Yôhan 16 - Nau Brah Ndu Ngơi 2023

Nơm Bonh Leng

¹ “Gâp nti lah jêh nau nây ma khân may, gay ma khân may bah cha lôt.

² Khân păng mra nsot lơi khân may luh bơh ngih rƀŭn; jêh ri mra tât mông rnôk mbu nơm ƀư nkhĭt khân may mra mĭn păng pah kan ma Brah Ndu.

³ Khân păng mra ƀư lĕ nau nây yorlah khân păng mâu gĭt năl Mbơ̆, mâu gĭt Gâp đŏng.

⁴ Ƀiălah Gâp hŏ ngơi lĕ nau aơ ma khân may gay ma lah tât mông khăn păng, khân may kah gĭt tay ma Gâp hŏ ngơi nau nây ma khân may jêh. Ntơm bơh saơm Gâp ê mâp ngơi ôh ma khân may, yorlah Gâp hôm gŭ ndrel ma khân may.

⁵ Ƀiălah aƀaơ Gâp dăch plơ̆ sĭt ma Nơm hŏ njuăl Gâp văch, jêh ri mâu geh nơm tâm phung khân may ôp Gâp: ‘Mbah ntŭk May hăn?’

⁶ Ƀiălah yor ri Gâp hŏ lah lĕ nau aơ ma khân may, pôri nuih n'hâm khân may geh bêng ma nau rngot rvê.

⁷ Nđâp lah pônây, Gâp lah ngăn ma khân may: Gâp du sĭt jêng khlay lơn ma khân may. Lah Gâp mâu du sĭt, Nơm Bonh Leng mâu mra văch ma khân may ôh. Ƀiălah lah Gâp sĭt, Gâp mra njuăl Păng ma khân may.

⁸ Nôk Păng tât ta aơ, Păng mra nduyh nkra phung neh ntu ma nau tih, ma nau sŏng srăng jêh ri ma nau phat dôih.

⁹ Ma nau tih, yorlah khân păng mâu chroh ma Gâp ôh;

¹⁰ ma nau sŏng srăng, yorlah Gâp hăn sĭt ta Mbơ̆, jêh ri khân may mâu hôm saơ Gâp ôh;

¹¹ ma nau phat dôih, yorlah bu phat dôih jêh nơm chiă uănh neh ntu aơ.

¹² Gâp hôm âk nau ŭch mbơh ma khân may, ƀiălah aƀaơ khân may mâu dơi gĭt rbăng ôh.

¹³ Nôk Brah Nau Ngăn tât, Păng mra njŭn khân may tâm lĕ rngôch nau ngăn; yorlah Păng mâu mra ngơi êng tă bơh Păng nơm ôh, ƀiălah mra mbơh lĕ rngôch đơ nau Păng nơm tăng, jêh ri mbơh ma khân may moh nau mra tât.

¹⁴ Păng mra tâm rnê Gâp, yorlah Păng mra sŏk lĕ nau Gâp ngơi gay mbơh ma khân may.

¹⁵ Lĕ rngôch ntil ndơ Mbơ̆ geh jêng ndơ Gâp da dê, yor ri Gâp lah jêh, Păng mra sŏk lĕ nau Gâp gay mbơh ma khân may.”

Nau tâm nkhah jêh ri nau tâm mâp đŏng

¹⁶ “Hôm ƀât lât, khân may mâu mra hôm saơ Gâp ôh, jêh ri jŏ djê̆ pakơi, khân may mra saơ Gâp đŏng.”

¹⁷ Pôri, geh ƀaƀă oh mon Păng lah ndrăng khân păng pô aơ: “Nơm Nti lah ma he: ‘Hôm ƀât lât, khân may mâu mra hôm saơ Gâp ôh, ƀiălah jêh nây jŏ đê̆ aơ taơ khân may mra saơ Gâp đŏng jêh ri yorlah Gâp sĭt ta Mbơ̆.’ Moh nau Păng ŭch lah nây?”

¹⁸ Khân păng lah: “‘Jŏ djê̆’ moh nau bu ntĭt? He mâu gĭt rbăng ôh moh nau Păng ŭch lah?”

¹⁹ Brah Yêsu gĭt jêh nau phung oh mon ŭch ôp Păng, pôri Păng lah: “Di lĕ khân may tâm ôp ndrăng khân may nơm ma nau ngơi: ‘Hôm ƀât lât, khân may mâu mra hôm saơ Gâp đŏng, ƀiălah jêh nây jŏ djê̆ jêh aơ taơ, khân may mra saơ Gâp đŏng’, Moh nau Gâp ŭch lah?

²⁰ Nanê̆, Gâp lah ngăn ma khân may, khân may mra nhhiăng nhĭm jêh ri nter lŭng, ƀiălah phung neh ntu mra răm maak. Khân may mra rngot, ƀiălah nau rngot khân may mra plăch jêng nau răm maak.

²¹ Bu ur dôl deh kon geh nau ji glăm, yorlah mông păng nơm tât jêh, ƀiălah dôl păng deh kon jêh, păng mâu hôm kah gĭt ôh nau ji glăm, ƀiălah păng răm, yorlah du huê bunuyh hŏ deh jêh tâm neh ntu.

²² Khân may tâm ban lĕ, aƀaơ khân may rngot rvê, ƀiălah Gâp mra tâm mâp đŏng khân may, ri mơ nuih n'hâm khân may mra maak, jêh ri bu mâu dơi sŏk lơi ôh nau maak tâm khân may.

²³ Tâm nar nây, khân may mâu hôm ôp Gâp đŏng ôh. Nanê̆, Gâp lah ngăn ma khân may, moh nau khân may dăn ma Mbơ̆ tâm amoh Gâp, Păng mra ăn ma khân may.

²⁴ Tât aƀaơ, khân may ê hŏ dăn moh ndơ ôh tâm amoh Gâp. Dăn hom, khân may mra dơi geh, gay ma nau maak khân may dơi rĭng.

²⁵ Gâp hŏ dŏng nau hôr gay lah lĕ nau nây ma khân may. Ƀiălah tât mông, Gâp mâu mra dŏng nau hôr gay ngơi ma khân may ôh, ƀiălah mra ngơi săr lah đah khân may ma Mbơ̆.

²⁶ Tâm nar nây, khân may mra dăn tâm amoh Gâp. Gâp mâu lah pô aơ Gâp mra yor khân may dăn ma Mbơ̆ ôh;

²⁷ yorlah Mbơ̆ nơm rŏng ma khân may, yor khân may rŏng jêh ma Gâp jêh ri hŏ chroh jêh pô aơ Gâp luh tă bơh Mbơ̆.

²⁸ Gâp luh jêh tă bơh Mbơ̆ văch ta neh ntu, jêh ri Gâp du tă bơh neh ntu gay plơ̆ sĭt ma Mbơ̆.”

²⁹ Phung oh mon Păng lah: “Aƀaơ Nơm Nti ngơi kloh rah vah, mâu hôm dŏng nau hôr.

³⁰ Aƀaơ hên gĭt jêh Nơm Nti gĭt da dê lĕ rngôch ndơ, mâu hôm ŭch geh bu ôp May ôh. Yor nây, hên chroh ma May luh tă bơh Brah Ndu.”

³¹ Brah Yêsu plơ̆ lah: “Aƀaơ khân may chroh lĕ?

³² Aơ mông tât jêh, nôk khân may mra nchah rai pru pra, ăp nơm tĭng păng nơm ŭch, chalơi Gâp gŭ êng. Ƀiălah Gâp mâu gŭ êng ôh, yorlah Mbơ̆ gŭ ndrel ma Gâp.

³³ Gâp lah lĕ nau aơ ma khân may, gay ma khân may geh nau đăp mpăn tâm Gâp. Khân may mra geh nau rêh ni tâm neh ntu, ƀiălah khân may nâp hom nuih n'hâm, Gâp hŏ dơi jêh đah neh ntu.”