jêng di ngăn,

¹⁸ yorlah ay hŏ geh jêh prăm nuyh sai, bi bunuyh ay gŭ aƀaơ aơ mâu di sai ay ôh; nau aơ ay lah hŏ di ngăn jêh.”

¹⁹ Bu ur nây lah: “Hơi kôranh, gâp gĭt năl may jêng du huê nơm mbơh lor.

²⁰ Chô yau hên yơk mbah ta klơ yôk aơ, bi khân may lah pô aơ ƀon Yêrusalem mhe jêng ntŭk khư yơk mbah.”

²¹ Brah Yêsu lah: “Aơ, hơi bu ur ri, chroh hom ma Gâp, mông dăch tât jêh, khân ay mâu hôm yơk mbah ma Mbơ̆ ta klơ yôk aơ mâu lah ta ƀon Yêrusalem đŏng.

²² Khân ay yơk mbah ma Nơm khân ay mâu gĭt năl, bi hên yơk mbah ma Nơm hên gĭt năl, yorlah nau tâm rklaih văch tă bơh phung Yuđa.

²³ Mông dăch tât jêh ri hŏ tât jêh, nôk phung bunuyh yơk mbah nanê̆ ngăn mra yơk mbah Mbơ̆ ma huêng jêh ri ma nau ngăn; nây jêng phung bunuyh yơk mbah Mbơ̆ ŭch joi.

²⁴ Brah Ndu jêng brah, mbu nơm ŭch yơk mbah ngăn ma Păng, ăn păng yơk mbah ma huêng jêh ri ma nau ngăn.”

²⁵ Bu ur ơh: “Gâp gĭt Nơm Mêsi (ntĭt jêng Brah Krist) mra tât. Tơlah Păng tât, Păng mra mbơh lĕ ntil nau ma hên.”

²⁶ Brah Yêsu lah: “Gâp, bunuyh dôl ngơi đah ay aơ, jêng Nơm nây.”

²⁷ Nôk nây, phung oh mon tât. Khân păng hih rhâl dôl saơ Păng tâm ngơi đah du huê bu ur; ƀiălah mâu geh du huê ôp: “Moh nau Kôranh ŭch?” mâu lah: “Moh nau Kôranh ngơi đah bu ur nây?”

²⁸ Bu ur nây chalơi yăng dak păng ta nây jêh ri hăn lăp tâm ƀon, mbơh ma lĕ rngôch bunuyh pô aơ:

²⁹ “Hăn uănh hom du huê bunuyh hŏ lah di lĕ rngôch nau gâp ƀư jêh. Nây mâu di jêng Brah Krist?”

³⁰ Khân păng luh bơh ƀon jêh ri văch ta Brah Yêsu.

³¹ Tâm dôl nây, phung oh mon vơh vơl ma Păng: “Ơh Nơm Nti, sông sa hom.”

³² Ƀiălah Brah Yêsu plơ̆ lah: “Gâp hŏ geh jêh ndơ sa ƀiălah khân may mâu gĭt ôh.”

³³ Yor ri, phung oh mon tâm lah ndrăng khân păng: “Gĭt hŏ geh bunuyh djôt ndơ sông sa ma Păng, jêh mâu?”

³⁴ Brah Yêsu lah ma khân păng: “Ndơ sông sa Gâp jêng ƀư tĭng nau mĭn ŭch Nơm hŏ njuăl Gâp, jêh ri ƀư lôch jêh nau kan Păng.

³⁵ Mâu di hĕ khân may lah: ‘Hôm puăn khay đŏng rĭ mơ tât yan rek?’ Ƀiălah Gâp lah ma khân may: ‘N'gơr hom jêh ri uănh hom lôk mir ba lĕ dŭm, hŏ rơm ndrăp jêh ma yan rek.

³⁶ Bunuyh rek dơn prăk nkhôm jêh ri prăp nkrem kao play ma nau rêh n'ho ro, pôri bunuyh tuch n'hanh ma bunuyh rek răm maak ndrel.’

³⁷ Ta ntŭk nây, nau bu lah: ‘Bunuyh aơ tuch, nơm ri rek,’ jêng di ngăn.

³⁸ Gâp hŏ njuăl khân may hăn rek ta ntŭk khân may mâu mâp hŏt ƀư, bunuyh êng hŏ ƀư kan hŏt jêh, bi khân may lăp dơn tâm kan hŏt khân păng.”

³⁹ Âk phung Samari tâm ƀon nây chroh ma Brah Yêsu, yor bu ur nây mbơh nkoch jêh pô aơ: “Păng hŏ lah lĕ rngôch nau gâp hŏ ƀư.”

⁴⁰ Yor ri, nôk phung Samari hŏ tât ta Brah Yêsu, khân păng kân Brah Yêsu gŭ ndrel ma khân păng, jêh ri Brah Yêsu hŏ gŭ jêh ta nây bar nar.

⁴¹ Lah tăng nau Brah Yêsu nkoch, rnoh bunuyh chroh lơ hô âk lơn đŏng.

⁴² Khân păng lah ma bu ur nây pô aơ: “Aƀaơ aơ mâu hôm tă bơh nau ay mbơh dĭng hên chroh, ƀiălah hên tăng nau Păng nơm nkoch, jêh ri gĭt nanê̆ Păng jêng Nơm Tâm Rklaih neh ntu.”

Nau Brah Yêsu ƀư bah kon bu klâu du huê kôranh toyh

⁴³ Lôch bar nar nây, Brah Yêsu luh bơh ntŭk nây, hăn tât ta n'gor Galilê.

⁴⁴ (Yorlah Brah Yêsu nơm hŏ dơn jêh pô aơ, nơm mbơh lor bu mâu yơk ôh tâm ƀon tơm păng nơm.)

⁴⁵ Lah hŏ tât jêh ta n'gor Galilê, phung ƀon nây vơt rom Brah Yêsu, yorlah khân păng hŏ saơ jêh lĕ rngôch nau Brah Yêsu ƀư ta ƀon Yêrusalem tâm nar rƀŭn, yorlah khân păng nơm hăn râng tâm rƀŭn đŏng.

⁴⁶ Pôri, Brah Yêsu plơ̆ tay ta ƀon Kana tâm n'gor Galilê, ntŭk Păng hŏ njêng dak jêng ndrănh. Du huê kôranh toyh tâm phung ta ngih hađăch ta ƀon Kapernum geh kon bu klâu geh nau ji.

⁴⁷ Nôk kôranh nây tăng Brah Yêsu tă bơh n'gor Yuđa hăn tât ta n'gor Galilê, păng joi jêh ri dăn ma Brah Yêsu hăn ƀư bah kon bu klâu păng, yor ji dăch khĭt.

⁴⁸ Brah Yêsu lah ma kôranh toyh pô aơ: “Tơlah mâu saơ ôh nau mbên khlay jêh ri nau khlay, nanê̆ khân may mâu chroh ôh!”

⁴⁹ Kôranh toyh nây ơh: “Hơi Kôranh Brah, dăn May hăn êlor kon gâp khĭt!”

⁵⁰ Brah Yêsu lah: “Hăn hom, kon may mra rêh.” Kôranh toyh nây chroh nau Brah Yêsu lah ma păng jêh ri păng plơ̆ sĭt.

⁵¹ Dôl păng hăn rŏ trong, phung oh mon păng tât tâm mâp đah păng jêh ri lah: “Kon bu klâu may rêh jêh!”

⁵² Kôranh toyh ôp khân păng ma ndah mông kon bu klâu gâp dơi bah. Khân păng plơ̆ lah: “Nđaơ, ta du mông mhaơ, păng bah ji kop.”

⁵³ Bunuyh mbơ̆ nây gĭt năl di ta mông Brah Yêsu lah ma păng pô aơ: “Kon may mra rêh”; pôri păng, jêh ri nđâp ma lĕ rnăk vâl chroh da dê.

⁵⁴ Aơ jêng nau mbên khlay rơh bar Brah Yêsu hŏ ƀư jêh, jêh Păng luh bơh n'gor Yuđa plơ̆ sĭt ta n'gor Galilê.