Yôhan 18 - Nau Brah Ndu Ngơi 2023

Nau nđêh nji, nau khĭt jêh ri nau Brah Yêsu dâk rêh tay ( 18:1 – 21:25 ) Nau bu nhŭp Brah Yêsu

¹ Jêh nau mbơh sơm, Brah Yêsu hăn ndrel ma phung oh mon ta đah ri dak n'hor Kêdrôn; ta nây geh du n'gar, Păng lăp ta nây ndrel ma phung oh mon Păng.

² Y-Yuđas, nơm rlăng ma Păng, gĭt đŏng ntŭk nây, yorlah Brah Yêsu ndrel ma phung oh mon vay hăn tâm mâp ta nây.

³ Pôri, Y-Yuđas njŭn leo du mpôl tahan ndrel ma phung kơl kan phung kôranh ƀư brah toyh jêh ri phung Pharisi hăn ta ntŭk nây, djôt leo ŭnh kađen, ŭnh chai jêh ri ndơ tâm lơh.

⁴ Brah Yêsu gĭt lor jêh lĕ rngôch nau mra tât ma Păng, Păng hăn tât jêh ri ôp: “Mbu khân may joi?”

⁵ Khân păng plơ̆ lah: “Yêsu, bunuyh Nasaret.” Brah Yêsu lah ma: “Gâp aơ!” Yuđas, nơm rlăng ma Păng gŭ ndrel ma khân păng ta nây lĕ.

⁶ Nôk Brah Yêsu lah: “Gâp ƀơh aơ” khân păng rŭch nkơi jêh ri cha lôt ta neh.

⁷ Brah Yêsu ôp đŏng: “Mbu khân may joi?” Khân păng plơ̆ lah: “Yêsu, bunuyh Nasaret.”

⁸ Brah Yêsu lah: “Gâp hŏ lah jêh ma khân may, Gâp ƀơh aơ. Pôri, lah khân may joi nhŭp Gâp, ăn phung bunuyh aơ du sĭt.”

⁹ Nau nây tât di ngăn nau Păng hŏ lah jêh: “Kon mâu ƀư roh du huê ôh tâm phung bunuyh Mbơ̆ ăn jêh ma Kon.”

¹⁰ Y-Simôn Pêtrôs geh du n'gâr đao, păng tăk đao, dong du huê oh mon kôranh ƀư brah toyh lơn, sreh tăch tôr pa ma bunuyh aơ. Oh mon nây amoh păng Y-Malkus.

¹¹ Ƀiălah Brah Yêsu lah ma Y-Pêtrôs: “Ntrŭp lơi đao may tâm ndrop! Gâp mâu mra nhêt hĕ ngan Mbơ̆ hŏ ăn Gâp nhêt?”

Brah Yêsu tanăp Y-Anas. – Y-Pêtrôs dun Brah Yêsu

¹² Nôk nây, phung tahan nđâp ma kôranh chiă uănh jêh ri phung kôranh phung Yuđa nhŭp Brah Yêsu jêh ri chăp lơi.

¹³ Lor lơn, khân păng njŭn leo Brah Yêsu văch ta Y-Anas, yor păng jêng po Y-Kaipe, jêng kôranh ƀư brah toyh lơn tâm năm nây.

¹⁴ Y-Kaipe nơm jêng tâm nchră ma phung Yuđa pô aơ: “Ueh lơn ma du huê bunuyh khĭt ntrok an ma lĕ phung ƀon lan.”

¹⁵ Y-Simôn Pêtrôs jêh ri du huê oh mon êng hăn tĭng Brah Yêsu. Oh mon nây gĭt bên đah kôranh ƀư brah toyh lơn, păng lăp ndrel ma Brah Yêsu tâm ndring ngih kôranh ƀư brah toyh lơn.

¹⁶ Ƀiălah Y-Pêtrôs hôm gŭ padih, dăch mpông sâng. Yor ri, oh mon ri, păng gĭt bên kôranh ƀư brah toyh lơn, hăn luh lah đah bu ur gak mpông, jêh leo Y-Pêtrôs lăp.

¹⁷ Bu ur gak mpông nây lah ma Y-Pêtrôs: “May ƀơh jêng du huê tâm phung oh mon bunuyh nây di lĕ?” Y-Pêtrôs plơ̆ lah: “Mâu di gâp ôh.”

¹⁸ Yorlah bri ji kăt, phung oh mon jêh ri phung kôranh sênh ŭnh ma si ônh rnga, jêh ri gŭ njâr ŭnh. Y-Pêtrôs gŭ njâr ŭnh ndrel ma khân păng ta nây.

¹⁹ Kôranh ƀư brah toyh lơn ôp Brah Yêsu ma phung oh mon jêh ri ma nau Păng nti lah.

²⁰ Brah Yêsu plơ̆ lah: “Gâp hŏ ngơi rah vah jêh ma lĕ rngôch ntil mpôl bunuyh. Gâp vay nti tâm ngih rƀŭn jêh ri tâm ngih brah, ntŭk lĕ rngôch phung Yuđa gŭ rgum, Gâp mâu mâp ngơi du ntil nau ndâp ôh.

²¹ Mâm ƀư may ôp Gâp? Ăn may ôp phung hŏ tăng mâm nau Gâp ngơi, gay ma gĭt Gâp hŏ lah moh nau ma khân păng. Phung nây gĭt lĕ nau Gâp ngơi jêh.”

²² Jêh Brah Yêsu lah nau nây, du huê tâm phung kôranh gŭ ta nây tap ta măt Brah Yêsu ma ti jêh ri lah: “Mâm may nănh plơ̆ lah ma kôranh ƀư brah toyh lơn?”

²³ Brah Yêsu plơ̆ lah: “Lah Gâp ngơi tih, lah hom nau tih nây; ƀiălah lah Gâp ngơi di, mâm ƀư may tap Gâp?”

²⁴ Y-Anas đah bu têk leo Brah Yêsu dôl bu hôm chăp, tât ta Y-Kaipe kôranh ƀư brah toyh lơn.

²⁵ Y-Simôn Pêtrôs hôm gŭ njâr ŭnh, khân păng ôp ma păng: “Mâu di hĕ may jêng du huê tâm phung oh mon păng?” Y-Pêtrôs dun jêh ri plơ̆ lah: “Mâu di gâp.”

²⁶ Du huê tâm phung oh mon kôranh ƀư brah toyh lơn, bunuyh nây jêng mpôl băl đah nơm Y-Pêtrôs sreh tăch tôr, lah: “Mâu di hĕ gâp hŏ saơ may gŭ ndrel ma Păng tâm n'gar?”

²⁷ Y-Pêtrôs ăt dun du tơ̆ đŏng, iăr ndrau ro.

Brah Yêsu tanăp Pilat

²⁸ Pôri, khân păng têk leo Brah Yêsu bơh ngih Y-Kaipe tât ta ngih kôranh phat dôih. Nôk nây jêng ơm ôi. Khân păng nơm mâu lăp ôh tâm ngih kôranh phat dôih, gay bah ƀơ̆ ƀơch, jêh ri dơi sa rƀŭn Nau Găn.

²⁹ Yor nây, Pilat hăn luh, tât ma khân păng jêh ri lah: “Moh nau tih khân may phong bunuyh aơ?”

³⁰ Khân păng plơ̆ lah: “Lah păng mâu di jêng bunuyh mhĭk hên mâu njŭn leo ôh păng ma kôranh.”

³¹ Pilat lah ma khân păng: “Khân may djôt jêh ri phat dôih Păng tĭng nau vay khân may nơm.” Phung Yuđa ơh: “Hên mâu dơi vay nkhĭt bu ôh.”

³² Nau aơ tât di ngăn tĭng nau Brah Yêsu hŏ lah jêh, mâm nau Păng mra khĭt.

³³ Pilat lăp đŏng tâm ngih kôranh phat dôih, kuăl Brah Yêsu jêh ri ôp: “Di lĕ may jêng hađăch phung Yuđa?”

³⁴ Brah Yêsu plơ̆ lah: “May nơm lah nau nây, mâu lah geh bunuyh êng lah nau Gâp ma may?”

³⁵ Pilat plơ̆ lah: “Gâp hĕ jêng bunuyh Yuđa? Phung mpôl băl may jêh ri phung kôranh ƀư brah toyh jao jêh may ma gâp. Pôri moh nau may mâp ƀư jêh?”

³⁶ Brah Yêsu plơ̆ lah: “Ƀon bri hađăch Gâp mâu geh ta neh ntu aơ ôh. Lah ƀon bri hađăch Gâp ta neh ntu aơ, phung bunuyh tĭng Gâp tâm lơh an, mâu ăn bu jao ôh Gâp tâm ti phung Yuđa. Ƀiălah ƀon bri hađăch Gâp mâu di tâm neh ntu aơ ôh.”

³⁷ Pilat lah đŏng: “Pôri may ƀơh jêng hađăch?” Brah Yêsu plơ̆ lah: “Ngăn may nơm lah Gâp jêng hađăch. Aơ jêng mâm nau bu deh ma Gâp, mâm nau Gâp văch ta neh ntu aơ: Nây jêng gay ma mbơh nkoch nau ngăn. Mbu nơm jêng bunuyh gŭ tâm nau ngăn, nơm nây iăt nau Gâp ngơi.”

³⁸ Pilat ôp: “Mâm jêng nau ngăn?” Jêh Pilat lah kơt nây, păng hăn tâm mâp ma phung Yuđa jêh ri lah: “Gâp mâu saơ ôh bunuyh aơ geh nau tih.

³⁹ Ƀiălah tĭng nau vay khân may, tât rƀŭn Nau Găn gâp vay mƀơk ma khân may du huê bunuyh bu krŭng. Pôri, khân may ŭch lĕ gâp mƀơk hađăch phung Yuđa ma khân may?”

⁴⁰ Khân păng nter ma bâr huy: “Lơi mƀơk ma păng, mƀơk hom ma Y-Barabas!” Y-Barabas jêng du huê bunuyh ntŭng.