Yôhan 3 - Nau Brah Ndu Ngơi 2023

Brah Yêsu jêh ri Y-Nikôđem

¹ Tâm phung Pharisi, geh du huê bunuyh amoh păng Y-Nikôđem, du huê kôranh chiă uănh tâm phung Yuđa.

² Dôl măng, păng văch ta Brah Yêsu jêh ri lah: “Hơi Nơm Nti, hên gĭt May jêng kôranh nơm nti văch tă bơh Brah Ndu. Tơlah Brah Ndu mâu gŭ ndrel, mâu geh bunuyh dơi ƀư lĕ nau mbên khlay May hŏ ƀư.”

³ Brah Yêsu lah: “Nanê̆ ngăn, Gâp lah ngăn ma may, tơlah du huê bunuyh mâu deh mhe tay, mâu dơi saơ ƀon bri hađăch Brah Ndu ôh.”

⁴ Y-Nikôđem ơh pô aơ: “Mâm ƀư bunuyh lĕ ranh dơi deh tay? Mâm dơi păng plơ̆ lăp tâm ndŭl mê̆ jêh ri deh rơh bar?”

⁵ Brah Yêsu lah: “Nanê̆ ngăn, Gâp lah ngăn ma may: Tơlah du huê bunuyh mâu rnơm ôh ma dak jêh ri ma Brah Huêng Ueh gay deh, mâu dơi lăp tâm ƀon bri hađăch Brah Ndu ôh.

⁶ Moh ndơ tă bơh nglay săk jêng nglay săk, moh ndơ deh tă bơh Brah Huêng Ueh jêng brah.

⁷ Lơi ta hih rhâl ma nau Gâp hŏ lah jêh ma may, ăn may deh mhe đŏng!

⁸ Sial khôm ntŭk păng ŭch khôm, may tăng sial, ƀiălah mâu gĭt sial ntŭk tă luh jêh ri ntŭk păng hăn. Mbu nơm deh mhe tă bơh Brah Huêng Ueh kơt nây đŏng.”

⁹ Y-Nikôđem lah tay: “Mâm ƀư nau nây dơi tât geh?”

¹⁰ Brah Yêsu plơ̆ lah: “May jêng kôranh nơm nti tâm phung Israel, mâm ƀư mâu gĭt rbăng lĕ nau nây?

¹¹ Nanê̆ ngăn, Gâp lah ngăn ma may: He ngơi nau he gĭt, mbơh nkoch nau he hŏ saơ, ƀiălah khân may mâu dơn ôh nau hên mbơh nkoch.

¹² Tơlah Gâp lah ma khân may lĕ nau tâm neh ntu khân may hôm mâu chroh, rlau lơn ma nĕ Gâp nkoch lĕ nau ta klơ trôk, mâm ƀư khân may dơi chroh?

¹³ Ê hŏ geh du huê hao ta klơ trôk, ƀiălah knŏng geh Nơm jŭr tă bơh trôk, jêng Kon Bunuyh.

¹⁴ Tâm ban Y-Môis yông bêh tâm bri rdah tâm ban lĕ, pôri bu mra yông Kon Bunuyh kơt nây lĕ,

¹⁵ gay mbu moh chroh ma Păng dơi nau rêh n'ho ro.

¹⁶ Yorlah Brah Ndu rŏng hâu ngăn ma neh ntu kŏ tât Păng ăn Kon Dul Păng nơm, gay ăn ma mbu nơm chroh ma Kon Păng nây, mâu rai yot ôh, ƀiălah geh nau rêh n'ho ro.

¹⁷ Yorlah Brah Ndu hŏ njuăl Kon Păng văch ta neh ntu, mâu di gay tâm rmal neh ntu ôh, ƀiălah gay neh ntu yor ma Kon Păng dơi tâm rklaih.

¹⁸ Mbu nơm chroh ma Kon nây, mâu geh tâm rmal ôh, ƀiălah mbu nơm mâu chroh ôh, hŏ geh nau tâm rmal jêh, yorlah mâu chroh ma amoh Kon Dul Brah Ndu.

¹⁹ Nau tâm rmal nây jêng kơt aơ: Nau ang hŏ tât jêh ta neh ntu, ƀiălah kon bunuyh ŭch nau ngo rlau lơn ma nau ang, yorlah kan khân păng jêng nau djơh mhĭk.

²⁰ Yorlah mbu nơm ƀư mhĭk, păng tâm rmot ma nau ang jêh ri mâu ŭch văch ôh ta nau ang, klach mpơl nau kan păng ƀư.

²¹ Ƀiălah mbu nơm ƀư tĭng nau ngăn, ri mơ văch tâm nau ang gay lĕ nau păng nơm hŏ ƀư jêh tâm Brah Ndu dơi saơ rah vah.”

Nau Y-Yôhan mbơh nglĕ dŭt

²² Jêh nau nây, Brah Yêsu jêh ri phung oh mon hăn ta n'gor Yuđa. Păng gŭ ndrel ma khân păng jêh ri ƀư ƀaptem.

²³ Y-Yôhan ƀư đŏng ƀaptem ta ƀon Ênôn, dăch Salim, yorlah ta nây geh âk dak jêh ri bu văch dơn nau ƀaptem.

²⁴ Nôk nĕ Y-Yôhan ê hŏ bu krŭng ôh.

²⁵ Nôk nây, geh nau tâm rlăch ma nau rƀŭn ƀư kloh ta nklang phung oh mon Y-Yôhan jêh ri du huê bunuyh Yuđa.

²⁶ Khân păng văch ta Y-Yôhan jêh ri lah: “Hơi nơm nti, bunuyh gŭ ndrel ma may mpeh kăl tê̆ dak krong Yurdan, may hŏ mbơh nkoch ueh jêh, aƀaơ aơ dôl ƀư ƀaptem jêh ri lĕ rngôch bunuyh hăn ta păng da dê.”

²⁷ Y-Yôhan plơ̆ lah: “Lah mâu di tă klơ trôk ăn, mâu geh du huê bunuyh dơi sŏk dơn du ntil ndơ ôh.

²⁸ Khân may nơm hŏ mbơh nkoch ma gâp pô aơ gâp hŏ lah gâp mâu di jêng Brah Krist ôh, ƀiălah bu hŏ njuăl gâp văch lor ma Păng.

²⁹ Mbu mhe gŭ ur, păng nây jêng klay; ƀiălah mĭt jiăng klay gŭ iăt jêh ri maak răm ngăn nôk tăng bâr klay ngơi. Nây jêng nau gâp răm maak nanê̆ rĭng ngăn.

³⁰ Păng khư geh nau tâm n'hao prêh, bi gâp ăn trŭnh tâm dâng.

³¹ Nơm văch tă bơh klơ prêh jêng klơ lĕ rngôch. Mbu luh tă bơh neh jêng ndơ neh ntu, ngơi lĕ nau jêng ndơ neh ntu; ƀiălah Nơm văch tă bơh trôk jêng klơ lĕ rngôch.

³² Păng mbơh nkoch lĕ nau Păng hŏ saơ jêh ri tăng, ƀiălah bu mâu sŏk dơn ôh nau Păng mbơh knoch.

³³ Mbu hŏ sŏk dơn nau Păng mbơh knoch, ƀư nâp pô aơ Brah Ndu jêng nau nanê̆ ngăn.

³⁴ Yorlah Nơm Brah Ndu hŏ njuăl văch jêh mbơh knoch nau ngơi Brah Ndu, yorlah Brah Ndu ăn Brah Huêng Ueh ma Păng mâu geh dŭt.

³⁵ Mbơ̆ rŏng ma Kon jêh ri hŏ jao lĕ ntil ndơ tâm ti Kon.

³⁶ Mbu nơm chroh ma Kon dơi geh nau rêh n'ho ro, mbu mâu ŭch chroh ma Kon mâu dơi geh nau rêh ôh, ƀiălah nau Brah Ndu ji nuih hôm gŭ ta klơ bunuyh nây.”