Yôhan 17 - Nau Brah Ndu Ngơi 2023

Nau Brah Yêsu mbơh sơm

¹ Jêh Brah Yêsu ngơi nau nây, Păng n'gơr măt klơ trôk jêh ri ơh pô aơ: “Ơ Mbơ̆! Mông tât jêh, dăn tâm rnê Kon, gay ma Kon dơi tâm rnê Mbơ̆ đŏng.

² Yorlah Mbơ̆ hŏ ăn jêh ma Kon nau dơi lơn lĕ rngôch nglay săk, gay ăn nau rêh n'ho ro ma lĕ rngôch đơ phung Mbơ̆ ăn jêh ma Kon.

³ Nau rêh n'ho ro jêng nau gĭt năl Mbơ̆ jêng Brah Ndu knŏng nguay jêh ri nau nanê̆ ngăn, ndrel Yêsu Krist jêng Nơm Mbơ̆ hŏ njuăl jêh.

⁴ Gâp hŏ tâm rnê jêh Mbơ̆ tâm neh ntu jêh ri ƀư lôch jêh nau kan Mbơ̆ jao ăn Gâp ƀư.

⁵ Ơ Mbơ̆! Aƀaơ aơ, dăn sŏk nau chrêk rmah Gâp ơm geh ndrel ma Mbơ̆ nơm êlor njêng neh ntu gay tâm rnê Kon tanăp Mbơ̆.

⁶ Gâp hŏ tâm mpơl jêh amoh Mbơ̆ ma phung bunuyh Mbơ̆ ăn ma Kon ta nklang neh ntu nây. Khân păng jêng ndơ Mbơ̆, Mbơ̆ ăn khân păng ma Kon, jêh ri khân păng hŏ djôt prăp nau Mbơ̆ ngơi.

⁷ Aƀaơ aơ, khân păng hŏ gĭt jêh lĕ rngôch nau Mbơ̆ ăn ma Kon jêng nau luh tă bơh Mbơ̆ da dê.

⁸ Yorlah Kon hŏ ăn jêh ma khân păng lĕ nau ngơi Mbơ̆ hŏ ăn ma Gâp. Khân păng sŏk dơn jêh, gĭt nanê̆ Kon luh tă bơh Mbơ̆ jêh ri chroh Mbơ̆ hŏ njuăl Kon.

⁹ Gâp mbơh sơm an ma khân păng, mâu di mbơh sơm an ma neh ntu ôh, ƀiălah yor phung bunuyh Mbơ̆ ăn jêh ma Kon, yorlah khân păng jêng phung Mbơ̆.

¹⁰ Lĕ rngôch phung Kon jêng phung Mbơ̆, lĕ rngôch phung Mbơ̆ jêng phung Kon lĕ; jêh ri tâm khân păng, Kon geh nau tâm rnê.

¹¹ Kon mâu hôm gŭ ta neh ntu ôh, Kon plơ̆ sĭt tay ta Mbơ̆, ƀiălah khân păng gŭ ta neh ntu. Ơ Mbơ̆ Kloh Ueh ơi! Dăn mât uănh khân păng tâm amoh Mbơ̆, jêng amoh Mbơ̆ hŏ ăn jêh ma Kon, gay ma khân păng jêng nguay tâm ban ma He.

¹² Tâm nôk Kon hôm gŭ ndrel ma khân păng, Kon mât uănh khân păng tâm amoh Mbơ̆, jêng amoh Mbơ̆ hŏ ăn ma Kon. Kon hŏ king n'gang ma khân păng, mâu geh du huê bunuyh roh ôh, knŏng êng du huê kon ma nau rai roh, gay ma nau hŏ nchih jêh tâm Nau Brah Ndu Ngơi dơi tât di ngăn.

¹³ Ƀiălah aƀaơ Kon plơ̆ sĭt ma Mbơ̆, jêh ri Kon lah lĕ nau aơ dôl hôm gŭ tâm neh ntu, gay ma nau răm rhơn Kon bêng nŭm tâm khân păng nơm.

¹⁴ Kon hŏ ntrŭnh jêh nau Mbơ̆ ngơi ma khân păng, jêh ri neh ntu tâm rmot ma khân păng, yor khân păng mâu jêng phung neh ntu, nâm bu Kon mâu jêng bunuyh neh ntu tâm ban lĕ.

¹⁵ Kon mâu dăn ma Mbơ̆ sŏk khân păng luh bơh neh ntu ôh, ƀiălah dăn Mbơ̆ mât mray khân păng bơh nau mhĭk.

¹⁶ Khân păng mâu jêng phung neh ntu ôh, tâm ban đŏng Kon mâu lĕ jêng bunuyh neh ntu.

¹⁷ Dăn Mbơ̆ sŏk nau ngăn ƀư kloh ueh khân păng. Nau Mbơ̆ ngơi jêng nau ngăn.

¹⁸ Tâm ban Mbơ̆ hŏ njuăl jêh Kon lăp tâm neh ntu, pôri lĕ Kon njuăl khân păng lăp tâm neh ntu.

¹⁹ Kon jao săk Kon ma khân păng, gay ma khân păng geh nau kloh ueh tâm nau ngăn.

²⁰ Ơ Mbơ̆! Kon mâu ôh knŏng mbơh sơm ma phung aơ dơm, ƀiălah Kon mbơh sơm dăn đŏng ma phung bunuyh chroh ma Kon yor nau khân păng ngơi,

²¹ gay ma lĕ rngôch jêng nguay; nâm bu Mbơ̆ gŭ tâm Kon jêh ri Kon gŭ tâm Mbơ̆, gay ma khân păng gŭ tâm He đŏng, tă bơh nĕ neh ntu chroh ma Mbơ̆ hŏ njuăl jêh Kon văch.

²² Kon ăn jêh ma khân păng nau chrêk rmah Mbơ̆ ăn jêh ma Kon, gay ma khân păng jêng nguay tâm ban ma He jêng nguay.

²³ Kon gŭ tâm khân păng jêh ri Mbơ̆ gŭ tâm Kon, gay ma khân păng jêng nguay tât lôch, gay ăn neh ntu gĭt Mbơ̆ njuăl jêh Kon văch, jêh ri Mbơ̆ rŏng jêh ma khân păng tâm ban ma Mbơ̆ rŏng jêh ma Kon.

²⁴ Ơ Mbơ̆, Kon ŭch lĕ rngôch phung Mbơ̆ hŏ ăn jêh ma Kon gŭ ndrel ma Kon ta ntŭk Kon gŭ, pônây khân păng dơi n'gơr uănh nau chrêk rmah Mbơ̆ ăn jêh ma Kon, yorlah Mbơ̆ hŏ rŏng jêh ma Kon êlor nau rhăk njêng neh ntu.

²⁵ Ơ Mbơ̆ sŏng srăng, neh ntu mâu gĭt năl Mbơ̆ ôh, ƀiălah Kon gĭt năl jêh Mbơ̆, jêh ri phung aơ hŏ gĭt jêh Mbơ̆ njuăl Kon văch.

²⁶ Kon mpơl jêh ăn khân păng gĭt năl amoh Mbơ̆, jêh ri Kon mra mpơl đŏng, gay ma nau rŏng Mbơ̆ hŏ rŏng jêh ma Kon gŭ tâm khân păng, jêh ri Kon gŭ tâm khân păng lĕ.”